دوای رووداوەکەی ١٦ی ئۆکتۆبەر و بانگەشەی بەغدا و باڵیکی ناو لایەنێکی دیاریکراو بۆ ریککەوتن لەسەر گەڕانەوەی سوپای عێراق و داگیر کردنەوەی کەرکوک و بێدەنگی سەرۆک کۆمار و چەند لایەنێکی کوردی و فراکسیۆنەکانیان لەسەر کارەسات و جینۆسایدی خورماتوو، لە هەمان کاتدا هاتوهاواریان بۆ ئەستۆپاکی حەشد و سوپای عێراق و ئارامی کەرکوک، داگیر کردنەوەی کەرکوک و جینۆسایدەکەی خورماتووی لەناو تەمومژی چەواشەکاریدا حەشار دابوو، بەڵام داستانەکەی پردێ دیوە سەربازیەکەی ئەو پیلانگێڕیەی شکست پێهێنا و هەوڵە سیاسی و دیبلۆماسیەکانیش دەرگا داخراوەکانیان بە رووی کورددا کردنەوە، ئەو داستانە و ئەو دەرگا کرانەوەش پلانەکەی ١٦ی ئۆکتۆبەری لە نیوەی رێگا وەستاند.
وەک دەردەکەوێ کێشە و قەیرانە ئابوری و مەزهەبیەکانی نێوان سوننە و شیعە لە لایەک و کێشە سیاسیەکانی نێوان لایەنە شیعەکان لە لایەکی تر روو لە قوڵبوونەوە و تەقینەوەن، کاراکتەرەکانی ١٦ی ئۆکتۆبەریش بەهۆی پاشگەز بوونەوەى حەشدی شەعبی لە رێککەوتنەکە هیچیان دەست نەکوتووەو دەستیان لە بنی هەنبانەی پیلانگێڕیەکە دەرچووە.
بەغدا بە مەبەستی داخستنەوەى دەرگا کراوەکان و ئیدارەدانی کێشە و قەیرانەکانیان و کاراکتەرەکانی ١٦ی ئۆکتۆبەر بە مەبەستی دیزە بە دەرخۆنە کردنی رادەست کردنی کەرکوک و شاردنەوەى جینۆسایدەکەی خورماتوو، جارێکیتر بە پشتیوانی ئێران لە هەوڵی شڵقاندنی گۆمەکە و گێڕانەوەى کوردن بۆ خاڵی سفر، گۆڕان و کۆمەڵ و هاوپەیمانیەکەی دکتۆر بەرهەمیش کە لە ئاوی لێڵدا مەلە دەکەن، هەرچی پێیان بکرێ بۆ تێکدانی بارودۆخەکە درێغی ناکەن، ئەوەش ئەرکێکی قورس دەخاتە سەر شانی خەمخۆرانی کورد و ئەگەر بتوانن ئەو پیلانەش وەک پیلانەکانی تر پووچەڵ بکەنەوە، ئەوا کورد لە خەم دەڕەخسێ و ماف و ئازادیە نەتەوەییە زەوت کراوەکانی وەردەگرێتەوە، بە پێچەوانەشەوە دەبێ ناوبڕێکی دوور و درێژی بدەینێ و لەناو دووبارە بوونەوەی کارەسات و نەهامەتیەکاندا چاوەڕوانی دەرفەتێکی تر بکەین.