خەبات وقوربانیدانی كورد بۆ رٍەتكردنەوەی ژێردەستی و ئازادی وسەربەخۆیی بووە ..
رێبوار حەمەلاو شوانی
هەڵسوكەوتەكانی دەسەڵاتدارانی بەغدا دژ بە نەتەوەی كورد وەك دووەم گەورە نەتەوە لە عێراق و دژ بە پێكهاتەكانی تر و كۆپێكردنی سیستەمێكی هاوشێوەی رژێمی ئێران و هەروەها هەرٍەشە و پەراوێزخستنی لایەنەكان و دواتر ئابڵوقەدانی هەرێمی كوردستان و وەك قەوارەیەكی یاسایی و دەستووری و دواتر هێرشی سەربازی بە پاڵپشتی هێزی سوپای وڵاتانی تر بۆ سەر كوردستان دەرخەری ئەو راستییە . هەروەها ئه‌و شاڵاوه نادیموكراسی و شۆڤێنیه نه‌ته‌وه - مه‌زهه‌بیه‌ی حه‌شدی شه‌عبی و هه‌روا حكومه‌تی عه‌بادیه‌وه بدوێم كه به‌به‌رچاوی هه‌موومانه‌وه له كه‌ركوك و ناوچه‌كانی تردا سوكایه‌تی به ئاڵای كوردستانه‌وه ئه‌كراو ئه‌خرایه ژێر پێ و ئه‌سوتێنراو ده‌یان ره‌فتاری تری نابه‌جێیان له‌به‌رامبه‌ری ئه‌كرد و له‌سه‌ریشی به‌رده‌وامن. گه‌ره‌كمه سه‌رنجی خوێنه‌ران و هاووڵاتیانی كوردستان بۆ ئه‌وه رابكێشم كه ئه‌وه‌ی رووئه‌دا له دیدێكی ره‌گه‌ز په‌رستانه‌و شۆڤێنستانه‌ی كار به‌ده‌سته ده‌وڵه‌ت - مه‌زهه‌بیه‌كانی به‌غداوه سه‌رهه‌ڵئه‌دا، ئه‌مه رێك راگه‌یاندنی جه‌نگێكی تره له‌پاڵ جه‌نگی راگه‌یه‌ندراوی راسته‌قینه له دژی كوردستان، واتا ئه‌مه جه‌نگی ئه‌وانه له‌دژی ره‌مزه نه‌ته‌وه‌ییه‌كانمان، ئه‌وه‌ی روو ئه‌دا گه‌ڕاندنه‌وه‌ی بارودۆخه‌كانه بۆ ئه‌و رۆژگاره تاڵ و تاریكانه‌ی كه ئێمه‌ش و عیراقیش پیایدا تێپه‌ڕین. لێكۆڵینه‌وه‌ی ورد و كۆكردنه‌وه‌ی زانیاری وردو درشت ئه‌وه‌مان بۆساغ ئه‌كاته‌وه كه ئه‌و جه‌نگه‌ی به‌غدا له‌دژی كورد رایگه‌یاندووه، جه‌نگێكی ته‌واو عه‌یاره له‌دژی كورد و مێژوو و ره‌مزه‌كانیشی، جه‌نگێكه به ئاراسته‌ی وردو خاشكردنی ئیراده‌ی كورد وه‌ك نه‌ته‌وه‌یه‌ك, هه‌ر بۆیه ئه‌بێ ئه‌وه‌مان به روونی له‌به‌رچاو بێت و بزانین و دوودڵ نه‌بین كه ئه‌و ده‌سه‌ڵاته‌ی ئێستای به‌غدا ده‌ستوور ته‌نیاو ته‌نیا وه‌ك داهۆڵێك به‌كاردێنێ بۆ ئه‌وه‌ی كورد نامۆبكا به مێژوو و جوگرافیای وڵاته‌كه‌ی و به ره‌مزه‌كانی و بمانباته‌وه بۆ ئه‌و سه‌رده‌مانه‌ی كه ناچاربووین شه‌ڕی قورس له‌سه‌ر ره‌مزه‌كانمان بكه‌ین، چونكه نه‌ك خۆمان وه‌ك نه‌ته‌وه, به‌ڵكو ره‌مزه‌كانیشمان كه‌وتوونه‌ته به‌رشاڵاوی نه‌مان و سڕینه‌وه, ئه‌مه له‌كاتێكدایه له سه‌ر تاپای شوێنه‌كانی تری عیراقدا شارو شه‌قامه‌كان و بگره لادێكانیش, به‌سه‌ر سه‌دان جۆر له ئاڵای مه‌زهه‌بی جیاجیا خه‌ریكه وێران ئه‌بێ .گرفتی هەرە گەورەی عێراق، پێشێلكردنی دەستورە، كە دەكاتە پێشێلكردنی ئەو زامن و گەرەنتییەی كە یەكپارچەیی ئارەزومەندانەی عێراقی دەپاراست. بۆیەش زمانحاڵی هەموو لایەك گەڕانەوە بۆ دەستور و باڵادەستی و جێبەجێكردنی دەستورە. هەموو هەوڵەكان بۆ راستكردنەوەی ئاڕاستەی عێراق و گێڕانەوەیەتی لە دەوڵەتێكی میلیشیایی تاكڕەوی فەتوایی مەزهەبییەوە بۆ ئەو دەوڵەتە مەدەنییە سەردەمییەی كە دەخوازرا بێتەدیمانەوە لە چوار چێوەیەكی وڵاتێكی دیكتاتۆریی مەزهەبی تر جگە لە دواكەوتوویی وزیان بەركەوتن بەر دۆزی كورد هیچی تری لێناكەوێتەوە ..
