کۆنگرەیێ میۆنشن یێ ئاسایشا جیهانی ژ کۆنگرەیێن هەرە گرنگە ل سەر ئاستێ جیهانێ و هەر سال ژ بۆ پاراستنا ئاسایشا جیهانێ ب سەدان سەرۆک و سەرکردە و وەزیرێن بەرگریێ یێن وەلاتێن زلهێزێن جیهانێ بەژداری ڤی کۆنگرەیی دبن، ب خۆشحالی ڤە شاندەکا هەرێما کوردستانێ ب سەرۆکاتیا نێچیرڤان بارزانی سەرۆکوەزیرێن هەرێما کوردستانێ بەژداری ڤی کۆنگرەیە، چەندین دیدار و کۆمبوونێن گرنگ و ل سەر ئاستێن بلند تا نها هاتینە کرن.
د نهادا رۆژهەلاتا ناڤین د شەرەکێ وێرانکەردا دەرباز دبیت ل هندەک وەلاتان پلانێن کۆدەتایێ هەنە و ل هندەکا شەر و وێرانی و ل هندەکان ژی تێکچوونا پەیوەندیان دگەل وەلاتێن دەردور و هندەک ژی ل بن گەفا دورپێچانە، هەرێما کوردستانێ سەرەرای هاتنا تیرورستێن داعشێ و قەیرانا دارای و پلانێن هندەک حزبێن ناڤخوە ب هاریکاریا دۆژمنێن کوردستانێ لێ تانها بۆیە جهەکێ ئارام بۆ هزارەها ئاوارە و پەنابەران ل سەرانسەری رۆژهەلاتا ناڤەراست، بێگومان ئەڤ ئارامیە بۆیە جهێ سەرنجا وەلاتێن جیهانێ بوویە ژ بەر گرنگیا پێگەهێ هەرێمێ، شاندا هەرێمێ ب فەرمی هاتە داخازکرن بۆ ڤی کۆنگرەیی، سەرەرای وێ دورپێچا بەغدا ل سەر هەرێما کوردستانێ دانای، لێ هەولێن ئارام یێن سەرۆکوەزیرێن هەرێما کوردستانێ وەکر حەیدەر عەبادی بکەڤیتە بن فشارا وەلاتێن جیهانێ و هێدی هێدی دەرگەهێ دانوستاندنا بێی مەرج بۆ هەرێمێ ڤەکر، د ئێکەم رۆژا کۆنگرەی دا سەرۆکوەزیران چەندین کۆمبوون سازکرن و وەزیرا بەرگریا ئەلمانیا دۆپاتی ل پشتگریکرنا هێزێن پێشمەرگەی کر، سەرەرای هندێ کو بەغدا دڤیا ناڤ و رۆلێ پێشمەرگەی د ژناڤبرنا تیرورێ دا نەهێلێت، سەرەدانا وەزیرا بەرگریێ بۆ هەولێرێ ژی پێنگاڤەک بۆ بۆ شکاندنا دورپێچا دۆپلۆماسی یا ل سەر هەرێمێ، کۆمبوون و دیدارێن شاندا هەرێمێ دڤی دەمێ گەلەک هەستیار دا ئاماژەیەکا روونن بۆ بەغدا کو ئەزموونا سیاسەتا دۆپلوماسی و ئابوری و ئێمناهیێ یا هەرێمێ یا سالێن بووری یا سەرکەفتی و درست بوویە و تێرا هندێ دکەت کو سەرنجا هەموو جیهانێ لسەر ب هێزبوونا کوردستانەکا بهێز بیت ل رۆژهەلاتا ناڤین، پشتی رێفراندووما سەرخوەبوونا کوردستانێ دەرگەهێ سەپاندنا سزایان ل سەر هەرێمێ ژ لایێ بەغدا ڤە هاتە ڤەکرن ، لێ سیاسەتا دۆپلوماسی و هەولێن سەرۆک وەزیران بۆ چارەکرنا دوخێ ئالۆزێ ناڤخوە و دیسان هەولێن وی ژ بۆ چارەکرنا کێشەیان ب رێیێن ئاشتی دگەل بەغدا وەکر کو وەلاتێن زلهێز هێلا سور ژ بۆ عەبادی بدانن، دیسان سیاسەتا سەرۆکوەزیران نێچیرڤان بارزانی هەرێما کوردستانێ ژ هەموو شەرەکی یێ کو نها رۆژهەلاتا ناڤین تێدا پاراست، بێگومان ئەڤێ ژی وەکر پتر وەلاتێن جیهانێ بەرێخوە بدەنە هەرێما کوردستانێ ژبەر ب رونی بو دیار بوو بۆ پاراستنا ئاسایش و ئێمنهایێ ب تایبەت ل ئیراقێ ب تنێ پشتگریکرنا هەرێما کوردستانێ یە.
بێ گومان دیدار و کۆمبوونێن کۆنگرەیێ میۆنشن دێ رووخوشکەر بن بۆ راکرنا دورپێچا ل سەر هەرێمێ ژ لایێ بەغدا ڤە، ئێدی هەرێم دێ دەرگەهێ پاراستنا ئێمنهایا ئیراقێ بیت ب تایبەت د دەمێ نها دا کو ئیرانێ هەژموونەکا تمام ل سەر سیاسەتا ئیراقێ و ب رێڤەبرنا دەولەتێ دا هەیە.