پشتى ئالوزبوونا په‌یوه‌ندیێن هه‌رێمێ و به‌غدا گه‌له‌ك كه‌سان هوسان هزر دكر كو ئێدى جیهانا ژ ده‌رڤه‌ ده‌رگه‌هێن خوه‌ ل هه‌رێما كوردستانێ ناڤه‌كه‌نه‌ڤه‌، به‌لێ هاتنا پێش یا نێچیرڤان بارزانى سه‌رۆكێ حكومه‌تا هه‌رێما كوردستانێ چه‌ندین گورانكاریێن بله‌ز دروست كرن، ئه‌وژى چه‌ندین وه‌لاتێن زلهێزێن جیهانێ پشته‌ڤانیا حكومه‌تا هه‌رێما كوردستانێ كر و ب تایبه‌تى ئه‌مریكا و ل ڤان دوماهیكا وه‌زیرێ ده‌رڤه‌ یێ ئه‌لمانیا سه‌ره‌دانا خوه‌ بۆ به‌غدا هه‌لوه‌شاند، ژ به‌ركو به‌غدا رێنه‌دایێ سه‌ره‌دانا هه‌ولێرێ بكه‌ت ئه‌ڤه‌ چه‌ند نموونه‌یه‌كێن بچووكن ل ڤان روودانێن ڤان دوماهیكان و ل ده‌مه‌كى فلمێ پێشمه‌رگه‌ ل نه‌ته‌وه‌یێن ئێكگرتى ئاماده‌بوونا نوونه‌رێن سه‌دان وه‌لاتان دهاته‌ نیشاندان عه‌بادى یێ به‌رهه‌ڤ نه‌بوو په‌سنا روولێ پێشمه‌رگه‌یێ قه‌هره‌مان بكه‌ت ئه‌ڤه‌ ژى ناخێ ره‌ش یێ به‌غدا و عه‌بادى پتر بۆ هه‌موو جیهانێ دیاركر.
وه‌كى یا دیار رۆژ بۆ رۆژێ پشته‌ڤانیا نیڤده‌وله‌تى یا بۆ هه‌رێما كوردستانێ به‌ره‌ڤ زێده‌بوونێ دچیت و ئه‌گه‌ر به‌رێ خوه‌ بده‌ینه‌ سه‌ره‌دانا گرنگ و مێژووى یا نێچیرڤان بارزانى بۆ وه‌لاتێ فه‌ره‌نسا و پێشوازیكرنا وى ژ لایێ سه‌رۆككومارێ فه‌ره‌نسا و شێوه‌یێ پێشوازیكرنێ ل شاندێ حكومه‌تا هه‌رێما كوردستانێ چاڤێن هه‌موو جیهانێ ئێخستنه‌ سه‌ر حكومه‌ت و گه‌لێ كوردستانێ و فه‌ره‌نسا گوته‌ هه‌موو جیهانێ ئه‌گه‌ر هوین هه‌موو پشتا خوه‌ بده‌نه‌ گه‌لێ كوردستانێ ئه‌م پشتا خوه‌ ناده‌ینێ و دێ به‌رده‌وامیێ ده‌ینه‌ په‌یوه‌ندیێن خوه‌ یێن مێژووى ل گه‌ل هه‌رێما كورستانێ ئه‌ڤ چه‌نده‌ژى وه‌كى خه‌نجه‌ره‌كا جه‌رگ بره‌! بۆ پشتا دۆژمنێن كوردستانێ و وه‌رچه‌رخانه‌كا مێژووییه‌ د په‌یوه‌ندیێن دناڤبه‌را هه‌رێمێ و فه‌ره‌نسا و فه‌ره‌نسا ب ئاشكرا گوته‌ هه‌موو جیهانێ گه‌لێ كورد و حكومه‌تا هه‌رێما كوردستانێ دوستێن مه‌نه‌ و ب چ ره‌نگان ده‌ستان ژێ به‌رناده‌ین.
