دوای ریفراندۆم چەند ئەركێكی ئیداری و سیاسیی راسپێردراون بە نێچیرڤان بارزانی سەرۆك وەزیرانی هەرێمی كوردستان و ئەمەش ئەركەكەی چەند بەرامبەر سەختتر كردووە، لە لایەك ئیدارە كردنی هەرێمی كوردستان لە بارودۆخێكی زۆر سەختی چوار دەور ئاگر و بۆنی باڕووت و تژی پیلان، لە لایەكی دیكەوە بوونی تاخمی خیانەت و شەریكایەتی خاوەن ماڵ لە گەڵ دز، لە هەمووی سەختتر قەیرانی ئابووری و فشارەكانی سەر حكومەت و هاندانی خەڵكی سادە و نەدار لە لایەن ئەجندایەكی دەرەكی و دژبەرەوە، ئەوەندەی دیكە بارودۆخەكەی ئالۆز كردووە. ئیدارە كردنی ئەم هەموو ئالۆزییە و قەیران و سیاسەت و دیپلۆماسییەت كارێكی ئاسان نییە و سەرۆك وەزیرانی هەرێمی كوردستان توانایەكی زۆری گەڕەكە بۆ دەرباز كردنی هەرێم لەم قووناغە سەختەدا و تا رادەیەكی زۆر باشیش توانیویەتی بسەلمێنێت كارەكتەر و ئیداری و سیاسییەكی لێهاتووە و بووەتە جێگەی ئۆمێد بۆ گەلی كورد بە گشتی و هەرێمی كوردستان بە تایبەتی.
ئەگەرچی كۆمەڵە كەسێكی ناو حیزبە سیاسییەكان قەیران خولقێنەر و دارودەستەی نەیارانی هەرێمی كوردستانن و بەردەوام بە مۆزیكی ئەوان دەرەقسن، لێ‌ حكومەتی هەرێمی كوردستان توانیویەتی شوێن پێی ئەو كەسانە بسڕێتەوە و قسەكانیان فش بكاتەوە.
سەردانە یەك لە دوای یەكەكانی نێچیرڤان بارزانی جێگەی ئۆمێدن و لە رووی دیپلۆماسی و سیاسییەوە سەركەوتوو بوونە، ئەو وڵاتانەی بەلێنیان بە حكومەتی هەرێم داوە بۆ پشتگیری و نێوان گیری كردن، ئەگەر بەلێنەكانیان بەجێ‌ بهێنن و نێوەندگیری بكەن و بە گوێرەی دەستوور مافەكانی كورد بچەسپێنن، ئەوە لە ماوەی كەمتر لە دو ساڵدا دەكرێ‌ قەرەبووی ئەم قەیرانەی سێ‌ ساڵی رابردوو بكرێتەوە،
لە دوای گەڕانەوەی نێچیرڤان بارزانی لە بانگهێشتكردنە فەرمییەكانی وڵاتان، گۆڕانكارییەك بە سەر بارودۆخەكەدا دێت و هیوایەك لە لای خەڵك دروست دەبێت، بۆیە پێموایە لە كۆتایی قووناغە سەختەكە نزیك دەبینەوە. بۆیە زۆر گرنگە بەرگە بگرین و هاوكاری حكومەتی هەرێمی كوردستان بكەین بۆ دەربازكردنی ئەم قووناغە سەختە.