داڤۆس شارێكە دەكەوێتە بەشی پرتیگۆ لە ئەیالەتی گرۆبۆندان لە وڵاتی سۆئیس، دەكەوێتە سەر رووباری لاندواسێر، لە چیاكانی ئالپ. بەر لە ساڵی 1971 ئەم شارە بە شاری ئیسكی (یاری سەر بەفر) دەناسرا و خەڵك بۆ گەشت و گوزار و بە سەر بردنی كاتێكی خۆش و دوور لە سیاسەت و خەم و پەژارە سەردانی ئەم شارە گەشتیارییەی دەكرد، بەڵام لە ساڵی 1971 ئابووریناسیی ئەلمانی ( كلاوس شواب ) بڕیاریدا لە گۆشەیەكی دوور لە قەلەبالغی و هەیاهۆ و چیڕەچیڕ و دەنگەدەنگ، شوێنێك دامەزرێنێت بۆ كۆبوونەوەی سەرمایەدار و ئابووریناسانی ئەورۆپی، لێ‌ دوای 18 ساڵ ئەم شارە بوو بە شوێنێك بۆ كۆبوونەوەی سیاسیی و ئابووریناس و بەڕێوەبەران و سەرۆك و كەسایەتییە بەناوبانگەكانی جیهان و ئەمساڵیش نزیكەی سێ‌ هەزار كەسایەتی ناودار و سەركەوتوو لە كارەكانیاندا بەشداریان كرد لەو كۆڕبەندە جیهانییەدا.
ساڵانی پێشتر سەرۆك بارزانی بەشداری لەو كۆڕبەندە دەكرد و ئەمساڵیش بەرێز نێچیرڤان بارزانی وەكوو كەسایەتییەكی سەرەكی و سەركەوتوو لە كارەكانیدا بەشداری كرد و یەكێك بوو لەو كەسایەتییە هەرە سەرەكی و ناسراوترین كەسایەتییەكان لە جیهاندا كە دیدارەكانی زۆرترین دەنگیدایەوە. كۆبوونەوەكانی سەرۆك وەزیرانی هەرێمی كوردستان لەو كۆڕبەندە ببووە مانشێتی سەرەكی زۆربەی راگەیاندنەكانی جیهانی و بە گرنگییەوە باس لە كۆبووەنەوەكانی دەكرا، زوومی زۆربەی تیڤیی و رۆژنامەكان كەوتبووە سەر دانیشتنەكانی نێچیرڤان بارزانی و زۆر بە وردی كاریان لە سەر لێدوان و كۆبوونەوەكانی دەكرا لە گەڵ كەسایەتییە هەرە كاریگەرەكانی جیهانی و سەرۆك وەزیرانی وڵاتانی ئەورۆپی.
چل و هەشتەمین دانیشتنی داڤۆس، خێری تێدا بوو بۆ كورد، نێچیرڤان بارزانی سەرۆك وەزیرانی هەرێمی كوردستان زۆرترین كەسایەتیی جیهانی و سەرۆك وەزیران و سەرۆكی وڵاتانی تێیدا بینی و باس لە گۆڕانكارییەكانی ناوچەكە و بارودۆخی عێراق و پەیوەندییەكانی بەغدا و هەولێر كرا، بۆ زۆربەی ولاتان روون بووەتەوە كە بەغدا بە هۆی هێز و بیری نەتەوەیی و مەزهەبی چ زولمێك لە هەرێمی كوردستان دەكات، بۆ زۆربەی وڵاتان روون بوویەوە كە بەغدا چۆن هزری مەزهەبی بە ناوی دەستوور بە سەر هەرێمی كوردستاندا دەسەپێنێت و ئەوەی لە عێراق دەگوزەرێ‌ كوشتن و تەسلیم كردنی مەزبەكانی دیكەیە، بۆ هەموو لایەك روون كرایەوە كە عێراق تەنها جوگرافییایەكە و ئیران حوكمی دەكات، بۆ هەموو لایەك روون كرایەوە كە ئابووری هەرێمی كوردستان چەندە لە گەشە كردن و بووژانەوەدا بوو و چۆن دووژمانی كورد لە دژی دیموكراسی و پێشكەوتنەكانی هەرێمی كوردستان وەستانەوە.
لە داڤۆس باس لە داهاتوو دەكرێ‌ و پەند لە رابردوو وەردەگیرێت، هەرێمی كوردستانیش بەشێكە لە داهاتووی جیهان و پێویستە گرنگی بەو هەرێمە بدرێت، چونكە لە سالانی رابردوو سەلماندوویەتی چەندە كورد حەزی لە پێشكەوتن و بە جیهانە بوونە و چەندە نەتەوەیەكی گرنگ و بە سوودە بە گشت مرۆڤایەتی.
ئەمساڵ لە كۆڕبەندەكەدا زیاتر باس لە دروستكردنی ئایندەیەكی هاوبەش بۆ دونیایەكی پەرت و بلاو كرا و هەرێمی كوردستانیش بەشێكی گرنگە لەو دونیایە پەرت و بلاوە و دەیانەوێت ببێتە بەشێكی سەرەكی لە كۆڕبەندی داڤۆس.
دۆزینەوەی رێكارەكانی نێودەوڵەتی و نێونەتەوەیی بۆ ژیانی مرۆڤەكان و ئاسایی كردنەوەی ژیان، بەرەو پێشبردنی ئابووری جیهانی و رەخساندنی ئاسایشی نێودەوڵەتی، خاڵە هەرە گرنگەكانی نێو كۆڕبەندی داڤۆس بوون. ئەوەندەی باس لە رۆژهەڵاتی ناوەراست بە تایبەتی سووریا و توركیا و ئیران و عێراق كرا، نیو ئەوەندە باسی هەموو جیهان نەكرا، لێرەدا بۆمان روون دەبێتەوە كە لەو چوار وڵاتەدا كورد خراوەتە ژێر زولمێكی زۆر و تا ئەم زولمە بەردەوام بێت، ئەم چوار وڵاتەش بەم شێوەیە بەردەوام ئاسمانیان پڕ لە دووكەلی سۆتن و بۆنی باڕووت و لاشەی مردوو دەبێت. بۆیە پێویستە بە جیدی كار بۆ چارەسەری كێشەكانی كورد لەو چوار وڵاتە بكرێت.