سەركەوتنەكانی حكومەتی كوردستان لە بواری سیاسی و دپلۆماسی و ئابووری لە ماوەی چارەكە سەدەی رابردوو و هەروەها بە پێچەوانەوە ، توندوتیژی و قەیرانی سیاسی و كوشتن و برینەكان و گەندییە میلیارد دۆلارییەكانی هیچ رێگەیەكی لەبەردەم رژێمی بەغدا جگە لە هێرش كردنە سەر هەرێمی كوردستان و سرٍینەوەی قەوارەی كوردستان نەهێشتەوە .میللەتی كورد پێی وابوو كە دەسەڵاتدارانی ئێستای بەغدا تام و چێژی ژێرده‌ستی وئازاری قوربانیه‌كان تێده‌گه‌ن و هیچ كاتێكیش سته‌مكار نابن، هەست بە ئەو جینۆسایدە دەكەن كە لەلایەن رژێمەیەك لە دوای یەكەكانی عێراق دژی كورد وكوردستان ئەنجامیان داوە به‌ڵام ئه‌و هاوكێشه‌یه پێچه‌وانه‌كه‌ی ڕاست ده‌رچوو، هه‌موو دەسەڵاتدارە شیعانەی له دوای یه‌ك كه هاتنه سه‌ر دەسەڵات له‌یه‌كتر خه‌راپ تربوون و نه‌یانتوانی حوكمڕانێكی باش بن بۆ نه‌ته‌وه‌كانی عێراق بێ جیاوازی، ئێمه وه‌ك كورد وه‌ختێك ریفراندۆمی سەربەخۆیمان كرد تاوه‌كو بۆچوونی نه‌ته‌وه‌كه‌مان بزانین له‌سه‌ر مانه‌وه له‌گه‌ڵ عێراق یاخود سه‌ربه‌خۆیی و جیابوونه‌وه له داهاتوو له گه‌ڵ عێراق به‌هیچ شێوه‌یه‌ك نه‌پێچه‌وانه‌ی ده‌ستوره و نه پێچه‌وانه‌ی یاسا شه‌رعیه‌كان و بنه‌مای یاسای نێوده‌وڵه‌تیه، به‌ڵكو ته‌نها مماره‌سه‌ی مافێكی سیاسی خۆمانمان كرد كه زۆر ده‌مێك بوو ده‌بووایه بمانكردبایه، به‌ڵام جێگای داخه له لایه‌ن هاوپه‌یمان و هاورێكانی دوێنی ڕكابه‌ری ده‌كرێین و رێگا ناده‌ن به‌و مافه ڕه‌وایه‌مان بگه‌ین، له‌وه‌ش زیاتر به هێرشی سه‌ربازی و به‌چه‌كی ئه‌مریكی ڕووبه‌ڕوومان بوونه‌وه كه‌خۆی له‌خۆیدا ئه‌مه واقیعێكی تاڵه بۆ مانه‌وه له‌گه‌ڵ ئه‌م عاقڵیه‌ته نا لۆژیكیه و به‌هیچ شێوه‌یه‌ك ناتوانرێت ژیانێكی دیموكراسی له‌گه‌ڵ ئه‌مانه به‌رێ بكرێت هه‌ر كه‌س و لایه‌نێكیش هیواو ئاواتی له‌سه‌ر عێراق هه‌ڵچنیبێت به‌وه‌ی كه به‌خته‌وه‌ری بۆ نه‌ته‌وه‌كانی تربه‌گشتی و كوردستانیان به‌تایبه‌تی به‌دیدێنێت خه‌ڵه‌فاون و كاڵفامن ،چونكه عێراق هێرشی سه‌ربازی هه‌ر ده‌كرده سه‌ر ناوچه‌كوردستانیه‌كان، ئه‌وجا ڕیفراندۆمان بكردایه یاخود نا، ئه‌گه‌ر وانیه بۆ تاوه‌كو ئێستا حكومه‌تی عێراق ماددی 140 ده‌ستوری عێراقی جێبه‌جێ نه‌كردوه،له‌لایه‌كی تر بۆچی بوجه‌و قوتی خه‌ڵكی بڕی خۆ ئه‌و كاتە ڕیفراندۆمان نه‌كردبوو. تاكه ڕێگه له‌به‌رده‌م ئێمه‌ی كورد ئه‌وه‌یه كه خۆمان كۆبكه‌ینه‌وه و جدی تربین له‌سه‌ر پرۆسه‌ی سه‌ربه‌خۆیی ئه‌مه‌ش به پله‌ی یه‌كه‌م له‌به‌ر نه‌وه‌كانی ئاینده، تاوه‌كو نه‌كه‌وینه به‌ر شاڵاوی گله‌یی و گازه‌نده‌یان و نه‌ڵێن باوك و باپیرانمان له نیوه‌ی رێگا ده‌ستیان لێهه‌ڵگرت له‌لایه‌كی تریش تاوه‌كو ئه‌وانیش وه‌كو ئێمه ڕووبه‌ڕووی زوڵم و سته‌می سه‌رانی عێراق نه‌بنه‌وه، بۆیه ده‌گه‌ینه ئه‌و ڕاستیه‌ی كه مانه‌وه له‌گه‌ڵ عێراق به‌ڕێكردنی تەنیا كێشەی كاتە و ئەمرٍۆ یا سبەی دەبێ جیابینەوە بۆ ئەوەی لە چەنگ دیكتاتۆری رزگارمان بێ ..
