ده‌ستهه‌لاتێن نوو
کارزان فەقێ
1- جاردانا بارێ نه ئاسایی.
2- په‌سه‌ندكرنا فه‌رمانا ب دارڤه‌كرنێ.
3- دانا پله‌یا سه‌ربازى ب ئه‌فسه‌رێن هێزێن چه‌كدارێن هه‌رێمێ و ئاسایشێ و خانه‌نشینكرنا وان.
4- ره‌وانه‌كرنا هێزێن پێشمه‌رگه‌ى بۆ ده‌رڤه ب رازیبوونا په‌رله‌مانى.
5- ل ده‌مێ هه‌لوه‌شاندنا په‌رله‌مانى یان ب دووماهى هاتنا ده‌مێ وێ، حكومه‌ت دێ داخوازا هه‌لبژارتنا كه‌ت و دێ داخوازنامه ژى ئاراسته‌ى كۆمیسیۆنێ كه‌ت.
6- لێبۆرینا تایبه‌ت كو ب یاساى هاتبیته په‌سه‌ندكرن.
7- دامه‌زراندنا خوه‌دان پله‌یێن تایبه‌ت ل سه‌ر پێشنیازا وه‌زاره‌تان.
8- دانا مه‌دالیا ل دووڤ یاساى.
9- ل ده‌مێ ره‌وشا ناله‌بار كو په‌رله‌مانێ كوردستانێ شیانا روونشتنێ نه‌بیت، سه‌رۆكێ جڤاتا وه‌زیران دێ ل گه‌ل سه‌رۆكێ په‌رله‌مانى كۆمبیت و دێ ب پرس و راوێژ كۆمه‌كا بریاران ده‌ركه‌ن
نه‌هـ خالێن ل سه‌رى، نه‌هـ ده‌سته‌لاتن و هه‌تا هه‌لبژارتنێن بهێت دێ ده‌سته‌لاتێن جڤاتا وه‌زیران بیت، ئه‌رێ حكومه‌تا هه‌رێما ب زێده‌بوونا ده‌سته‌لاتێن وى، دێ ب هێزتر بیت یان دێ كه‌ڤیته بن باره‌كێ گرانتر؟ ئه‌ڤه پرسیاره‌كه و دده‌مه‌كى دا دهێتـه كرن كو كوردستان د روویێ ئێمناهى و ئابوورى و سیاسى د ره‌وشه‌كا ناله‌بار دا ده‌رباز دبیت، ب ڤێ یه‌كێ ژى ژبلى ئه‌ركێ ئیداره‌كرن و خزمه‌تكرنا خه‌لكێ كوردستان و به‌رده‌وامیدان ب پلانێن رزگاربوون ژ قه‌یرانا دارایی و ئاریشه‌یێن ئابووری و په‌ترۆلگه‌هێن هه‌رێمێ دناڤبه‌را هه‌ولێر و به‌غدا، ئیدى ره‌نگه حكومه‌ت ب 9 ده‌سته‌لاتێن نوو بكاریت هه‌م د روویێ ناڤخوه و ب هه‌ماهه‌نگى ل گه‌ل په‌رله‌مانێ كوردستانێ باشتر بچیته دناڤا كوراتییا وان ئاریشه‌یێن نها ژ بۆ هه‌رێما كوردستانێ دروست بووىن، ئه‌وێ گرنگه د ڤێ قوناغێ بهێته كرن، ئه‌وه حكومه‌تا هه‌رێمێ فۆكسا خوه پتر ب دانیته سه‌ر چاره‌كرنا ئاریشه‌یێن دارایێ یێن هه‌رێمێ، بێگومان نها حكومه‌تا هه‌رێمێ پێدڤى ب روونشتن ل گه‌ل به‌غدایێ هه‌یه و سه‌رۆكێ جڤاتا وه‌زیران ژى ب خه‌باتا خوه‌یا به‌ریا نها شیایه ئه‌و باوه‌رى بۆ ئه‌مریكا و بریتانیا دروست بكه‌ت كو ل داوى په‌یاما خوه ده‌رباره‌ى سه‌رۆكێ حكومه‌تا هه‌رێمێ راگه‌هاندینه: ئه‌و ب گه‌شبینیڤه دێ ل گه‌ل نێچیرڤان بارزانى كاركه‌ن، بۆ ڤێ یه‌كێ ژ به‌غدا خواستینه ل گه‌ل نێچیرڤان بارزانى كۆمبیت، ره‌نگه ئه‌ڤه بخوه ئێك ژ وان ئاماژه‌یان بیت كو ئیدى ره‌وش هه‌ر ب ڤى ئاوایی نابیت و دانوستانێن بهێت یێن ناڤبه‌را ئیراقێ و هه‌رێما كوردستانێ دێ ل سه‌ر بنه‌مایێ ده‌ستورى بن، ب جێبجێكرنا ده‌ستورى ژى دێ مفادارێ ئێكێ خه‌لكێ كوردستانێ و حكومه‌تا وێ بن، ژبه‌ركو ئه‌و ره‌وشا ل سالا 2014 ل هه‌رێمێ دروست بووى دێ ب داوى هێت، بێگومان بنپێكرنا وى ده‌ستورى بوو كو سه‌ركردایه‌تیا كوردى نه‌چار كرى به‌ره‌ف ریفراندۆمێ پێنگاڤان ب هاڤێت، لێ ئه‌و خالا نها دێ ئه‌ركێ حكومه‌تا هه‌رێما كوردستانێ ب ساناهى كه‌ت ئه‌وه كو وه‌لاتێن زلهێزێن وه‌كو بریتانیا و ئه‌مریكا و فه‌ره‌نسا پێشوازى ژ په‌یاما سێ خالیا حكومه‌تا هه‌رێمێ بۆ ده‌نوستاندنان كرینه، ب ڤێ یه‌كێ ژى شاندا هه‌رێمێ دێ ب هێزتر بیت ده‌ما سه‌ره‌دانا به‌غدایێ دكه‌ت، له‌ورا سه‌رۆكێ جڤاتا وه‌زیران بخوه ژى دێ كاراكته‌رێ سه‌ره‌كى یێ دانوستانێن ناڤبه‌را هه‌ولێر و به‌غدایێ بیت. ل ڤێرێ دبێژم ب سه‌ركه‌فتنا دانوستانێن هه‌ردوو ئالییان و ب ئه‌گه‌رێ چێبوونا هه‌ر رێكه‌فتنه‌كێ ل سه‌ر پرسێن ئابوورى و بۆدجه و موچه‌یێن كوردستانێ، ئیدى ئه‌و باوه‌ریا دناڤبه‌را حكومه‌ت و وه‌لاتیان دا كو پێشتر گومان ل سه‌ر هه‌بوو، دێ ب هێزتر ڤه‌گه‌ریت و ده‌سته‌لاتێن نوویێن جڤاتا وه‌زیران ژى ئه‌گه‌ر ئه‌ركێ ڤێ كابینه‌یێ گرانتر ژى بكه‌ت، لێ دێ سه‌نگێ وێ هه‌م ل هه‌مبه‌رى به‌غدا و هه‌م ژى ل سه‌ر ئاستێ ناڤخوه و نێڤ ده‌وله‌تى دێ گرانتر لێكه‌ت
