ھەر د کەڤندا دەربرین و شێوازێ جڤاکێ کوردستانێ یێ ڤەکری و ئاشتەوایی بوویە دناڤخۆ و دەرڤە ، ئەگەر خاندنێ ل دوور جڤاکێ کوردستانێ بکەین سەرەرای پێکھاتا بەرفرەە ژلایێ ئەتنی و نەتەوی و ئایینی و مەزھەبی ژبلی راسگۆیی و نەرم و نیانیێ و پێکڤە ژیانێ چ روویێن دیتر تێدا نابینین ، بەرۆڤاژی دەڤەرێن دیتر یێن عیراقێ .
ئەگەر خەلکەک سەرھەلدان و شۆرەشێن کوردی دژی رژێمێن شوفینی و رەگەزپەرسیێن عیراقێ ب شەرخاز جڤاکێ کوردستانی بناسیت و ببینت ، ئەڤە خەلەتیەکا ھەرە مەزنە چونکی شۆرەش و شەرێن کوردان دگەل ڤان رژێمان ژبوی نەمانا شەری بوونە ، ھەر وەکی بارزانی نەمر د فەرمۆدەیەکا خۆدا کەرەم کری (ئەم شەری دکەین ژپێخەمەت نەمانا شەری) .
لدیڤ خاندن و تێگەھشتنا من بۆ دیتن و بۆچوونێن رێزدار نێچیرڤان بارزانی سەرۆکێ حکومەتا ھەرێما کوردستانێ د کۆمبوونا وی دگەل یان کۆبیش ھنارتیێ سکرتێرێ گشتی یێ نەتەوەیێن ئێکگری ل عیراقێ دەربرینن ل ناخێ جڤاکێ کوردستانێ .
د تەوەرەکی دا ھاتیە (سەرۆکێ حکومەتا ھەرێما کوردستانێ تەکەزیێ ل ھەلویستێ حکومەتا ھەرێما کوردستانێ دکەت و ب رێکێن دیالۆگێ ئاریشێن ناڤبەرا ھەولێر و بەغدا بھێنە چارەسەرکرن) ئەڤ ھەلویستێ جەنابێ سەرۆکێ حکومەتێ و حکومەتێ ب گشتی دەربرینا جڤاکێ کوردستانێ ب گشتی و بانگەوازە بۆ جیھانێ و جڤاکێن نیڤ دەولەتی کو جڤاکێ کوردستانێ و سەرکردایەتیا دێ دئاشتی خازن و برێکێن ئاشتی و دیموکراسی و یاسا و پرنسیپێن مافێ مرۆڤ و سازیێن نیڤ دەولەتی داخازا مافێ خۆ یێ رەوا دکەت و ئەڤەژی باشترین رێکە و وەلات و رێکخراوێن نیڤ دەولەتی دێ پێشوازیێ لێ کەن و رێکەکە سەردەمە ، دیروکا جڤاکێ کوردستانێ ژی بڤی رەنگی بوویە .
پێشوازی و سەرەدەریا خەلک و دەسھەلاتا کوردستانێ ل نێزیک دوو ملیونا ئاوارە و پەنابەرێن دەڤەرێن دیترێن عیراقێ پشتی شەرێ تیرۆرسیێ داعش بەلگەیە لسەر ڤێ چەندێ و جیھان پێ حیبەتی کر .
دەربارەی کارڤەدانێن وەلاتێن جیران و جڤاکێ نیڤ دەولەتی پشتی راپرسیا سەرخۆبوونا کوردستانێ ، سەرۆکێ حکومەتێ دیارکریە ، ئەڤ گاڤە بھیچ رەنگەکی ھەرەشە نیە لسەر چ وەلاتان ، بەلکی فاکتەرێ سەقامگیریەکا زێدەترە ل دەڤەرێ چونکی ھەردەم ھەرێما کوردستانێ فاکتەرێ سەقامگیریێ بوویە و ھەر دێ ھوسا ژی مینیت و دەستێ ئاشتیێ بۆ جیرانا درێ ژکریە ، ئەزموونا بیست و پێج سالیا حوکمرانیا ھەرێما کوردستانێ د گەل جیرانان ئەڤ چەندە سەلماندی ییە ئەڤەژی ڕەوشتێ جڤاکێ کوردستانێ کو ھەردەم رێز ل جیرانا گرتیە و پاراستن ل مال و سەروەتێ وان کریە و ھەتا نھو ژی ھەرێما کوردستانێ رێز ل وەلاتێن جیران گرتیە و دڤێ ئەزمۆنا کوردستانێ ئەو د مفادار بوونە و بێ گۆمان ب دەولەتبوونا کوردستانێ ژی ئەڤ دووستایەتیە دێ باشتر بیت و مفایێن زۆر بۆ ھەردوو لایان دێ ھەبن .
لەوما گرنگە جڤاکێ نیڤ دەولەتی و وەلاتێن دەورو بەر و عیراق رێزێ ل ئیرادا خەلکێ کوردستانێ بگریت چونکی وەکی جڤاک جڤاکەکێ ساخلەم و مرۆڤ دووستە و وەکی سەرکردایەتی ژی د شارەزا و لێ ھاتی نە و ھەلگرێن پەیامەکا پیرۆزا مرۆڤ دۆستیا جڤاکێ کوردستانێ نە و حکومەتا ھەرێما کوردستانێ لدیڤ ڤان پرنسیپان سەرەدەری کریە و دێ کەت و ئەز باوەرم ب بوورینا دەمەکێ کێم ئەڤ راستیە بۆ جیھانێ و وەلاتێن ھەرێمی دێ ئاشکرابیت و وان دێ رێز بۆ ئیرادا خەلکێ کوردستانێ و سەرکردایەتیا وێ ھەبن .