پێشتر بزاڤێن حكومه‌تا هه‌رێمێ د بیاڤێ چاكسازیكرن و ده‌ربازكرنا كریزا دارایی ل كوردستانێ ب چه‌ندین پێنگاڤان هاتنه دیتن، خالا كو گه‌له‌ك گۆتن لسه‌ر دهاته هژمارا خانه‌نشینین هه‌رێمێ بوو، ب وى ره‌نگى ئه‌و هژمارا كه‌سێن موچه‌یا خانه‌نشینیێ وه‌ردگرن ب به‌راورد ل گه‌ل ئه‌وێن هه‌ژى وێ مووچه‌یێ گه‌له‌ك پترن، ل هه‌مبه‌ر وان گازنده و گۆتنان ژى؛ حكومه‌تا هه‌رێمێ بێده‌نگ نه‌بوو و ده‌ست ب چاكسازییان دگه‌له‌ك بیاڤاندا كر، ژ بایۆمه‌ترى هه‌تا دگه‌هیته كێمكرنا خه‌رجییان و زێده‌كرنا داهاتێ حكومه‌تا هه‌رمێا كوردستان، لێ نها و پشتى 16ى ئۆكتۆبه‌رێ ره‌وشه‌كا نوو دروست بوویه و ب رێژه‌یا 50% ئاستێ فرۆتنا په‌ترۆلا هه‌رمێا كوردستانێ كێمبوویه و ژلایێ به‌غدا و حه‌شدا ده‌ست ب سه‌ر رێژه‌یه‌كا په‌ترۆلگه‌هان هاتییه گرتن، د هه‌مان ده‌مدا هه‌رێمێ ئاریشه‌یا گه‌شتێن ئاسمانى یێن نێڤده‌وله‌متى و خالێن سنورى ژى ل گه‌ل به‌غدا هه‌یه، ره‌نگه ئیدى حكومه‌تا هه‌رێمێ ژ ده‌ستپێكرنا دانوستاندنان دگه‌ل به‌غدایێ بێهێڤی ببیت و باش گه‌هشتییه وێ باروه‌یێ كو به‌غدا هه‌رتشته‌ك ل گه‌ل خه‌لكێ هه‌رێما كوردستانێ ب سیاسى كریه و عه‌بادى دخوازیت ب دۆرپێچ و سزادانا خه‌لكێ هه‌رێما كوردستانێ بازارێ خوه ژ بۆ ده‌نگدانێن بهێت گه‌رمبكه‌ت، له‌ورا ئێدى گرنگه حكومه‌تا هه‌رێمێ به‌ر ب چاكسازیێن نوو دناڤ هه‌رێمێ بچیت، ئێك ژ وان خالان ژى كێمكرنا هژماره‌یا خانه‌‌نشینیان و رێكخستنا وان ب رێكا یاسایێ یه، پێشتر ب رێكێن حزبى و په‌یوه‌ندییان و ژبه‌ر بێ پلانیێ، هژماره‌كا زۆر وه‌كو خانه‌نشین ناڤێن وان هاتینه تۆماركرن و ئه‌ڤ سیسته‌مێ تۆماركرنا ناڤێن خانه‌نشینان ژى ب ره‌نگه‌كێ هه‌ره‌مه‌كى بوویه و ل گۆرى ئامارێن نه‌فه‌رمى پتر ژ 40% موچه‌خۆرێن خانه‌نشنێن ئه‌و كه‌سن كو هه‌ژی وه‌رگرتنا وێ مووچه‌یێ نینن، د هه‌مان ده‌م دا هژماره‌كا زۆر خانه‌نشین هه‌بوون كو ب پلا وه‌زیر ناڤێن وان هاتبوون تۆماركرن و ره‌نگه ئێك رۆژ ژى وه‌كو وه‌زیر ده‌ست بكار نه‌بووبن، لێ ژبه‌ر نه‌بوونا یاسایه‌كێ پێدڤى؛ لیستا خانه‌نشنیان به‌ر ب ڤى بیاڤى بربوو، له‌ورا نها رژدی یا حكومه‌تا هه‌ریمێ و بارگرانییا كێشه‌یا دارایێ رۆژ بۆ رۆژێ وه‌دكه‌ت، قۆناغێن نووتر و ئیراده‌یا بهێزتر یا چاكسازییان ل هه‌رێمێ بهێته دیتن، نها حكومه‌ت بزاڤان دكه‌ت پێداچوونێ ب لیستا مووچه‌خۆرێن خانه‌نشین بكه‌ت و ئه‌وێن هه‌ژى ب تنێ بكارن ببن خوه‌دان مووچه و هیچ كه‌سه‌كێ نه‌هه‌ژى دناڤا وێ لیستێ نه‌مینیت كو ل حسابا كه‌د و ره‌نجا كه‌سه‌كێ دى موچه‌ى وه‌ربگریت، د هه‌مان ده‌مدا ئه‌وێن پێشتر ب پله‌یێن وه‌زیر و گه‌له‌ك پله‌یێن دى هاتینه خانه‌نشینكرن، دێ وان ژ خانه‌نشینا وه‌زیریێ لاده‌ت و دێ ب رێكا یاسه‌كێ هێنه رێكخستن نه‌ب رێكا پله‌یا وه‌زیری، كه‌واته ئه‌و خالا گه‌شبینى تێدا دهێته دیتن چییه؟ ڤێ پینگاڤا حكومه‌تا هه‌رێمێ ژبلى كو دێ كوژمه‌كێ زۆر پاره‌ى ژ بۆ خه‌زینه‌یا حكومه‌تا زڤرینیت، دێ د ڤێ قۆناغێ دا بارێ سه‌ر ملێ حكومه‌تا سڤكتر ژى كه‌ت، ژ لایه‌كێ دى ڤه ئه‌و دلمان و نه‌بوونا باوه‌رییا دناڤبه‌را حكومه‌ت وه‌لاتییان هه‌بوو، دێ به‌ره‌ف ئاسته‌كێ باشتر به‌ت و ئیدى وه‌لاتیێن هه‌رێما كوردستانێ دێ هه‌ست ب وێ یه‌كێ كه‌ن كو حكومه‌تا نها هه‌ى ژبۆ ده‌ربازكرنا ڤێ قه‌یرانێ و ئه‌نجامدانا چاكسازییان خوه‌دان ئیراده‌یه، ره‌نگه ب ڤێ پێنگاڤێ ژى ئه‌و كێمبوونا د فرۆتنا په‌ترۆلا هه‌رێمێ درووست بوویى تا رادیه‌كێ بهێته قه‌ره‌بووكرن، چونكى پێشتر و به‌رى روودانێن 16ى ئۆكتۆبه‌رێ رۆژانه حكومه‌تا هه‌رێمێ نزیكى 600 هزار به‌رمیلێن په‌ترۆلێ ره‌وانه‌ى بازارێن جیهانێ دكر، لێ نها ژبۆ كێمتر ژ 300 هزار به‌رمیلان د رۆژه‌كێ دا دابه‌زییه
کارزان فەقێ
