هەرێما کوردستانێ پشتی هاتنا رێکخستنا تیرۆرستی یا دژی داعشێ ل سالا دوهزار و چاردێ و پەیدابوونا قەیرانا ئابۆری ل هەرێمێ و ب تایبەتی پشتی بوویەرێن شازدەی ئۆکتۆبەرێ کۆ کوردستان خستیە د بن قەیرانەکا مەزن دا و د دەڤ گەلەک کەسان رەوشا کوردستانێ بەرەڤ ئاقارەکێ نەدیار ڤە د چیت و گەلەک کەسێندی ژی چ هیڤی ژ ئارامبوونا رەوشێ نەماینە لێ ل گۆر وان داوی پێشهاتێن هەرێمێ ب خوە ڤە دیتی و بزاڤێن نێچیرڤان بارزانی، سەرۆکوەزیرێن هەرێما کوردستانێ د چوارچووڤەیێ کابینا حکومەتەتێ دا، بەلگەیەکێ باشە کو رەوش دێ د بەرژەوەندییا حکومەتا مە دا بیت.
گەر ئەم تەکەزا خوە بێخینە سەر بوویەرێن پشتی شازدەی ئۆکتۆبەرێ ئەم د شێین د چەند خالان دا رۆلێ سەرۆکوەزیرێن هەرێمێ د بزاڤا چارەکرنا رەوشێ دا دیار بکەین.
1- پشتی مەسعوود بارزانی، سەرۆکێ هەرێما کوردستانێ رەت کری دەما دەستهەلاتا وی بهێتە دریژکرن و نامەیا خوە بۆ پەرلەمانێ کوردستانێ هنارتی و پرانییا دەستهەلاتێن خوە رادەستی سەرۆکاتییا حکومەتێ کری، هەلوەستەکێ باش و ئەرێنی ل دەف وەلاتێن جیهانی ب تایبەتی زلهێزان ڤە دیار بو و پرانییا وان پشتەڤانییا خوە بۆ نێچیرڤان بارزانی دیار کر کو ئێک ژ وان ئەمریکا بو کو ب ئاشکەرایی د بەیانەکا فەرمی دا راگەهاندبوو: ئێدی ئەو دێ ب رەنگەکێ باش کار د گەل نێچیرڤان بارزانی و قوباد تالەبانی، جێگری وی دا کەن ژبۆ دەرخستنا هەرێمێ د ڤێ رەوشا نها دا.
وەلاتێ تورکیا ژی ب ب رەنگەکێ نەفەرمی کۆمبوونا نێچیرڤان بارزانی د گەل رەجەب تەیب ئەردۆغان، سەرۆککۆمارێ وی وەلاتی دا راگەهاندییە و تورکیا ل گۆر بەرژەوەندیێن خوە دێ د گەل نێچیرڤان بارزانی دا کار کەت و کو ئەڤ یەکە د بەرژەوەندییا کوردستانێ دا یە.
2- کۆمبوونێن سەرۆکوەزیرێن کوردستانێ د گەل بالیۆزێن وەلاتێن جیهانی ل ئیراقێ خالەکا دی یا گرنگە د ڤی دەمی دا کو ژمارەکا بالیۆزێن وەلاتێن جیهانی ل ئیراقێ سەرەدانا نێچیرڤان بارزانی دکەن و رەوشا نها یا هەرێمێ و رێکێن چارەکرنا وێ ئالۆزیێ گۆتوبێژ دکەن.
نێچیرڤان بارزانی سەرۆکوەزیرێن ھەرێما کوردستانێ شەڤا حەفتێ ڤێ مەهێ پێشوازی ل مارکۆ کارنیلۆس بالیۆزێ ئیتالیا ل ئیراقێ کر، کو ب مەبەستا داوی ھاتنا ئەرکێن خوە ل ئیراقێ سەرەدانا ھەرێما کوردستانێ کربوو، د وێ ھەڤدیتنێ دا بالیۆزێ ئیتالییا داخواز کر پەیوەندیێن ھەرێما کوردستانێ و ئیتالیا بەرەڤ پێش بچن.
نێچیرڤان بارزانی و کارنیلۆسی بەحس ل چارەکرنا کێشەیێن نھا کر و گۆت: پێدڤییە ب رێیا دانوستاندنان کێشە د ناڤبەرا ھەولێر و بەغدایێ دا بھێن چارەکرن و جڤاکا نێڤدەولەتی و نەتەوەیێن ئێکگرتی ژی رۆلێ خوە تێدا ببینن.
هەر ل رۆژا حەفتێ ڤێ مەهێ نێچیرڤان بارزانی سه‌رۆك وه‌زیرێن هه‌رێما كوردستانێ پێشوازی ل یان كۆبیچ، هنارتیێ تایبه‌تێ نه‌ته‌وه‌یێن ئێكگرتی بۆ كاروبارێن ئیراقێ كر و هه‌ردو ئالییان، گرژی و ئالۆزیێن ناڤبه‌را هه‌ولێر و به‌غدایێ و رێكێن چاره‌كرنا وان ئالۆزییان گۆتوبێژ كرن.
نێچیرڤان بارزانی و یان كۆبیجى دوپاتی ل پێدڤییا ب داوی ئینانا ئالۆزییان ل ده‌ڤه‌رێن كوردستانی كر و دوپاتى ل ده‌ستپێكرنا دیالۆگه‌كا جددی كر، هه‌ڤده‌م جڤاكا نێڤده‌وله‌تی ژی زه‌مینه‌سازیێ بۆ وێ دیالۆگێ بكه‌ت.
ژ ئالیێ خوه‌ڤه‌ نێچیرڤان بارزانی، دوپات كر كو دیالۆگ رێچاره‌یا ئێكانه‌یه‌، به‌رهه‌ڤییا حكومه‌تا هه‌رێمێ ژی بۆ ده‌ستپێكرنا گۆتوبێژان ژبۆ چاره‌یا گرفتێن دگه‌ل به‌غدایێ دیاركر.
ئەڤە وێ یەکێ رادگەهینیت کو نێچیرڤان بارزانی ب رژدی چارەکرنا رەوشا نها یا کوردستانێ خستیە د ستۆیێ خوە دا و رێ نادەت بەرژەوەندیێن هەرێمێ روبرووی چ زیانان ببن.
ئەمریکا ژی ب گرنگی رۆلێ نیچیرڤان بارزانی ل دەڤەرێ د بینیت و هێزەر ناوریت، پەیڤدارا وەزارەتا دەرڤە یا ئەمریکا د پرێسکۆنفرانسەکێ دا گۆتییە: ئارامی ل دەڤەرێن کو بەری نها شەر تێدا پەیدابوویە و بالیۆزێ ئەمریکا ل ئیراقێ د چەند رۆژێن بۆری دا د گەل نێچیرڤان بارزانی، سەرۆکوەزیرێن هەرێما کوردستانێ کومبوویە و ئەو ئارامی دەرئەنجامێ کۆمبوونا وان بوو.
داوی گۆتارا سەرۆکوەزیرێن هەرێمێ ژی دوپات کر کو نێچیرڤان بارزانی تنێ بەرژەوەندیێن هەرێمێ و وەلاتیێن هەرێمێ خستینە بەرچاڤ و بەرهەڤییا خوە ژ بۆ دانوستاندنێن د ناڤبەرا هەرێم و ئیراقێ دا دیار کرییە کو تنێ دانوستاندن دێ ئالۆزییان جارە کەن.

مومن سالم