هەرێما کوردستانێ د زێدەتری دەهـ سالێن بووری دا، ئابۆرەکا بهێز ل سەر بنەمایێ پێکئینانا پەیوەندیێن بازرگانی و ئابۆری دگەل وەلاتێن جیران و زلهێز ئاڤا کر، لێ سەرکردەیێن بەغدا ل جهێ چاڤلێکرنا سیاسەتێن هەرێمێ و پێشڤەبرن و خوەشکرنا ژیانا وەلاتییان، بەردەوامی دا گەندەلییا خوە و زێدەباری گەندەلیێ ژی، دژایەتییا سیاسەتێن سەرکردەیێن هەرێمێ کر کو تنێ دخواست کوردستانێ پێشڤە ببەن.
یا ل ناڤەڕاستا مەها بووری ژی روودای، ب سەرداگرتنا هەرێما کوردستانێ ژ ئالیێ بەغدا ڤە، تنێ ژ بۆ نەهێلانا پێشڤەچوونا ئابۆری یا کوردستانێ و هەروەسا بۆ رێگرییا سەرکەفتنا هەرێما کوردستانێ د پەیوەندیێن دەرڤە دا بوو و هەرچەندە حکومەتا ئیراقێ سوپایێ دەولەتێ دژی ئێک ژ پێکهاتەیێن وێ دەولەتێ کو کوردستانی نە، بکارئینا و ئەڤەژی بنپێکرنەکا سۆر و سۆر یا دەستووری یە، لێ هەرێما کوردستانێ هەر رازی نینە کێشەیان ب هێزێ چارە بکەت، ئامادەباشییەکا تەمام بۆ دەستپێکرنا دانوستاندنان هەیە و چەندین دەستپێشخەری ژی بۆ دەستپێکرنا دیالۆگێ ئاراستەیی حکومەتا ئیراقێ کرن.
هەرێما کوردستانێ د دیرۆکا خوە دا چ دەمان نەخواستییە ببیتە فاکتەرێ تێکدانێ ل رۆژهەلاتا ناڤەڕاست، لێ شەڕ پێ هاتییە فرۆشتن و حکومەتێن بەغدا چ دەمان رێ نەدایە کوردستان ب ئارامی بژیت و نوکە ژی ئەو دەستوورێ ب رازیبوونا هەموو ئیراقییان بۆ پێکڤەژیانێ هاتییە دانان، هەر پارتەک و ئالییەکێ سیاسی یێ ل بەغدا دەستهەلاتێ بگریت، ب دلێ خوە و د بەرژەوەندییا سیاسەتێن پارتی و ئالیگرێن خوە دا، بنپێ دکەت و دخوازن دوبارە کوردستانێ ب زۆڕی بکێشنە د ناڤا شەڕەکی دا و ئارامییا هەموو دەڤەرێ تێک بدەن. لێ دەستپێکرنا شەڕی نەبتنێ دژی خواستێن کوردستانێ یە، بەلکو دێ بەرژەوەندیێن چەندین وەلاتێن دی ژی ل هەرێما کوردستانێ ئێخیتە بن گەفان.
سیاسەتێن بەری نها یێن حکومەتێن بەغدا و لاوازییا سازیێن ئێمناهیێ یێن سەر ب بەغدا ڤە، هەروەسا ببوونە ئەگەرێ ئاوارەبوونا ب ملیۆنان وەلاتیێن دەڤەرێن کوردستانی و مووسل و چەندین پارێزگەهێن دی یێن سوننەنشین یێن ناڤەڕاستا ئیراقێ و دەما هەموو وی خەلکی چ رێ نەماین، چ جهـ ژ کوردستانێ ئارامتر نەدیتن کو لێ بهێنە حەواندن. لێ حکومەتا ئیراقێ دیسان ئەو کارێ مرۆڤاتی یێ هەرێما کوردستانێ، ب دەلیڤە دیت کو فشاران ل سەر حکومەتا هەرێما کوردستانێ زێدە بکەت و بودجەیا هەرێمێ ژ بەغدا بێ بەهانەیێن بەرعەقل بڕی و کارێ پێدڤی بۆ ئاوارە و دەربدەران ژی نەکر. نوکە ژی حکومەتا هەرێما کوردستانێ بۆ دابینکرنا ژیانا وان ئاوارەیان کو دبنە سیهـ ژ سەدێ یا رێژەیا ئاکنجیێن هەرێمێ، نەچارە کۆژمەیێن مەزن یێن دراڤی ب مەزێخیت، بخودانکرنا ئاوارەیان زێدەتری ملیار دۆلاران ل خەرجیێن حکومەتێ زێدە کرینە، لێ زیدەباری هەموو فشاران، هەرێم بزاڤان دکەت ژیانا ئاورە و وەلاتیێن خوە ب هەموو شیانێن هەین، بەرەڤ باشتر ببەت و گوهۆڕینان د سیسەتەمێ دانا مووچەیان ژی بکەت.
حکومەتا هەرێما کوردستانێ زێدەباری وان دەستپێشخەریێن دگەل بەغدا کرین، دەربارەی رەوشا ناڤخوە یا کوردستانێ ژی، دخوازیت هەموو ئالیێن سیاسی پشکداری پرۆسەیا دانوستاندنێن دگەل بەغدا بن و هەرچەندە بەغدا دخوازیت ب زمانێ چەک و هێزێ دەستکەفتێن کوردستانێ ژناڤ ببەت و دوبارە دەستووری بنپێ بکەت و سیستەمێ پارێزگەهان ل سەر کوردستانێ بسەپینیت، لێ هەرێم ب سیاسەتێن ژیر بەغدا دکێشیتە سەر مێزەیا دانوستاندنان و ژبەر کو هەرێمێ چ رێ بۆ ئیراقێ نەهێلاینە دوبارە دەست ب شەڕی بکەت. فشارێن ناڤدەولەتی ژی نوکە بۆ دەستپێکرنا دانوستاندنان ل سەر بەغدا هەنە و ژبلی فشارێن دەستپێکرنا دانوستاندنان، چەندین گرۆپێن میلیشیایێن ئیراقی چووینە د لیستەیێن تیرۆری یێن جیهانی دا، هەروەسا سەرکرداتییا سیاسی یا بەغدا ژی ژبەر نێزیکبوونا دەمێ هەلبژارتنان، نەچارە سیاسەتێن نەرمتر نیشان بدەت و دانوستاندنان د چارچۆڤەیێ دەستووری دا دەستپێ بکەت.