ئه‌گه‌ر قه‌یرانا دارایی د سێ سالێن بۆرى دا ئاریشه‌یێن ل پێشییا گه‌له‌ك پرۆژه‌یێن حكومه‌تا هه‌رێما كوردستانێ دروست كربن ژى، لێ هه‌مان ده‌ما خالێن خوه‌یێن باشیێ ژى هه‌بوون، ئه‌وێ گرنگ ئه‌و بوو كو حكومه‌تا هه‌رێمێ پلانه‌ك گرنگ یا چاكسازیێ بۆ روو ب رووبوونا قه‌یرانێ راگه‌هاندن و تا نها ژى ئه‌و پرۆژه‌یا چاكسازیێ قۆناغێن كارێن وێ به‌رده‌وامه، ژ هه‌موو یان گرنگتر ژى سیسته‌مێ بایۆمه‌ترى بوو، كو ب پێشكه‌فتیترین سیسته‌مێ جیهایێ شه‌فافیێ ڤه‌كۆلین د بیاڤێ ناڤێ مووچه‌خۆراندا هاتییه كرن و هه‌ر شاشیه‌ك یان دوو مووچه‌یێ و مۆچه‌خۆرێن بندیوار هه‌بیتن، ب رێكا وێ سیسته‌مێ دێ ناڤێن وان ژێ هێته ده‌رخستن، هه‌لبه‌ت نها كارێ وێ سیسته‌مێ ب دووماهى هاتییه و ئه‌ڤ یه‌كه ژى دده‌مه‌كێ دایه كو ب ئه‌گه‌رێ داگیركرنا كه‌ركووكێ ژ ئالیێ حه‌شدا شیعی و پاسدارێن ئیرانێ ڤه هنارتنا په‌ترولا هه‌رێما كوردستانێ ژ 600 هزار به‌رمیلێن رۆژانه بۆ كێمتر ژ 300 هزار به‌رمیلان دابه‌زییه، لێ ل ڤێرێ گرنگه وێ یه‌كێ ب سه‌لمینین كو سه‌رۆكێ حكومه‌تا هه‌رێمێ هه‌رده‌م رژد بوویه ل سه‌ر وێ یه‌كێ كو دڤێت رهـ و ریشالێن گه‌نده‌لیێ ل هه‌رێما كوردستانێ بهێنه بنبركرن، كو دده‌مه‌كى دا دامه‌زراندن ب شوه‌یه‌كێ هه‌ره‌مه‌كى بوویه و زێده‌ى شیان و پێدڤیێن حكومه‌تا هه‌رێمێ هاتینه دامه‌زراندن، ئه‌وێ گرنگ ئه‌وه كو حكومه‌تا هه‌رێمێ و سه‌رۆكێ وێ نیچیرڤان بارزانى ل سه‌ر ڤان بزاڤان رژده، لێ هه‌مبه‌ر دا من دڤیت ده‌سته‌لاتداریا نێچیرڤان بارزانى ب یێ سه‌رۆكێ حكومه‌تێن ئێك ل دووڤ ئێكێن ئیراقێ به‌راورد بكه‌م، نه ب تنێ تا نها ئێك كه‌یسا گه‌نده‌لیێ ل سه‌ر سه‌رۆكێ حكومه‌تا هه‌رێمێ نه‌هاتییه باسكرن به‌لكو ئالیێن سیاسیێن كوردستانێ وى ب ئێك ژ ده‌سته‌لاتدار و سیاسیێن قه‌بولكرى ل ده‌ڤ هه‌موو پارتان ب ناڤ دكه‌ن و بۆ قوناغا نها ژى ب تاكه چاره‌سه‌ر دبینن كو هه‌موو پارتان ل سه‌ر ئێك مێزێ كۆمڤه بكه‌ت و ببنه كارته‌كا بهێز ل هه‌مبه‌ر به‌غدایێ، لێ ل به‌غدا 180 پله پێچه‌وانه‌ى هه‌رێما كوردستانێ یه، ژ سالا 2005 و هه‌تا نها هه‌ر ده‌سته‌لاتداره‌كێ بوویه حاكمێ وێ حكومه‌تێ؛ ب ئێك ژ گه‌نده‌لێن ئیراقێ ناڤێ خوه ده‌رخستیه، ل گۆرى شه‌ش راپۆرتێن