گوتارا نێچیرڤان بارزانى پشتى داوى كۆمبووتا جڤاتا وه‌زیران هیچ به‌هانه‌یه‌ك ژ بۆ به‌رده‌وامیدان ب پلانێن حكومه‌تا هه‌رێمێ نه‌هێلا، چونكى ب به‌ر‌هه‌ڤیێن حكومه‌تا هه‌رێمێ و سه‌رۆكێ جڤاتا وه‌زیران بخوه هه‌موو رێكه‌ك ل هه‌مبه‌ر غرورا حكومه‌تا ئیراقێ گرت ژبۆ دژایه‌تییكرنا گه‌لێ كوردستانێ، كۆنگرا رۆژنامه‌ڤانییا نێچیرڤان بارزانى نه ب تنێ ژ بۆ به‌غدایێ ئاراسته كرى بوو، به‌لكو وه‌لاتێن زلهێزێن جیهانێ و وه‌لاتێن ئیقلیمى ژى پشتى ڤێ كۆنگرا رۆژنامه‌ڤانیێ ئیدى نكارن تلێ گومان و تاوانباریێ ئاراسته‌ى حكومه‌تا هه‌رێمێ بكه‌ن، ژ به‌ركو نها حكومه‌تا هه‌رێمێ به‌رهه‌ڤه هه‌موو وان داخوازێێن ئابوورى یێن عه‌بادى ب جهـ بینیت، لێ ل هه‌مبه‌رى ڤێ یه‌كێ دڤێت به‌غدا ل دووڤ ده‌ستورێ ئیراقێ مافێ خه‌لكێ كوردستانێ بده‌ت، ل ڤێرێ به‌غدا تووشى شه‌رمه‌زاریێ دبیت چونكى عه‌بادى ب هنده‌ك ماده‌یێن ده‌ستورى ئه‌و شه‌رعییه‌ت دایه خوه هێرشی ده‌ڤه‌رێن كوردستانیێن ده‌رڤه‌ى ئیداره‌یا هه‌رێمێ بكه‌ت، بارزانیێ سه‌رۆك وه‌زیر ژى ب هه‌مان ده‌ستور داخوازا بجهـ ئینانا وان برگه‌یان ژى دكه‌ت كو گرێداى هه‌رێما كوردستانێ یه، ژ هه‌موویان گرنگتر ژى پشكا هه‌رێمێ ژ بودجه‌یا ئیراقێ كو به‌غدا بێ هه‌رێما كوردستانێ پشكا هه‌رێمێ ژ 17% بۆ 12.67% كێمكریه، ڤێ یه‌كێ ژى دێ كارڤه‌دانێن ناڤخوه و ده‌رڤه دروست كه‌ت كو ب ئاشكه‌رایى مافێ خه‌لكێ كوردستانێ دهێته بنپێكرن، هه‌ر پشتى ڤێ بریارا حكومه‌تا ئیراقێ و كێمكرنا بودجه‌ى، توركیا راگه‌هاند دڤێت حكومه‌تا ئیراقێ 17% پشكا هه‌رێمێ بده‌ت و ب یه‌كێ ئه‌و دێ هاركیاربن ده‌ریێن سنورى و داهاتێ په‌ترۆلێ بده‌نه ده‌ستێ به‌غدایێ. هه‌روه‌سا ژبۆ ئێكرێزیا ناڤمالا كوردى ژى سه‌رۆكێ جڤاتا وه‌زیران خوه‌دان په‌یامێن گرنگ بوو و بێ هیچ گومانه‌ك دێ ژ ئالیێ لایه‌نێن سیاسیێن كوردستانێ هێته پێشوازیكرن، ب تایبه‌ت كو حه‌زا خوه بۆ ڤه‌گه‌ریانا وه‌زیرێن بزاڤا گۆران دیاركرى، چونكى ئه‌ڤه گۆتنێن بارزانیێ سه‌رۆك وه‌زیر دده‌مه‌كى دایه كو سزایێن حكومه‌تا ئیراقێ ژ بۆ دوورپێچكرن و برسیكرنا هه‌رێما كوردستانێ؛ نه ب تنێ دبیاڤێ ئابوورى ئاریشه ژ بۆ حكومه‌تا كوردستانێ دروستكریه، به‌لكو ئه‌ڤ هێرشێن ڤێ داویێ و زوو خوه ڤه‌كێشان ل هنده‌ك ده‌ڤه‌ران ب تایبه‌ت ل كه‌ركووكێ ئالیێن سیاسیێن كوردستانێ بۆ ناڤا په‌یوه‌ندیه‌كا ئالۆز برن، پشتى داوى ناما مه‌سعود بارزانى وه‌كو سه‌رۆكێ هه‌رێمێ، ئیدى نها نێچیرڤان بارزانى سه‌رۆكێ جڤاتا وه‌زیران، ب ده‌سته‌لاتێن خوه‌یێن سه‌رۆكاتییا جڤاتێ و دیسان یێن سه‌رۆكێ هه‌رێمێ دوو ئه‌ركان ب رێڤه دبه‌ت، ئه‌وێ گه‌له‌ك جهێ ئاماژێ، نها سه‌رۆكێ حكومه‌تا هه‌رێمێ مانۆره‌ك بۆ ده‌ف ئالیێن سیاسى یێن كوردستانێ ده‌ستپێكریه، به‌ریا هه‌موو ئالییان ژى سه‌ره‌دانا ئه‌میندارێ گشتیێ كۆمه‌لا ئیسلامى كربوو، چاڤه‌رێ دهێـته كرن ره‌وشا نها و چه‌وانییا سه‌ره‌ده‌ریكرن ل گه‌ل به‌غدایێ و هه‌بوونا شانده‌كێ بهێز بۆ گه‌نگه‌شه‌كرن ل گه‌ل حكومه‌تا ئیراقێ سه‌ره‌دانا هه‌موو پارتێن سیاسێن كوردستانێ بكه‌ت، ل ڤێرێ نێچیرڤان بارزانى ب مانۆرێن خوه‌یێن ناڤخوه‌یى دێ ئێك ده‌نگییه‌كێ دروست كه‌ت و هه‌ڤده‌م ژ بۆ رێكه‌فتن دگه‌ل به‌غدایێ دێ هه‌موو پارتێن سیاسیێن كوردستانێ پشكدارى وێ شاندێ كه‌ت، پشكداربوونا هه‌موو پارتیێن سیاسیێن كوردستانێ د شاندا گه‌نگه‌شه‌یا ل گه‌ل به‌غدایێ، ژبلى ئێك ده‌نگى و ئێكرێزیێ دروست دكه‌ت، دێ ئه‌و سه‌ره‌دان هێزه‌كا دى بخوه‌ڤه بینیت، چونكى گه‌نگه‌شه‌یێن ڤێ جارێ دگه‌ل به‌غدایێ ئێكلاكه‌رن و وه‌لاتێن زلهێزێن جیهانێ، ژى به‌رهه‌ڤییا خوه نیشان داینه چاڤدێریا دانوستاندنێن هه‌ولێر و به‌غدایێ بكه‌ن. د هه‌مان ده‌م دا ل سه‌ر ئاستێ نێڤده‌وله‌تى و وه‌لاتێن ئیقلیمى ژى، پێشبینى دهێته كرن نێچیرڤان بازرانى به‌رده‌وامیێ ب مانۆرا خوه‌یا سیاسی و خورتكرنا په‌یوه‌ندیێن ئابۆرى و دۆستایه‌تى ل گه‌ل هنده‌ك وه‌لاتێن ده‌ردۆر بده‌ت، بۆ ڤێ یه‌كێ ژى ل ڤان نیزیكان سه‌رۆكێ جڤاتا وه‌زیرێن هه‌رێما كوردستانێ دێ سه‌ره‌دانا توركیا، له‌ورا ئه‌ڤ مانۆرێن سه‌رۆكێ جڤاتا وه‌زیران دێ ئێكلاكه‌ربن.
کارزان فەقێ
