هه‌ر وه‌كو به‌غدا دخوازیت ژیانێ‌ ل هه‌رێما كوردستانێ‌ براوه‌ستینیت و چو نه‌مایه‌ ژی نه‌كری، هه‌ما تنێ‌ ئه‌و مایه‌ ئۆكسجینی ژی ژ هه‌ڤوه‌لاتیێن كورد به‌ندبكه‌ت، هه‌كه‌ شیابا ژی دا كه‌ت، هه‌روه‌كو پسمامێ‌ وان ژی ته‌خسیری نه‌كری و چه‌كێ‌ كیمیاوی به‌ردایه‌ سه‌ر ڤی خه‌لكێ‌ بێگونه‌ه!. هه‌می جۆرێن شه‌ڕان ئینانه‌ سه‌ر هه‌رێمێ‌ خواستن بخه‌ندقینن.
حوكمه‌تا مه‌ یا كوردی سه‌رێ‌ خوه‌ یێ‌ هه‌ری بلند دكه‌ت و خۆراگری كریه‌ ئارمانج!!.. سه‌ره‌رای هه‌بوونا شاشیێن خۆیه‌تێ‌، به‌لێ‌ مینا دبێژن تفا سه‌رئه‌ڤرازه‌ و بلا ئه‌م ئێك بین و مالا مه‌ ئێكه‌، كورد هه‌ر كورده‌ و چه‌ندی ئه‌م بكارین ده‌ستێ‌ هه‌ڤ بگرین. من ژی چاڤێن خۆ ڤه‌كرن ل هه‌مبه‌ر ڤان بزاڤێن ڤان دووماهیان مینا دبێژن گڤگڤه‌كا باش یا دهێته‌ كرن، ناڤه‌شێرم ئه‌ز یێ‌ دلرحه‌ت بووم، حوكمه‌تا نێچیرڤان بارزانی خۆ ل به‌رامبه‌ری بارۆڤه‌كا دژوار گرت، ئه‌ڤ بزاڤێن هه‌نێ‌ ژی دبیت ئه‌ز ژی چپكه‌كێ‌ ژ به‌حره‌كێ‌ یێ‌ د ناڤدا و دبینم، وه‌كو لیستا مووچه‌خۆران و بایۆمه‌تری، پێنگاڤه‌كا گرنگ و سه‌رده‌میانه‌یه‌ بۆ رێگریگرتن ل سه‌ر وان كه‌سێن دو موچه‌یان وه‌ردگرن. یان مووچه‌ و ده‌رماله‌یێن نه‌دادوه‌رانه‌ یێن دناڤبه‌را وه‌زاره‌تان دا كو ل دووڤ قانوونێ‌ ببن، ئه‌ڤه‌ ل گه‌ل هه‌ماهه‌نگیا ئێكجاری ل گه‌ل حوكمه‌ت و په‌رله‌مانی كو ب هه‌ڤرا كار بكه‌ن ل سه‌ر راستڤه‌كرنا وان قانوونێن رێگریێ‌ دێ‌ ل هه‌مبه‌ری گه‌نده‌لیێ‌ دگرن كو د ئه‌نجامدا دێ‌ خۆشگوزه‌رانیێ‌ بۆ خه‌لكی دابین كه‌ت. وه‌ دیاره‌ ل ڤێره‌ كێر گه‌هشیته‌ هه‌ستی و حوكمه‌ت دێ‌ ڤێرا گه‌هیت، هه‌كه‌ نه‌، مووچه‌یێن وه‌زیران و نه‌ یێن شایسته‌ نه‌ دكه‌فتنه‌ به‌ر گه‌ز و مقه‌سێن حوكمه‌تێ‌، ئه‌وێن ب پله‌یا وه‌زیر هاتنیه‌ خانه‌نشینكرن بهێنه‌ لادان و خانه‌نشین ل دووڤ قانوونێ‌ بهێنه‌ خانه‌نشینكرن نه‌ك وه‌كو وه‌زیر!!. یا باشه‌ حوكمه‌تێ‌ ب خوه‌ ژی ئه‌ڤ چه‌نده‌ ل سه‌ر شانێ‌ خوه‌ راكر كو خانه‌نشینكرنا دورست ئه‌وه‌ كه‌سێن نه‌ ژ هه‌ژی ل سه‌ر كیستێ‌ یێن یێن هه‌ژی خانه‌نشینیێ‌ وه‌ربگرن.
حوكمه‌تا هه‌رێمێ‌ یا بریندار و ب تایبه‌ت كه‌سێ‌ نێچرڤان بارزانی بارێ‌ وی زۆرێ‌ گران بوویه‌، له‌ورا ژی هه‌رده‌م جه‌ختی ل سه‌ر چاره‌سه‌ركرنا ئێكجار یا كێشه‌یێن ناڤخوه‌ی كریه‌ كو ل گه‌ل عیراقێ‌ بێته‌كرن و ل گه‌ل وه‌لاتێن ده‌وروبه‌ر ژی كو دڤێت ب رێیا دیالۆگێ‌ و لیكتێگه‌هشتنێ‌ بیت و تشتێ‌ ئه‌نجامێن ئه‌كتیڤ و سه‌ركه‌فتی ئینایی هه‌ر ئه‌وه‌ كو رێكێن سه‌ربازی و چه‌كداری ره‌تكرینه‌، كو تنێ‌ خوینا گه‌نجان نه‌هێته‌ رێتن!!. ئه‌ڤه‌ ژی كلیلا حیكمه‌تێ‌ و هه‌داریێ‌ یه‌، بارزانی یێ‌ دخوازیت كو شه‌ڕی و وێرانكاریێ‌ ب دووماهی بینیت چونكو چو لایه‌ن تێدا سه‌ركه‌فتی نابن، جوامێری یێ‌ جه‌ختیێ‌ ل سه‌ر وێ‌ ئێكێ‌ دكه‌ت كو دڤێت خه‌لك ئازادانه‌ بژیت و ب خۆشگوزه‌رانی، نها ژی و به‌ری ده‌می ژی هه‌ولێن وی دبه‌رده‌وامن بۆ وێ‌ ئێكێ‌ كو رێگری بهێته‌ گرتن ل گه‌نده‌لیێ‌ و مفاوه‌رگرتن ژ داهاتێ‌ گشتی و دامه‌زراندنا ده‌وله‌ته‌كا گشتی و ئۆرگانسازی پێنگاڤێن پراكتیكی هاڤێتینه‌. ئه‌وا نها ژی چاڤه‌رێی لێ‌ دهێته‌ كرن هه‌ر ئه‌وه‌ كو كێشه‌یێن مه‌ به‌ر ب چاره‌سه‌ریێ‌ ڤه‌ ببه‌ت و دووماهی ئارامبوونا ره‌وشێ‌ ژی نها ئه‌وه‌ ئه‌ڤ پێنگاڤانه‌ به‌ر ب باشتر ڤه‌ ببه‌ت.