د ڕوژەڤا ئەڤرۆ یا كوردستانێدا، گەڵەك بەحسا حكومەتا ڕزگارییا نیشتیمانیی و هەڵوەشاندنا كابینا هەشتێ یا حكومەتا هەرێما كوردستانێ دهێت كرن. هەلبەت گومان تێدا نینە كو شاشی و گلەیی و گازندە هەنە و دڤیا ڕەوش باشتر با ژ ئەوا نوكە هەی، ئەگەر هزر ل هەڵوەشاندنا حكومەتێ هاتبا كرن، دڤێت بەری دەمەكی با و نە د ڤی ڕەوش و كاودانێدا كو مە پتر پێدڤی ب حكومەتێ‌ هەیە نەك هەلوەشاندنا وێ‌. چونكی دڤێ ڕەوشێدا كورد یێن تووشی ئاریشەیەكا مەزن بووی. ئۆ دەرئەنجامێ وێ ٥١ ژ سەدێ خاكا خوە و ب دەهان بیرێن پەتڕولێ ژ دەست داینە و نها د لاوازترین رەوشا سیاسی و ئابووریدایە. گەلۆ ئەگەر نها حكومەت هاتە گۆهڕین دێ شێت چ چارێ بۆ ڕەوشا نها پەیدا كەت ؟ چونكی حكومەتا نها ب سەرۆكاتییا رێزدار نێچیرڤان بارزانی ئیدارا حكومەتا هەرێمێ‌ دكەت و، سەرۆكوەزیر ئاگەهداری هەمی ووردەكاری و هویراتیێن هەمی بادەك و فایلێن ناڤخوە و دەرڤەنە و، ب رەهوانی سەرەدەرییێ دگەڵدا دكەن و پترییا ڕێككەفتن و هەڤبەست ب سەرپەرشتییا كەسایەتییا وی بووینە د قوناغا دانوستاندناندا دگەڵ بەغدا. ئەڤ حكومەتە دڤێت سەرپەرشتیێ بكەت ژبەر هەمان ئەگەر، نەخاسمە كەسایەتییا سەرۆكێ حكومەتێ سەنگەكا ناڤخوە و هەرێمی هەیە و دشێت فشارێ ل سەر عەبادی دروست بكەت ب مفایێ‌ كورداندا. د ڕەوشێن هەڤشێوەدا ل هەمی وەڵاتێن جیهانێ، پارتێن دەستهەڵاتدار و ئۆپۆزسیۆن پێگڤە كاردكەن بۆ دەربازكرنا وەڵاتێ خوە ژ ڕەوشێن ئالۆز و، ئێك دگرن بۆ بەڕژەوەندا گەل و مللەتێ خوە و پێشەڕوژا وی. حكومەت ژی دڤێت ب پلان و شارەزایی و هەستیارییەكا زێدەتر ژ هەمی جاران ڕەفتارێ دگەڵ ڕەوشێ بكەت و هەمی هێزا خوە بدەت كاری بۆ دابینكرنا مووچەیێ خەڵكی، كو بابەتەكە گەڵەك هەستیارییا خوە هەیە و ئێكسەر ب ژیارا خەڵكیڤە گرێدایێە. دڤێت هەوڵا چارەسەرییەكا ریشەیی دگەڵ بەغدا بكەت و سازشێ ژ كێمترین ماف و دەستكەفتێن كوردان نەكەت، هەوڵ بدەت پشكا بۆدجەیا هەرێمێ‌ بێ‌ كێماسی ژ بەغدا وەرگریت. دڤێت حكەمتا هەرێمێ‌ دووبارە داڕشتنا پەیوەندیێن هەرێمی و دەرڤە بكەت و كێشەیێن ناڤخوە چارەسەر بكەت. دەم نەیێ گونجایە بۆ گوهڕینێن بنچینەیی ل هەرێمێ و دڤێت قوناغ ب قوناغ گۆهڕین بهێن ئەنجامدان و ڤێ ڕەوشێ ب ئێكگرتن و ئێكڕێزی تێپەڕینین، نە ل هەمبەر ئێك ببین دووژمن و، دووژمنێ سەرەكی (یێ‌ گەلێ‌ كورد ب دەسەلات و ئۆپۆزسیۆنڤە) ژ بیر بكەین. حكومەت دڤێت هەوڵا ڤەگەڕاندنا باوەرییێ دگەڵ وەلاتییان بدەت، دا كو بنگەهەكێ موكم هەبیت بۆ پشتبەستنێ‌ و ژێدەرێ دەستهەڵاتێ، دڤێت حكومەت و مللەت ئاشت ببنەڤە، چونكی مللەت چاڤكانییا شەرعییەتیا هەر وڵاتەكییە. هەر مللەتەكی باوەڕی دا دەسەڵاتا خوە، هیچ كەس و لایەنەك نەشێت حكومەتێ ب هەڵوەشینیت و پێنەڤێت كو كەسایەتییا رێزدار نێچیرڤان بارزانی پێگەهەكێ جەماوەری یێ مەزن هەیە ل كوردستانێ و ل هەر هەلبژارتنەكێ، دێ ژمارەیەكا هەری مەزن بیت و بێ وی چ ڕێككەفتن و هەڤپەیمانی ناهێن بەستن. دڤێت حكومەت وەكو تیمەكا ئێكگرتی كار بكەت بۆ چارەسەركرنا كێشەیان و بۆ دانوستاندنێن دگەڵ بەغدا دڤێت ئێكڕێز و ئێك ڕەنگ بن، ئەو ژی ڕەنگێ كوردستانی بوونێ و، پشت ب خوە و گەڵێ خوە و دۆزا ڕەوایا مللەتێ كورد ببەستن. دڤێت نێچیرڤان بارزانی سەرۆكوەزیرێ‌ حكومەتا هەرێمێ‌ ڕولێ ڕێكخەرێ ناڤماڵا كوردی بگێڕیت بۆ لێك نێزیككرنا نێڕین و بۆچۆنێن پارتێن سیاسی و ڤەگەڕاندنا باوەرییێ دناڤبەرا لایەنێن سیاسیدا، دا كو ب سەركەفتییانە سەركێشییا قوناغەكێ بكەت كو ئێك ژ سەخترین قوناغ د دیرۆكا كورداندا دهێت هژمارتن.