ل وه‌لاته‌كێ وه‌كو فه‌ره‌نسا زمانێ كوردى بهێته‌ نڤیسین ل ده‌مه‌كى ل كه‌ركووكا دلێ كوردستانێ رێنه‌دا رێڤه‌به‌رێ پولیسان ل كه‌ركووكێ په‌یڤا خوه‌ ب كوردى بخوینیت ل ده‌مه‌كى به‌غدا به‌رده‌وام بانگه‌شه‌یا هندێ دكه‌ت كو كورد وه‌لاتیێن عیراقێنه‌ ئه‌رێ كه‌نگى دروسته‌ تو رێكێ ل وه‌لاتیێن خوه‌ بگرى ب زمانێ خوه‌ باخڤن؟ ل ده‌مه‌كى ل ده‌ستۆرێ عیراقێ زمانێ كوردى زمانه‌كێ فه‌رمییه‌‌ ل هه‌موو عیراقێ، ئه‌ڤ چه‌ندا فه‌ره‌نسا كرى نامه‌كا راسته‌خوه‌ بوو بۆ حكومه‌تا عیراقێ كو ئێدى ناهێلین هه‌رێما كوردستانێ لاواز بكه‌ن، به‌لكو دڤێت رۆژ بۆ رۆژێ ئه‌ڤ هه‌رێمه‌ بهێز بكه‌ڤیت و دیسان سه‌رۆكێ فه‌ره‌نسا دا دیاركرن كو دڤێت هه‌موو گرۆپێن توندره‌و ژ عیراقێ ده‌ربكه‌ڤن ژ وانژى حه‌شدا شه‌عبى و ب تایبه‌تى ل ده‌رڤه‌رێن ناكوكى ل سه‌ر و جێبه‌جێكرنا ماددا 140 چل ئه‌ڤه‌ژى ئاماژه‌یه‌كا رووهنه‌ بۆ هندێ به‌غدا تێبگه‌هیت كو نابیت ده‌ستۆرێ عیراقێ بهێته‌گوهورین یان نه‌هێته‌ جێبه‌جێكرن وه‌كو خوه و سه‌رۆكێ حكومه‌تا هه‌رێما كوردستانێ ژى دا دیاركرن كو ئه‌و د به‌رهه‌ڤن بۆ دانوستاندنا دگه‌ل به‌غدا ئه‌گه‌ر به‌غدا یا به‌رهه‌ڤ بیت و یا پێدڤییه‌ هه‌موو به‌ندێن ده‌ستۆرێ عیراقێ وه‌كو خوه‌ بهێنه‌ جێبه‌جێكرن و سوپاسیا گه‌ل و حكومه‌تا فه‌ره‌نسا كر و ب ڤێ چه‌ندێ ژى سه‌رۆكێ حكومه‌تا هه‌رێما كوردستانێ هه‌موو رێك ل فێلبازیێن عه‌بادى و به‌غدا گرتن و ئه‌گه‌ر به‌غدا یا به‌رهه‌ڤ نه‌بیت دانوستاندنا بكه‌ت ل وى ده‌مى هه‌موو به‌رپرسیاریه‌تیه‌ك دێ كه‌ڤیته‌ ستویێ عه‌بادى و حكومه‌تا وى.
ل دوماهیكێ ب پشت راستڤه‌ هه‌رێما كوردستانێ نموونه‌یه‌كا جوانه‌ بۆ رۆژهه‌لاتا ناڤه‌راست و ب چ ره‌نگان فه‌ره‌نسا و ئه‌ورۆپا و ئه‌مریكا ده‌ستان ژێبه‌رناده‌ن و سه‌ره‌دانا سه‌رۆكێ حكومه‌تا هه‌رێمێ نێچیرڤان بارزانى بۆ فه‌ره‌نسا باشترین به‌لگه‌یه‌ كو هه‌رێما كوردستانێ ناڤه‌كێ گرنگ و مه‌زنه‌ د هاوكێشێن زلهێزێن جیهانێ دا.