دوای تەواو بوونی ماوەی سەرۆكایەتی بەرێز مەسعوود بارزانی، ئەركی نێچیرڤان بارزانی قورس بووە و پێویستە وێڕای ئیدارە كردنی حكومەت و دەرباز كردنی حكومەتەكەی لەو قەیرانە، ئێستا فەرماندەی گشتی هێزەكانی چەكداریشە و بەغداش رۆژ بە رۆژ بەناوی دەستوور گۆشارەكانی سەر هەرێم زیاد دەكات. وەفد لە دوای وەفدی بیانی دێنە لای سەرۆكوەزیران و لە تەواوی گۆشەكانی جیهانەوە پەیوەندی پێوە دەكرێت، لە لایەك چارەسەری ئەم بارودۆخەی ئێستای ناوچەكە و لە لایەكیتریشەوە چارەسەری كێشەكانی نێوخۆیی لایەنە سیاسییەكانی كورد. دۆزینەوەی رێگە چارەسەرەكان بۆ كێشەكانی نێوخۆیی و یەكخستنی نێوماڵی كوردی، زۆر سەختترن لە چارەسەری كێشەكانی هەرێم لە گەڵ بەغدا و وڵاتانی دراوسێ‌، دەركردنی ئەم هەموو بەیاننامە و وەڵامدانەوەیان و هەوڵدان بۆ رازی كردنی هەموو لایەك و راگرتنی باڵانس، كارێكی ئاسان نییە و بای خۆیان هەم كات و هەمیش سەبووری زۆری گەڕەكە. ئەگەر ئەم هەموو كێشە و رێگە چارەسەرەكان و دانیشتن لە گەڵ وەفدەكان و وەڵامدانەوەی نامە و بەیاننامەكان دێنەوە بۆ لای نێچیرڤان بارزانی، هێمایە بۆ ئەوەی بۆ هەموو لایەك دەركەوتووە كە لە دوای رێزدار مەسعوود بارزانی، نێچیرڤان تاكە كەسایەتی خاوەن كاریگەری و سیاسی هەرێمی كوردستانە كە دەتوانێ‌ رێگە چارەیەك بدۆزێتەوە بۆ دەرباز بوون لەو هەموو كێشمەكێشمانەی ناوچەكە تێیكەوتووە.
ناشاردرێتەوە كە دۆخەكە ئالۆزە و بە ئاسانی لێی دەرباز نابین، پێویستە بە هەموو لایەنە سیاسییەكان هاوكار بن و یارمەتی حكومەتی هەرێمی كوردستان بدەن بۆ چارەسەری كێشەكان و رێگە گرتن لەو هەموو سیناریۆ و پیلانانەی لە لایەن بەغداوە داڕێژراون بۆ شكەستن هێنان بە پێشكەوتنەكانی كورد لە باشووری كوردستان.
نێچیرڤان بارزانی تاكە كەسایەتییە كە دەرگا بە دەرگای حزبەكان دەگەڕێت و بە بێ‌ هیچ مەرج و داواكارییەك داوای یەكڕێزی لایەنەكان دەكات، بگرە زۆرترین قوربانیشی داوە بۆ ئەوەی لایەنەكان رازی بكات بۆ رێكخستنی نێوماڵی كورد. چونكە تاكوو كورد نەبێتە یەكدەنگ و نێوماڵی خۆی رێكنەخاتەوە، كارێكی ئەستەمە بە سەلامەتی لەم بارودۆخە دەربچین، نێچیرڤان بارزانیش باش دركی بەوە كردووە كە ئەگەر ئێمە نێوماڵی خۆمان رێكنەخەین چەندە بۆ دواوە دەگەڕێینەوە شتێك نامێنێ‌ بە ناوی هەرێمی كوردستان.
هاتنی نامەكانی سەرۆكی فەرەنسا و سكرتێری گشتی نەتەوە یەكگرتووەكان، پشتگیری هاوپەیمانان و وڵاتە ئیقلیمیەكان بۆ راگەیاندراوەكانی حكومەتی هەرێمی كوردستان، دانیشتنی مەكگۆرك لە گەڵ سەرۆكوەزیرانی هەرێم، ئاماژەی رۆنن بۆ ئەوەی جیهان پشتگیری لە گەلی كورد دەكات و داوا لە بەغداش دەكەن پێشوازی لە هەولەكانی هەرێمی كوردستان بكات بۆ دەرباز لەو بارودۆخە ئالۆزەی عێراق و ناوچەكە تێیكەوتووە. ئەم پشتگیریانەش بۆ متمانە بوون بە چارەسەری كێشەكانە لە لایەن نێچیرڤان بارزانییەوە و، ئەمانەش دەستكەوتی گەورەن بۆ گەلی كورد بە گشتی و باشووری كوردستان بە تایبەتی.