بزاڤێن ھەولێر و بەغدا بۆ چارەکرنا کێشان ژێک د جودانە
هەژین رێکانی
عەبادی ھەمان رەفتارا سەرۆکێ بەری خوە دکەت. چو بنیاتەک بۆ چارەکرنا پرسگرێکان نەدانایە، د سەر ھندێ را ل سەر دەسپێشخەریێن ھەرێما کوردستانێ ژی بۆ دانوستاندنێ رازی نەبوویە. ئەو دخوازیت ب مەرج دانوستاندن ھەبن، زێدەباری بن پێکرنا دستووری و مافێن مرۆڤی و بجھـ نەئینانا ماددێ 140 ژ دستوورێ عیراقێ بۆ ئێکلاکرنا چارەنڤیسێ دەڤەرێن کوردستانی یێن دەرڤەی ئیدارا ھەرێما کوردستانێ.
ژبلی ئەڤان ژی رێ ب دەستێوەردانێن دەرەکی ژی دایە کو مایتێکرنێ د وەلاتیێن کوردستانێ دا بکەت وەکو عیراق و دڤێت ھەژمونا ئیرانێ و میلیشیاتێن حەشەدا شیعی ل دژی تاکێن کورد بکار بینیت چو ب رێیا خرابکرنا خانوویێن کوردان یان ژی ئەشکەنجە و ئاوەراکرنا وەلاتیان.
ژ ڤان ژی خرابتر نەحەقیا بەرامبەر وەلاتیێن کوردستانێ ژ نەھنارتنا مۆچە و بۆدجا ھەرێما کوردستانێ ب رەنگەکێ بەردەوام و پەنا بریە بەر دایخستنا فرۆکخانەیێن ھەرێما کوردستانێ ژی. د دەمەکی دا کو کوردستان بزاڤێن جدی ژبوو دیالوکێ دکەت دا کو ئەو کێشە بھێنە چارەکرن.
سەرەدانا نێچیرڤان بارزانی بۆ فرەنسا ژی ئێک ژ وان بزاڤان بوویە. نوکە فرەنسا وەکو ھێزەکا مەزن یا ئورۆپی و خودان پێگەھـ ل سەر ئاستێ دەڤەرێ دھێتە دیتن. سەرۆکێ حوکمەتێ ژی دڤێت د ڤی چارچۆڤەی دا مفایی بگەھینیت و پشتەڤانی و گرەنتیا نێڤدەولەتی ب دەست خوە ڤە بینیت ب تایبەت کو لایەنەک وەکو لایێ سیێ ناڤەندگێریێ بۆ دروستکرنا باوەریێ د ناڤبەرا ھەرێم و بەغدا دا بکەت.
وەکو دبینین حوکمەتا عیراقێ بەروڤاژی حوکمەتا ھەرێما کوردستانێ نوونەراتیا ھەموو عیراقیان ناکەت، بەلکو وەلاتیێن کورد وەکو عیراقی نابینیت و گەلەک ژ مافێن وان بن پێ دکەت. ھەتا ئاسایش و ئارامی و ئێمناھیا عیراقیان یا پاراستی بیت پێدڤیە دانپێدان ب مافێن کوردان بھێتە کرن. باوەرم بارزانی یێ ئامادەیە بۆ ڤێ مەرەمێ ھەر رێیەکا ھەبیت بگریتە بەر.
حوکمەتا ھەرێما کوردستانێ ب سەرۆکاتیا نێچیرڤان بارزانی وەکو سەرکردەکی ھەردەم تەکست ل سەر چارەکرنا ھەموو کێشێن ناڤخۆیی ل گەل عیراقێ دکەت و دخوازیت ل گەل وەلاتێن ھەڤسۆ ژی ھەموو کێشە ب رێیا دیالۆک و لێکتێگەھشتنێ بھێنە چارەکرن، ھەموو رێکارێن لەشکری و چەکداری ژی رەتکرینە.
بارزانی دبینیت کو شەر وێرانکاریێ ب دووڤ خوە دا دئینیت و تێدا چو لایەنەک مفایی ژێ نابینیت، تەکست ل سەر وێ ئێکێ کریە کو دڤێت خەلک ب ئازادی و خوەشگۆزەرانی بژیت.
ئەڤە ئێک ژ پێنگاڤێن چاکسازیێن حوکمەتا ھەرێما کوردستانێ نە ب سەرۆکاتیا نێچیرڤان بارزانی.
