ئەڤ کاودانێن کو نھا کوردستان تێدا کەس ھیڤیا پێ ناخازیت و ل دیروکێ دا جار و باران دووبارە دبیت, لێ ئەو جارا ریدان ب ڤی شێوازی دووبارە دبن ئەو دەمن کو گەلێ کورد ل خەونا نیزیک بویە. ئەگەر ھەفکێشێ ل عیراقێ بو ھەفسی و وەلاتێن نێڤدەولەتی روون بکەین . دێ بینن کو عیراقەک بو بەرژەوەندیێن برێتانیا دروست بویە ل سالا ١٩٢١ ھەتا ئیرو شیعە و سوننە نەبەس ل ڤان ھەشتێ سالان دا دوژمنن , بەلکی دوژمنێن ھزار و چوار سەد سالی نە و ھەتا روژ ل روژ ئاڤایێ د ھەلێت ئەڤ خویندارییە ھەر دێ مینیت.دوژمناتی و دژایەتیا کورد و کوردستانێ شیعە و سوننە و دگەل تورکمان ب مەزھەبێن خوەڤە ل بن رەشمالەکێ کومکرینە و ل ڤی ھوکاریی خوە مروڤاتیی ژی وان کومناکەت.
وەلاتێن دەڤەرێ تایبەت تورکیا و ئیران کو ل چەرخێن ناڤین وەرە ھەڤرکی و ئالوزی و دوژمناتی ل گەل ئێک ھەنە و دەھان شەرێن خوینا وی ژی ل دژی ھەڤدوو کرینە , ئەڤرو دوژمناتیا کوردان ئەو ھەردوو وەلات ژی کومکرینە و ل سەر ئێک مێز دانوستانێ دکەن.
دەمێ کوردان خوە ژ چیایا دای و ب تاکە دوست ھژمارتی ل بوشاییەکێ نەھاتیە , ل ڤان کاودانێن شازدێ ئوکتوبەرێ و دیڤدا و ئەو ھێرشا حەشدا شەعبی بو سەر کوردستانێ , چ وەلاتەک ب وی شێوازی نە ئاخفت کو ژ ئالیێ سیاسی و دبلوماسی و ھەتا ل دانوستاندنان ژی بێتە وەبەرھێنان بەرامبەر عیراقا تائیفی و مەزھەبی .بەلێ ریدان د لەزن و نھا شەرق و غەرب گرنگی و پێگەھێ کوردستانێ بەرامبەر وەحشیگەریا ڤان ھێزان نزانن.و دەمەک نیزیک بەرسڤا ھەمی ئالیان ژ کارێن وان دێ دەرکەڤیت.
وێنە یێ دیارە و چ نافخو و چ ھەفسی و نێڤدەولەتی ل بەرژەوەندیا مە دانینە و ھەمی دووژمن ل دژی مە بوینە ئێک و ھەتا نھا پرانیا ئالیێن کوردستانی ل جھێ ژێک کومبونێ کو ھەمی جیھانی چ تان بیت و چ سیاسەت داخاز دکەن کورد ئێک رێز بن.
لێرە دا پرسیار ئەوە کو دوو نەتەوە و مەزھەب و دەولەتێن جودا ژێک دوورن , یان دوو و سێ حزبێن کوردی کو ل سەر ھندەک میکانیزیمان ل گەل ئێک نینە؟ لێرەدا ئەگەر ل ئەلیف و بایێن سیاسی تنێ بزانین کو حزب ئالەڤەکە بو پاراستن و خزمەتکرن و پێشڤەبرنا وەلاتی ل پێشبرکێ یە کا سیاسی و ھەلبژارتنان دا بو گەھشتن ب دەسەلاتێ.