هژماره‌كا په‌رله‌مانتارێن ئیراقێ لسه‌ر گه‌نده‌لیێ،ئه‌و ده‌رباره‌ى داهاتێ و پاره‌یێ گشتیێ ئیراقێگه‌هشتینه ئه‌نجامێن گه‌له‌ك ترسناك، چونكى به‌لگه‌یێ وێ یه‌كێ ب ده‌ست وان كه‌فتییه ل پشتى كه‌فتنا سه‌دامى و تا نها 59% یا ئه‌و پاره‌یێ ب ده‌ست حكومه‌تا ئیراقێ كه‌فتین ب رێكێن نه یاسایى و وه‌كو دزى ژبۆ ده‌رڤه‌ى ئیراقێ هاتینه برن، نه ب تنێ مالكى به‌لكو عه‌بادى بخوه‌ژى ده‌ست دهنده‌ك كه‌یسێن گه‌نده‌لى دا هه‌بوویه، هه‌ر ئه‌ڤه‌ژى بوویه ئه‌گه‌رێ رژد نه‌بوونا عه‌بادى ل سه‌ر بنبركرنا گه‌نده‌لیێ ل ئیراقێ. نها هه‌فتیێ جاره‌كێ عه‌بادى ل سه‌ر ئه‌كرانێن تیڤیان ده‌ردكه‌ڤیت و جاردن گۆتنێن وى ل هه‌مبه‌ر خه‌لكێ كوردستانێ كۆپیێن هه‌فتیێن به‌رى وینه و پرن ژ سۆزێن بێ بنه‌ما، چونكى هه‌موو ده‌ما تلێ تاوانباریێ و گه‌نده‌لیێ ئاراسته‌ى حكومه‌تا هه‌رێما كوردستانێ دكه‌ت ب وى كو ئیراق شاما شاریفه و ئه‌وێ دبێژنێ (گه‌نده‌ل) ب تنێ ل ئیراقێ نینن، هه‌لبه‌ت عه‌بادى ل ڤێرێ دوو ئارمانج هه‌نه، ئێك: عه‌بادى دڤێت هه‌موو شاشى و گه‌نده‌لیێن خوه و پارتا خوه ل به‌غدایێ ل بیرا خه‌لكێ ئیراقێ ببه‌ت و وان ب ئاریشه‌یێن هه‌رێما كوردستانێ مژوول بكه‌ت، دده‌مه‌كى ئیراق به‌ره‌ف هه‌لبژارتنان دچیت و نها بازارێ بانگه‌شه‌یێن وان دژایه‌تیكرنا هه‌رێما كوردستانی یه، كو ل هه‌موو هه‌لژارتنێن بۆرى وان سه‌ركه‌فتن ئینایه و ب ڤێ یه‌كێ ده‌نگه‌كێ زۆر ب ده‌ست خوه‌ڤه خستینه. دوو: عه‌بدى دڤێت ده‌نگه‌كێ نه‌رازدى و دژى حكومه‌تا هه‌رێمێ ل ناڤا هه‌رێما كوردستانێ دروست بكه‌ت، هه‌روه‌كو عه‌بادى هاى ژێ نه‌بوویه و پتر ژ 92% خه‌لكێ هه‌رێما كوردستانێ هیچ ده‌مه‌كى نه‌ڤیایه دگه‌ل وى و حكومه‌تا وى بژیت و ده‌نگ ب سه‌رخوه‌بوونا كوردستانێ دایه، ئیدى دڤێ خالێ دا عه‌بادى سه‌رناكه‌ڤیت وخه‌لكێ هه‌رێما كوردستانێ باش دزانیت شاما شه‌ریف دكه‌ڤیته كیڤه، له‌ورا ل داویێ هه‌موو كوردستانییان وه‌كو رۆژا 25ى ئیلۆنێ دێ ل به‌ر تاكه ده‌رگه‌هێ خوه راوه‌ستن كو حكومه‌ت و ده‌سته‌لاتدارێن هه‌رێمێنه، گه‌نده‌لى و سیاسه‌تێن تاكره‌وى یێن ئیراقێ ژى تنێ دێ دناڤا سنورێ وان دا بیت و تیرۆژكێن وێ ژى نكار ژ سنورێن خوینێن هێزێن پێشمه‌رگه‌ى ده‌رباز ببن.
کارزان فەقێ
