راستە بۆ ھەر کارەکی پێتڤی ب شیانا ھەیە ، لێ ئەگەر مرۆڤی ئیرادە ھەبیت و باوەری بخۆ ھەبیت ، چ نێزیک یان دوور کارێ مرۆڤی دێ بەرھەمدار بیت ، گەلێ کورد ژی وەک گەلەکێ زیندی و خودان ئیرادە ب شیانێن کێم دەست ب خەبات و شۆرەشان کر ژپێخەمەت ئازادی و رزگاریێ تاکو ل دووماھیێ شیان بسەر دوژمنان بسەر بکەڤن و بەرھەمێ خەبات و شۆرەشان دابین بکەن . ئەگەر باوەری بخۆ ھەبوون و ئیرادە نەبا مەحالبوو شۆرەشێن ئیلۆنا مەزن و گۆلانا پێشکەفتنخواز و سەرھەلدانا پیرۆز ئەنجام نەدبوون ژبەرکۆ شیانێن دۆژمنان یێن ماددی و مەعنەوی دگەل شیانێن گەلێ کورد نەدھاتنە بەراورد کرن ، ھەر وەسا سەرکەفتنا پێشمەرگەھێن کوردستانێ بسەر مەزنترین رێکخراوا تیرۆرستیا داعش ، لێ ژبلی ئیرادێ بۆ ب ئەنجام گەھشتنا شۆرەش و سەرھەلدانان پێتڤی ب سەرکردەکێ بلیمەت و ب جورئەت و دلسۆز ھەیە ، ب خوشحالیڤە ئەڤ شۆرەش و بزاڤا رزگاریخوازیا کوردستانی ب گشتی ب رێنمایی و سەرکردێن کوردێن ھەرە ب ھەلویست و بلیمەت برێڤە چوونە . ئەڤرۆ ژی ھەرێما کوردستانێ پشتی سەرەدەری و رەفتارێن دوور ژ مرۆڤاتی و وەلاتیبوونێ دەولەتا عیراقێ بەرامبەر ھەرێما کوردستانێ ، کورد نەچار کرن راپرسی و سەرخۆبوونێ ھەلبژێرن ، راستە ڤان سالان ئیدارە و سیاسەتا ھەرێما کوردستانێ ب ھەمی بوارانڤە بوویە جھێ رەزامەندیا جڤاکێ نیڤ دەولەتی ، نەخاسمە ژلایێ لەشکری و دیموکراسی و مافێ مرۆڤ ، لێ پرسا راپرسیا سەرخۆبوونا کوردستانێ بریارەکا مەزنە و ب ھەمی سەرکردەو و ملەتان ناھێتە دان نەخاسمە ل دەڤەرەکا وەکی کوردستانێ ژبەرکۆ عیراقێ ژی پەیوەندی دگەل وەلاتان ھەنە و ژمارەکا وەلاتان بەرژەوەندی دگەل عیراقێ ھەنە نەخاسمە وەلاتێن ھەرێمی و جیرانێن عیراقێ ، ژبلی کاریکەریا سەرخۆبوونا باشوورێ کوردستانێ لسەر بەشێن دی یێن کوردستانێ ، لێ سەرەرای نەرازیبوونا دەولەتا عیراقێ و وەلاتەکێ وەکی ئیرانێ و ھندەک ئالیێن سیاسی یێن کوردستانێ یێن بێ ئیرادە و بێ ھەلویستێن نشتیمانی و داخازیا ھندەک وەلاتێن جیھانی بۆ پارشئێخستنێ سەرۆک مەسعود بارزانی لسەر ئەنجامدانا راپرسیێ ل دەمێ خۆ یێ رژدە و شیا باوەرێی بۆ پرانیا ئالیێن سیاسی یێن کوردستانێ و پەرلەمانێ کوردستانێ درۆست بکەت کۆ نھو دەمێ سەرخۆبوونا کوردستانێ یە و زەحمەتە دەلیڤەکا وەکی نھو بۆ خەلکێ کوردستانێ بھێتەڤ پێش . ئەڤ داکۆکیا سەرۆک بارزانی لسەر ئەنجامدانا راپرسیێ و گۆھنەدانا وی بۆ چ ھێز و وەلاتان لسەر پاشئێخسنێ نیشانێ بلیمەتی و جورئەتێ و خۆدان ئیرادەیەکا بھێزە و باوەری ھەبوونێ یە بخۆ و گەلێن کوردستانێ ، دیسان دڤان کەرنەڤالێن جەماوەریێ یێن کوردستانێ بۆ پشتەڤانیا راپرسی و سەرخۆبوونا کوردستانێ دیار دبیت پرانیا ھەرە زۆرا خەلکێ کوردستانێ پشتەڤان و ھاریکارێن سەرۆک بارزانی و سەرکردایەتیا سیاسی یا کوردستانێ نە بۆ سەرکەفتنا ڤێ پرۆسی و گەھشتنا خەلکێ کوردستانێ ب مافێن خۆ یێن رەوا و دامەزراندنا دەولەتەکا کوردستانی . ئەز باوەرم ب راگەھاندنا دەولەتا کوردستانی ئەڤ ئیرادە دێ بسەر کەڤیت و باوەریێ بۆ وەلاتێن جیران و جیھانێ درۆست کەت کۆ ھەبوونا دەولەتەکا کوردستانێ دێ بیتە ڤاکتەرێ ئێمناھی و سەقامگیری ل دەڤەرێ و ژلایێ دیموکراسی و مافێ مرۆڤ و پێکھاتێن دیتر ژی دەولەتا کوردستانی دێ بیتە نمۆنەکێ بێ وێنە ل رۆژھەلاتا ناڤین و لدەمەکێ نێزیک لسەر ئاستێ جیھانێ دانپێدان دێ پێ ھێتەکرن ، چونکی د جڤاکەکێ وەکی کوردستانێ کۆ ھەمبێزا ئۆل و مەزھەب و نەتەوێن جودا دکەت ، ماف و ئازادیا وان دێ تێدا ھێنە پاراستن ، دێ بیتە جھێ حیبەتیا جیھانێ . لەوما دبێژینە خەلکێ خۆ ئیرادا خۆ بھێزتر بکەن و پشتەڤانیا سەرۆک بارزانی و سەرکردایەتیا سیاسی یا کوردستانێ بن بۆ سەرکەفتنا پرۆسا راپرسی و سەرخۆبوونا کوردستانێ ، چونکی بحەکیمانە سەرەدەری دگەل رەوشێ کریە و بەری وەخت رێکا سەرخۆبوونا کوردستانێ ھاتیە خۆشکرن و گوھداریا پر و پاکندێن داگیرکەر و دیڤەلانکێن وان نەکەن و ب کەرنەڤال و ب دەنگێن بەلێ لرۆژا (٢٥) ئیلۆنێ بریارا سەرخۆبوونا کوردستانێ ب دەنگێن بەلێ واژوو بکەن .