لێرە دا فەرە ب پرسین نھا چ فەرە بکەین ؟ دیتنا من ژ یامایی بگەرێین , باشترین چارەسەرە.ژ بەرکو ھەرچی چێ بو چو و بویە پشکەک نەبیرکری ل دیروکێ دا و دێ ئێتە نڤیسین و ھەر کەسەک ل دادگەھا دیروکێ دێ مفایێ خوەیێ دروست وەرگریت.نابیت بەس کارێ مە ھەلکولینا برینان بیت و فەرە ئەڤ ریدانە ببنە عیبرەت بو مە و وانا بو دیروکێ ژێ وەربگرین .
ب ژ دەست دانا یا چویی و مانەڤا ئەوا مایی , تاکێ کورد دکەڤیتە ناڤبەرا دوو بژاردەیان , ئەرێ چ بکەین ؟ لێرەدا فەرە ژ بیرا ھەر کوردەکێ بیت کو ئەڤ ریدانە ھندی دمەزن بن و کارەسات باربن ل سالا ١٩٧٥ مەزنتر نین و ل سالەکێ پشت دا کورد بونەف ھێزەک کاریگەر. ژیامایی بگەرێن داکو ژ نافنەچیت فەرە ببیتە شیعارەک بوھندێ ب سیاسەتەک و نەفەسەک و کارەک نوی و جدی ڤە پێکولا ڤەگەراندنا یا چوی بکەین. کو بدیتنا من فەرە ڤان پێنگاڤان پاڤێژین :
• ھەر پارتەکا سیاسی ژ ئالیێ خوە ڤە کار بکەت کو باوەریێ بو خو کادرێ خوە بزڤرینیت.
• ھەولدانا ھەمی پارتێن سیاسی ل کوردستانێ کو ل گەل ئێک کومببن و زێدەتر نەھێلن ناڤ مالا کوردی تێک بچیت .
• ئەڤ راگەھاندنێن کو ھەوێن شەری دناڤ خەلکی دا بلاڤ دکەن , فەرە ھەست ب بەرپرسیاریێ بکەن و وەلات ببیتە ھێلا سور بو ھەمی ئالیەکێ .
• ھەمی ئالیێن سیاسی فەرە بێ جوداھی ھاریکاریا حکومەتا ھەرێما کوردستانێ بکەن ب سەروکاتیا بەرێز نێچیرڤان بارزنی تایبەت پشتی زێدەبونا دەسەلاتێن وی کو ل شیان دا ھەیە بەلانسێ بزڤرینیت و پەیوەندیان ل گەل دەرڤە بزڤرینیت و نافخو ل گەل ئێک ھەتا رادەکێ ئاشت بکەت.
• فەرە حکومەتا ھەرێما کوردستانێ ب نەفەسەک و دیتنەک جودا کار بکەت و ھەمی پێکولان بکەت کو پروسا چاکسازی و پاکسازی و دەولەتداری سەربگریت و ئەو پرێسگرێکن رێکا پێشکەفتنا کوردستانێ دا لابدەت . ژ بەرکو خەلک ئیدی ل ژیانەک خوەش و ئارام دگەرێت و ل گەندەلی و نەدادیێ تورەیە.
ل داویێ فەرە ھەر تاکەکێ کورد باوەری ب ھندێ ھەبیت کو ئەڤ کاودانە نە د سروشتی نە و زیترین دەم دێ دەرباز بن ھەر چەندە زیانەک مەزن ھێلانە , ب چ ئاوایی نابیتە ئەگەرێ بێ ھیڤی بونا کوردان ل خەونا دروستکرنا دەولەتەکا سەربەخو. لەوما فەرە پارتی و ئێکەتی ل ئاستێ بەرپرسیاریێ بن و رێکێ نەدەن ئەوا مایی ژی ب سیاسەتا عاتیفی یا چەند ئەندم و کادرێن خوە ژ دەست بدەن.فەرە وەک دوو ئالیێن دەسەلاتدار کار ل سەر سەرئێخستنا حکومەتا ھەرێما کوردستانێ بکەن.