ده‌وله‌ت دێ ب سه‌ر ڤێ پرێ دا ده‌ربازبیت
کارزان فەقێ
كیژان سیاسه‌ت و كیژان رێك دێ مه به‌ر ب هه‌لاتنا كوردستانێ ڤه به‌ت، مه‌ره‌مامن ده‌وله‌ته، لێ ل ڤێرێ گرنگه ئه‌م بزانن ئه‌و ده‌وله‌تا چاڤه‌رێكرییا كوردستانێ كو نها گهلێ كوردستانێ هه‌موو خه‌ونا پێڤه دبینن و ب هه‌یه‌جان ل به‌ندا وێ رۆژێنه كو ببنه ته‌مامكه‌رێ سیاسیێن خوه و ده‌نگێ ل سه‌ر بده‌ن، ل گه‌ل ڤێ یه‌كێ ژى ده‌نگه‌كێ نه‌شاز هه‌یه كو دبێژیت به‌رهه‌ڤیێن سه‌رخوه‌بوونا كوردستانێ نه‌هاتییه كرن، ئه‌گه‌ر مه‌ره‌م ئه‌وه باس ل به‌رهه‌ڤییان بهێته كرن، دێ ژ بۆ ڤێ یه‌كێ مه هزاران به‌رسڤ هه‌بن، لێ ئه‌گه‌ر باس ل په‌یوه‌ندى و لۆبییا ده‌رڤه بكه‌ین، ژلایه‌كی ڤه ئه‌م خوه‌دان دۆستین و ژلایه‌كێ دیڤه ژى ل به‌ندێ وێ یه‌كێ نه‌بن وه‌لاتێن خوه‌دان په‌یوه‌ندى لگه‌ل به‌غدایێ ب ئاشكه‌رایی ب پارچه‌بوونا ئیراقێ رازی ببن، لێ دناڤ خوه‌دا هه‌م ژ ئالیێ مۆرال و هێز و ئابۆریڤه، هه‌م ژى ژ ئالیێ به‌هانه‌یا جوودابوونێ ئه‌م به‌رهه‌ڤین، دناڤ خوه‌دا ئابۆرێ مه ب هه‌ر ئاوایه‌كى بیت نه ئاریشه‌یه، گرنگ ئه‌وه پاریێ مه دده‌ستێ مه دایه و خوه‌دى ئابۆره‌كێ سه‌ربه‌خۆینه، ئه‌گه‌ر ب ڤى ره‌نگى نه‌با و پاریێ ژیانا مه‌ژى د ده‌ستێ به‌غدایێ با پشت راستم، چه‌وا سالا 2014 ب مه‌ره‌ما برسیكرنێ بۆدجه برى، بۆ پرسا سه‌رخوه‌بوونێ؛ دا ئاڤ و هه‌وایێ ژى ل مه بریت، لێ بریارا حكومه‌تا هه‌رێما كوردستانێ و خودێ سه‌رۆكێ ئه‌نجومه‌نێ وه‌زیران هیچ پێكڤه‌گرێدانه‌كا هه‌ولێرێ ب به‌غدایێ ڤه نه‌هێلا و سیاسیێن هه‌رێمێ د دانا هه‌ر بریاره‌كا چاره‌نڤێسێ دا سه‌رپشك كر. چما ئه‌م دگه‌ل جه‌هنه‌ما ئیراقێ بژین؟ گه‌وهه‌رێ به‌رسڤێ ژى ئه‌وه: گهلێ كوردستانێ د هیچ بیاڤه‌كێ خوه وه‌كو ئیراقێ نابینیت، هه‌موو پێكهاته‌یێن ئۆلى و نه‌ته‌وى ب ئازادانه دناڤا ڤێ هه‌رێمێ دژین، ل هه‌مبه‌ر دا ئه‌و ل باژارێن ئیراقێ دره‌ڤن و هه‌وارا خوه دگه‌هینن حكومه‌تا هه‌رێمێ، هیچ پێكهاته‌یه‌كێ هه‌رێمێ خوه نابینیت وه‌لاتیێ پله ئێك یان پله دوو، به‌لكو هه‌موو وه‌لاتیێ هه‌ره‌باشن و خوه ب خوه‌دانێ ڤێ كوردستانێ دزانن. خاله‌كا دى یا جوداهیێ دناڤبه‌را كوردستان و ئیراقێ ئاڤه‌دانییه، ئه‌و ئاڤاكرنا كو ل باژارێن كوردستانێ هاتییه كرن، ب دووراتییا ئه‌رد و ئه‌سمانان جوداهى دگه‌ل ئیراقێ هه‌یه، چونكى پشكا هه‌ره زۆرا داهاتێ كوردستانێ ژ بۆ پرۆژه‌یێن خزمه‌تگۆزارى دهێته مه‌زاختن د ده‌مه‌كێ دا پتر ژ 80% بۆدجه‌یا ئیراقێ بۆ كرینا چه‌كى یه، خرابتر ژ ڤێ ژى مه‌زنترین گه‌نده‌لى ل سه‌ر ئاستێ جیهانێ دگرێبه‌ستێن كرینا چه‌كى دا ژئالیێ به‌رپرسێن ئیراقێ ڤه هاتیه كرن، ئه‌گه‌ر ئه‌ڤه ژى خالا لاواز نه‌بیت، ئه‌و تنێ به‌سه كو ئه‌م بزانین ئه‌و چه‌كێ دكریت ژى بۆ رۆژه‌كا وه‌كو ئه‌ڤرۆیه كو ل دژى گهلێ كوردستانێ ب كاربینیت. ل هه‌مبه‌ر ڤێ یه‌كێ به‌لگه ژ بۆ ئاڤه‌دانكرنا كوردستانێ ژى ئه‌وه د ڤێ قه‌یران و ره‌وشا ناله‌بارا ئیراقێ سالانه هژماره‌كا زۆر یا خه‌لكێ پارێزگه‌هێن باشورێ ئیراقێ ب مه‌ره‌ما گه‌شت و گۆزارێ سه‌ره‌دانا هه‌رێما كوردستانێ دكه‌ن، ژبلى سرۆشتێ كوردستانێ ژى، ئه‌و ژنوو تێدگه‌هن حكومه‌تا هه‌رێما كوردستانێ چه‌ند خزمه‌تكارێ خه‌لكێ خوه‌یه و د خه‌ما ئاڤه‌دانكرنا كوردستانێ دایه؛ دوو جاران هندێ ڤێ یه‌كێ ده‌سته‌لاتدارێن به‌غدایێ پارێزگه‌هێن ئیراقێ خرابكریه و كرینه مه‌یدان شه‌ر و تیرۆرێ. ئیدى به‌هانه و رۆهنكرن لازم ناكه‌ت، حكومه‌تا هه‌رێما كوردستانێ پره‌كا ده‌ربازبوونێ بۆ پارتێن سیاسى دروستكریه و ئه‌و دكارن ب ئالایێ سه‌رخوه‌بوونێ و بریارێن ئێكلاكه‌ر ب سه‌ر وێ پرێ دا ده‌رباز بن.
