ل گه‌ل پێكئينانا كابينا هه‌شتێ يا حوكمه‌تا هه‌رێما كوردستاني رايا گشتى وه‌سان دخواست كو حوكمه‌ته‌كا بنگه‌هـ فره‌هـ بهێته‌ پێكئينان و ب بورينا ده‌مه‌كێ درێژ كو سێ جار هه‌يڤان ڤه‌كێشا ب پشكداريا پێنج لايه‌نێن سياسى كو پارتى ديموكراتى كوردستان ئێكه‌تى نشتيمانى كوردستان و بزاڤا گۆڕان و ئێكگرتوويا ئيسلاميا كوردستانێ و كۆمه‌لا ئيسلامى بوون.
كابينه‌ ب سه‌رۆكاتيا نێچيرڤان بارزانى هاته‌ دامه‌زراندن. هه‌ر زوو ژى وه‌كو كه‌ساتيه‌ك به‌رنياس و خودان كاريزما سه‌رۆكاتيا حوكمه‌تێ كر و رۆله‌كێ گه‌له‌ك به‌رچاڤ ژى گێرا، لێ د ماوێ كابينا هه‌شتێ دا پرسگرێكێن جودا هاتنه‌ د رێيا كوردان دا و بێگۆمان داعش ژ لايه‌كى و ژ لايه‌كێ دژى شه‌رێ سياسى ل گه‌ل حوكمه‌تا عيراقێ كو رۆژ بۆ رۆژێ مافێن كوردان هاتنه‌ بنپێكرن و هه‌تا نوكه‌ ژى حوكمه‌تا هه‌رێمێ به‌رده‌وام د بزاڤێن وێ چه‌ندێ دايه‌ دانوستاندن ل گه‌ل به‌غدا بهێنه‌ كرن.
يا دياره‌ كو هه‌موو پارتێن سياسى نه‌شيان به‌رده‌واميێ بده‌نه‌ ڤێ كابينى و هه‌تا دووماهيێ بمينن و به‌رپرساتيا ئابشا و گازندێن وه‌لاتيان بگرنه‌ ده‌ست و خوه‌ ژ مه‌يدانێ ده‌رخستن و وى ده‌مى كو پێدڤى بوو ئێكگرتن هه‌بيت بۆ ب ده‌ستڤه‌ئينانا مافێن وه‌لاتيان هه‌ر وه‌كو ديار ل ده‌سپێكێ ڤه‌كێشانا بزاڤا گۆڕان و كۆمه‌لا ئيسلامى كو مه‌ره‌ما وان ژ ناڤچوونا حوكمه‌تێ بوو و ل ڤێ دووماهيێ ژى ڤه‌كێشانا ئێكگرتوويا ئيسلاميا كوردستانێ ل 16ى ڤێ هه‌يڤێ كو ئه‌ميندارێ گشتى يێ ئێكگرتوو ئه‌ڤ يه‌كه‌ د كۆنگره‌كێ رۆژنامه‌ڤانى دا راگه‌هاند و ئاشكه‌را ژى كو ب ده‌نگێن كۆم يێن سه‌ركرداتيا ئێكگرتوو ئه‌ڤ بڕياره‌ هاتيه‌ دان.
ئه‌ميندارێ گشتى گۆتژى كو ئه‌و ل دژى حوكمه‌تێ نينن و وان نه‌ڤێت حوكمه‌ت ژ ناڤ بچيت و بۆشايا ئه‌منى دروست ببيت، هه‌ر وه‌كو غازى سه‌عيد ئه‌ندامێ سه‌ركرداتيا ئێكگرتوو د ديداره‌كا رۆژنامه‌ڤانى دا ل 2015ێ بۆ كوردستان نيوز رۆلێ نێچيرڤان بارزانى بلند هه‌لسه‌نگاندى و گۆتى كو قه‌يران ژ ژناڤبرنا حوكمه‌تێ ناهيته‌ چاره‌كرن.
د كۆنگره‌كێ رۆژنامه‌ڤانى دا و پشتى كۆمبوونا جڤاتا وه‌زيران، نێچيرڤان بارزانى سه‌رۆك وه‌زيرێن هه‌رێما كوردستانێ د به‌رسڤا پرسياره‌كێ دا ل دۆر ڤه‌كێشانا ئێكگرتوو ژ حوكمه‌تێ گۆت كو ڤه‌كێشانا ئێكگرتوو ژ حوكمه‌تێ د به‌رژه‌وه‌ندا ئێكرێزيێ دا نه‌بوو. دا زانين ژى كو بڕيارا وان ئه‌و دلته‌نگ كرن، بڕيارا ئێكگرتوو بۆ يا دروست نه‌بوو بۆ كوردستانێ و وه‌لاتيێن وێ. سه‌رۆك وه‌زيرى ئاشكه‌را ژى كر كو ئه‌و وه‌كو حوكمه‌ت دێ د به‌رده‌وام بن كو ل دووڤ قانوونێ ژمارا وه‌زيران يا ده‌ستنيشانكرى و حوكمه‌ت ناهێته‌ ژناڤبرن.
گۆتژى پارتى و ئێكه‌تى دێ د حوكمه‌تێ دا د به‌رده‌وام بن و دێ به‌رپرسانه‌ به‌رسينگێ ئالوزيان گرن و ديسا پرۆژه‌ك ب ناڤێ پرۆژێ خزمه‌ت كو مه‌ره‌م پێ ئه‌وه‌ خزمه‌تگۆزارى بهێنه‌ كرن هاته‌ راگه‌هاندن دا كو بزانن خزمه‌تگۆزارى ب چ ره‌نگ ل هه‌رێما كوردستانێ دهێنه‌ كرن.
سه‌رۆك وه‌زيران گۆت ژى كو ب ديتنا وان ده‌رفه‌تا چاكسازيێ ل هه‌رێما كوردستانێ يا ده‌سپێكرى، چ ل بابه‌تێ په‌ترۆلێ و روونى د وى بابه‌تى دا.
نێچيرڤان بارزانى سۆپاسيا جێگرێ سه‌رۆك وه‌زيران كر كو وى سه‌رپه‌رشتيا وى به‌رنامه‌ى كريه‌ و سۆپاسيا ستافێ ل گه‌ل دا كر و ل دووماهيێ نێچيرڤان بارزانى هيڤى خواست كو وه‌لاتى و خزمه‌ت گه‌هاندن ب وه‌لاتيان ب ساناهيتر لێ هێت.