ھەرچەندە ب درێژاھیا دیروکا بزاڤا رزگاریخوازا کوردستانی ، لسەر خەبات قوربانیدانێ بۆ گەھشتن ب ماف و ئارمانجێن نەتەوی و نشتیمانی ، دۆژمن و نەیاران نە شیایە ڕوو ب ڕوو ئاگرێ شۆرەش و بزاڤێن کوردستانی ڤەمرینن و ھەردەمی گەلێ کورد شیایە سەرکەفتنا تۆمار بکەت ، لێ ب مخابنی ڤە ھەردەم کوردێن خۆ فرۆش و نووکەرێن دۆژمنا ھەبوونە و بۆ بەرژەوەندێن ماددی یان دەسکەفتێن حزبی دژی گەلێ خۆ راوەستن . ژبلی ڤێ چەندێ ھندەک جاران بەرژەوەندێن وەلاتان دگەل دۆژمنێن کوردان بوونە ، وەک رێکەفتنا رەوشا ئەلجەزائیر سالا ١٩٧٥ .
نھو ژی پشتی بیست و پێنج سالێن ئازادیا ھەرێما کوردستانێ و ھەبوونا سەرۆکاتی و پەرلەمان و حکومەت و سازیێن دیتر ل باشوورێ کوردستانێ . دەسھەلاتا شیعەگەریا بەغدا کۆ بووینە داردەست و جێبجێکارێن ئەجندار و پیلانێن رژێما ئیرانێ .
ڤێ حکومەتا تائیفیا عیراقێ سەرپێچیێن دەستووری کرن و ب ھەمی رەنگا دژایەیتا ھەرێما کوردیستانێ کری , ژلایێ سیاسی و ئیداری و دارایی و لەشکری ، کورد نەچار بوون ب راپرسیەکا دیموکراسی و ئاشتیانە بەرەڤ دیارکرنا مافێ چارەنڤیس بچن و ل ٢٥ ێ ئیلۆنا ٢٠١٧ خەلکێ کوردستانێ ب پرانی و ب رێژەیا زێدەتر ل ٩٢ % دەنگ ب بەلێ دای حکومەتا عیراقێ و وەلاتێن تورکیا و ئیرانێ دلتەنگ و نەرحەت کرین . جارەکا دی ڤان وەلاتان پەنا برە بەر پیلانێن ھەرێمی و ئەو سەرکەفتنێن پێشمەرگەھێ کوردستانێ بسەر مەزنترین گرۆپێ تیرۆرستیێ جیھانی / داعش کۆ بووینە ئەگەر عیراق و دەڤەرا رۆژھەتا ناڤین لڤی گرۆپێ تیرۆرستی بھێتە پاراستن ژبیر کرن ، ب خیانەتا نافخۆیی دگەل ژمارەکا سەرکردێن ئێکەتیا نشتیمانی کوردستانی بتایبەت بنەمالا جەلال تالەبانی بۆ داگیرکرنا کوردستانێ و رادەستکرنەڤا دەڤەرێن گرنگێن کوردستانێ وەک کورکووکێ ب ھێزێن حەشدا شیعیا ئیرانی .
ھەرچەندی بەری ڤێ خیانەتێ ڤان خیانەتکارا سەرڤە رێکەفتن دگەل سەرۆکێ ھەرێمێ و پارتی دیموکراتی کوردستانی ھەربوو بۆ داکۆکیکرن لسەر ئەنجامێن راپرسیێ و مافێن ڕەوا یێن خەلکێ کوردستانێ ، لێ ب مخابنی ڤە بۆ بەرژەوەندێن مادی و دەسکەفتێن کەسایەتی بوونە داردەستێن ئیرانێ و حەشدا شیعی بۆ داگیرکرنا کەرکووکا کوردستانی و ب پیلان ئاخا پیرۆزا کوردستانێ رادەستی دوژمنا کر و خوینا ھزارەھا شەرھیدان ب ھەدەر دا . ژبلی کو خیانەت ل سەرۆکاتی و حکومەتا کوردستانێ و خەلکێ کوردستانێ کر ، خیانەت ل خەبات و رێبازا رەحمەتی مام جەلالی ژمارەکا سەرکردێن خۆ کر و ھەولا گرتن و شەھیدکرنا ڤان سەرکردێن خۆ کر ئەوێن خیانەتا وان ڕەت دکر . ئەڤ پیلان و خیانەتا وان گەھشتەڤ خیانەتێن وان یێن نشتیمانی یێن بەری چەندین سالان . دڤێرەدا دیار دبیت ئەڤ خیانەتکارە پەروەردەکارێن بەردەستێن خیانەتکاریآ نە ، ھەر دەمێ دەلیڤە بۆ ھەلکەڤیت کورد و کوردستانێ دێ کەنە قوربانی بەرژەوەندێن تایبەت . دڤێ خیانەتا واندا دیار دبیت ڤێ گرۆپێ ب ھێزا دارایی و لەشکری ئێکەتی نشتیمانی کوردستان داگیر کریە و ھەولەک بوو بۆ دووبارەبوونەڤا شەرێ نافخۆیی و دوو ئیدارەکرنەڤا ھەرێما کوردستانێ و ئەڤ خیانەتە بوویە ئەگەرێ زڤراندنەڤا دەڤەرێن کوردستانی یێن دەرڤەی ئیدارا ھەرێما کوردستانێ کو ب خوینا ھزارەھان شەھیدان دگەل تیرۆرستێن داعش ھاتینە رزگارکرن بۆ بن دەسھەلاتا شیعەگەریا عیراقێ بزڤرن و رێخوشکەرن بۆ بجە ئینانا ھیلالا شیعەگەریا ئیرانێ ل دەڤەرێ . ھەرچەندە ئەڤە پیلانەکا مەزن و دارشتی یە دژی دەسھەلاتا کوردستانێ ژلایێ عیراق و ئیرانێ و رەزامەندیا تورکیا ، لێ جھێ حیبەتیآ یە دڤی سەردەمێ دیموکراسی و رەوشەنبیری و مافێ مرۆڤ دا ، کەسانێن خۆ ب سەرکردێن کورد بزانن ڤێ خیانەتا مەزن دگەل خەلکێ خۆ بکەن و ببنە داردەستێن دۆژمنان . ژلایەکێ دی ئەڤ ھەولا ڤان خیانەتکارا بۆ دووبارەبوونەڤا شەرێ ناڤخۆیی و دوو ئیدارەکرنا کوردستانێ ، لێ جھێ دلخوشیێ یە پارتی دیموکراتی کوردستان ب ھەستیاری سەرەدەری دگەل کر و رێ نەدا ھیڤیێن وان بجە بھێن . پشتی ڤێ پلانێ پێتڤی یە خەلکێ کوردستانێ خۆ بێ ئۆمێد نەکەت و ئەڤ پیلانە ل پیلانێن بەرێ مەزنتر نینە و ئەز باوەرم ببورینا دەمەکێ کورت رەوش دێ د قازانجێ خەلکێ کوردستانێ دا بیت و سەرۆک بارزانی خودان پلان و بەرنامێن نشتیمانی و نەتەوی یە و دبلوماسیەکا بھێز ھەیە ، چەوا ب بەرنامێ وی گەلێ کوردستانێ ل بەرتەنگیێن بەرێ رزگار کر و بەرەڤ ئاسۆیێن گەش برن ، رۆژێن داھاتی ژی دێ دگەش و بریسقەداربن و خۆفرۆش و داردەستێن دۆژمنا دێ روو رەش و شەرمرزار بن .