د ئێك ده‌م دا دوو داخوازنامه گه‌هشتینه سه‌رۆكێ جڤاتا وه‌زێرێن هه‌رێمێ، ئێك ژ وان ژلایێ سه‌لیم جبورى سه‌رۆكێ جڤاتا نوونه‌رێن ئیراقێ یه كو ژبۆ به‌ستنا گونگره‌یا ئاشته‌واییا نشتیمانى یه، بۆ ب ڤێ یه‌كێ نێچیرڤان بارزانى هاتییه داخوازكرن كو پشكدارى وێ كۆنگره‌یێ ببیت، داخوازنامه‌یا دووێ ژى ژلایێ كۆربه‌ندا ئابۆرى یا داڤۆس یاجیهانێ گه‌هشتیه سه‌رۆكێ حكومه‌تا هه‌رێمێ، ژ به‌ر كو ده‌مێ هه‌ردوو كۆنگره و كۆربه‌ندان نزیكى هه‌ڤن له‌ورا سه‌رۆكێ حكومه‌تا هه‌رێمێ دێ پشكدارى ئێك ژ وان وان چالاكییان بیت، ل ڤێرێ گرنگه مفا و ناڤه‌رۆك و ره‌نگڤه‌دانێن ڤان هه‌ردوو كۆنگره‌یان بهێته به‌رچاڤ وه‌رگرتن، ئه‌وا ل به‌غدا دهێته سازكرن هه‌لبه‌ت ل ژێر ناڤێ ئاشته‌وایى یه، لێ گه‌له‌ك نیشانێن پرسیارێ ل دووڤ خوه هه‌لدگریت، ژ به‌ركو كۆنگره ژ ئالیێ سه‌رۆكێ په‌رله‌مانێ ئێراقێ دهێته سه‌رپه‌رشتیكرن و هه‌ر ئه‌و بخوه ژى داخوازنامه ژ بۆ نێچیرڤان بارزانى هنارتییه، ئه‌ڤه دده‌مه‌كى دایه هه‌موو ئه‌و دژایه‌تى و گڤاشێن ژ ئالیێ به‌غدایێ ڤه بۆ سه‌ر هه‌رێمێ دهێنه كرن ب ئێمزا و ئۆكه‌یا وى ژ په‌رله‌مانێ ئیراقێ ژ بۆ حه‌یده‌ر عه‌بادى هاتینه ئاراسته كرن، له‌ورا ئه‌و چالاكى ژى هه‌ر ب تنێ ناڤه‌كه و ره‌نگه ئارمانجێن وى ئه‌و بن كاریگه‌ریا خوه ل سه‌ر سیاسیێن ئیراقێ زێده بكه‌ت و ب رێكا ڤێ گۆنگرێ پێگه‌هێ خوه بۆ هه‌لبژارتنێن بهێت یێن ئیراقێ ب هێز بكه‌ت، هه‌روه‌سا ئه‌و نیشانێن سه‌رسورمان و پرسیارا مه‌زن كو ل سه‌ر ڤێ خولا په‌رله‌مانێ ئیراقێ و سه‌رۆكێ وێ دهێته دانان ئه‌وه، كو نه نها و نه ده‌مێ بۆرى هیچ جاره‌كێ ژبۆ دژایه‌تییا كوردان نه‌گۆتیه نه‌خێر و هه‌ر پرۆژه‌یه‌كا ژبۆ لاوازكرنا پێگه‌هێ هه‌رێما كوردستانێ چووبیته ناڤا وێ په‌رله‌مانێ دا سه‌لیم جبورى رێكخه‌رێ كۆنگره‌یا ئاسته‌وایى یا نشتیمانى بێ ئێك و دوو دانایه به‌رنامێ كارێ په‌رله‌مانى، ئه‌ڤه ژ بۆ حكومه‌تا هه‌رێما كوردستانێ هنده‌ك خالن و ب زه‌حمه‌ته نه تاكێن كورد و نه‌ژى ده‌سته‌لاتدارێن كورد ئیدى باوه‌رى ب پێكڤه‌ژیانه‌كا ل گه‌ل به‌غدایێ و عه‌قلیه‌تا نهایا حكومرانییا ئیراقێ هه‌بیت. ده‌رباره‌ى كۆربه‌ندا داڤۆس ژى كو سالانه ل باژاره‌كێ سر و سه‌رما و به‌فر داپۆشیێ وه‌لاتێ سویسرا دهێته سازكرن، هه‌ر ژ بۆ ده‌م بۆراندن و چه‌ند رۆژێن چالاكێێ نینه، به‌لكو كۆربه‌نده‌كێ ئابۆریێ گاریگه‌ره و كار ب ده‌ست و مه‌زنه كۆمپانیێن جیهانێ یێن دبیاڤێ په‌ترۆلێ و پیشه‌سازیێ پشكدارى وێ كۆربه‌ندێ دبن و دبیته پرا په‌یوه‌ندى و ل هه‌ڤتێگه‌هشتنێ، بۆ قۆناغا نهایا هه‌رێما كوردستانێ داڤۆس نه بتنێ گرنگه، به‌لكو ئێك ژ پێدڤیانه و سه‌رۆكێ جڤاتا وه‌زیرێن هه‌رێمێ دكاریت ب هه‌مان شێوه‌یێ كۆنگره‌یا سان پترسیۆرگ یا رۆسی رێكه‌فتنێن نوو دبیاڤێ په‌ترۆلێ دا ئیمزابكه‌ت. هه‌ر ل گۆرى راگه‌هاندنا رێكخه‌رلاێن وێ كۆربه‌ندێ كو ئه‌ڤ ساله پتر ژ 340 سیاسیێن جیهانێ دێ پشكدار بن كو ناسیارترین ژى ئیمانوێل ماكرۆن و دنال ترامب، كه‌واته هیچ گومان تێدا نینه ئه‌وا سه‌لیم جبوورى ل به‌غدایێ دكه‌ت ب تنێ مه‌زاختنا كۆمه‌كا دراڤێ خه‌لكێ ئیراقێ یه و هیچ گرنگیا خوه ژ بۆ خه‌لكى نینه، لێ دوور نینه كۆربه‌ندێ داڤۆس ببیته وێستگه‌هه‌كێ دى یێ ئاشناكرنا په‌ترۆلگه‌هێن هه‌رێما كوردستانێ ب مه‌زنه كۆمپانیێن جیهانێ ژ بۆى كو وه‌به‌رهێنانێ دبیاڤێ په‌ترۆلێ دل ل هه‌رێمێ بكه‌ن و ببنه هه‌ریكاره‌ك كو هه‌رێم د ڤێ قوناغا ئابورییا دژوار دا ده‌ربازبییت
کارزان فەقێ
