ھەر ژ ئاڤاکرنا عیراقێ وەرە ل سالا ١٩٢١ ل سەر دەستێ برێتانیا داگیرکەر و وێرانکەرا جیھانا کەڤن تایبەت کوردستانێ , و ھەتا نھا تشتێ کو ل ڤی وەلاتی نە بەرھەڤ و پشت گوە ھاڤێتی و ئەرزان بەردەوام زمانێ دیالوگێ بویە . پرانیا جاران کو دیالوگ ژی ھاتبیتە کرن ل ڤی وەلاتی ھەر مەرەما شەری و دەم کوشتن و پیلان و خو بھێزکرن بویە. بەلێ ئەڤ چەندە واتایا ھندێ نادەت ل ئەلتەرناتیفێ دیالوگێ بگەرین و شەری بکەینە دادوەر. ھەرێما کوردستانێ بەردەوام داخازیا دیالوگێ و دانوستاندنێ کریە ل گەل ھەر ئالیەکێ تایبەت بەغدا و ھەردەم پێنگاڤێن شەری ل ناڤەراست و باشوری بو کوردستانێ ھاتینە. د نھا دا و پشتی کارەساتا شازدێ ئوکتوبەرێ کو نیڤەکا ئاخا کوردستانێ کەفتە دەستێن میلیشیاتێن حەشدێ و حکومەتا تائیفی ب ھەفکاریا بالێ کالفامێن ناڤ ئالیەکێ سیاسی کو وی ئالیێ سیاسی ب ژیێ کالفام و فێسبوکباز و ھەرزەکارێن سیاسی خەبات و قوربانی دایە بو ڤی میللەتی.
ئەو دفن بلندیا بەغدا کو ل سەر بنیاتێ بێ سەروەریا وێ بو دروست بوی , ژ ئالیێ حکومەتا ھەرێما کوردستانێ بباشی ھاتیە خاندن و بەردەوام ھیجەتا شەری و زمانێ توند لێ براند و بەردەوام داخازا دیالوگێ دکر و ل سەر ھەلویستێ خوە بەردەوامە , ل گەل پاراستنا مافێن دەستوریێن ھەرێما کوردستانێ کو دەستورێ عیراقێ دیار کرینە .
رەوشا سیاسی ل ھەرێما کوردستانێ پشتی شازدێ ئوکتوبەرێ سەد ل سەد ھاتیە گوھرین و فەرە ھەمی ئالیەک وێ راستیێ ژی باش بزانن کو ئەڤ کاودانە ئێک ھەلویستیێ ژ وان دخازیت. وەکی سەروکێ حکومەتا ھەرێما کوردستانێ ل چەندین گوتارێن خوە دا دووپاتی ل سەر ئێکرێزیا ھەمی ئالیەکێ کریە بو دەربازکرنا ڤێ قوناغا نازک کو ل شیانێن گەلێ کورد داھەیە بگەھنە کنارێن ئارامیێ , ژ بەرکو میللەتەک کیمیاباران و ئەنفال و جینوساید و کوچا ملیونی و دەھان کارەساتان ببینیت دێ ڤێ قوناغێ ژی دەرباز بکەت. داخازکرنا ئێکرێزیێ ژ ئالیێ بەرێز نێچیرڤان بارزانی تنێ بەس نینە و فەرە دەرگەھێ ھەمی ئالیەکێ سیاسی بقوتیت و ھەمی شیانان ل دور حکومەتا خوە کومبکەت بێ جوداھی ژ بەرکو وەلاتێن ئێکگرتیێن ئەمریکی پشتەڤانیا خوە بو سەروکێ حکومەتێ و جێگرێ وی دیار کریە بو سەرکرداتیا ڤێ قوناغێ یا حکومەتا کوردستانێ.و ھەروەسا ئەرکێ ئالیێن سیاسی یە ژی ھاریکار بن بو دەرباز کرنا ڤێ قوناغێ ژبەرکو ھەر ھیجەتەک لێک ئینانە دەر و تانە لێدانەک ل ھەڤدو واتایا گرانتر کرنا بارێ ھەڤوەلاتیێن کوردستانێ.
زور جارا داخازکرنا دیالوگێ ژ ئالیێ حکومەتا ھەرێما کوردستانێ ڤە , ب جورەک ژ لاوازیێ دئێتە ھژمارتن ! ئەرێ چ ئەلتەرناتیفەک ژ بلی دیالوگێ ھەیە ؟ ئەرێ داویا شەری واتا نە دەسپێکا دیالوگێ ؟ ئەرێ ب ڤێ پێنگاڤێ ئالیێن دەرڤە دێ چەند پشتەڤانیا کوردستانێ کەن؟..زور کەس و ئالیی ب مخابنی ڤە ل سنورێن بەرژەوەندیا نەتەوەی ددەن ھەمی ژی ژ بەر شکاندنا ھەڤرکێن خوەیێن سیاسی .
ب دیتنا من ل ڤێ قوناغێ دا داخازکرنا دیالوگێ واتایا :
• حکومەتا ھەرێما کوردستانێ ب روونی ژ نیەتا خراب و شەرانی و پیلانگێریا میلیشیات و تائیفەگەرێن بەغدا گەھشتیە. ژ بەر ھندێ دڤێت ب زمانێ دیالوگێ و ئەقل و مەنتقی زمانێ ھەرەشە و گەفێ نەھێلیت . دەستور دادوەر بیت.
• دووپاتی کرن ل سەر پرەنسیپێن دیالوگێ ژ ئالیێ کوردستانێ ڤە , جورە پشتەڤانیەک باش بو کوردستانێ کومدکەت .
• ھەروەسا ب ڤێ پێکولێ دەرفەتەک مەزن دێ ب ھەمی ئالیان ھێتە دان کو ھاریکار بن ناڤ مالا کوردی رێک پێخنە ڤە .
• ھەروەسا ب دیالوگێ دێ خوینا کوردستانی و عیراقیان یا پاراستی بیت , و دێ باش بو ھەمی کالفام و سیاسیێن چەکدار روون بیت کو سیاسەت ب کارڤەدان و گەفێ نا ئێتە کرن.
ل داویێ دا فەرە حکومەتا ھەرێما کوردستانێ ل سەر داخازکرنا دیالوگێ بەردەوام بیت و ل گەل ھندێ دڤێت ناڤ مالا کوردی رێکپێخیت و بەردەوام بیت ل باشکرنا ژین و ژیارا خەلکی و ھەروەسا چاکسازیێ بەردەوام بکەت.و بەرەھەڤیەک باش بو دانوستاندنا بێتە کرن و ب ئەجیندایەک روون و ئاشکرا و دیر ژ بەرژەوەندیێن حزبی و شەخسی دانوستان بێتە کرن .