پیاوی یەكڕیزیی
سەنگەر قوباد
سەرۆكی حكوومەتی هەرێمی كوردستان مێژوو گەواهی بۆ دەدات كە هەمیشە دەستی ئاشتی و ڕازییكردنی لایەنە سیاسییەكانی تری درێژ بووە. بەردەوام لە كاتی قەیران و ناكۆكییە سیباسییەكان سەردانی لایەنەكانی تری كردووە و، ڕێزی لە خەبات و تێكۆشانی سەركردەی لایەنە نەیارەكانی پارتی گرتووە، دوایین چالاكیشی لەم ڕووەوە، چوونی بوو بۆ سەر گۆڕی نەوشیروان مستەفای ڕێكخەری گشتیی بزووتنەوەی گۆڕان و سازدانی ڕێوڕەسمێكی فەرمی و حكوومیی لەوێ. هەر بۆیە هیچ لایەنێكی سیاسیی كوردستانی كێشە و ناكۆكی لەگەڵ نێچیرڤان بارزانی نییە و هەمووان خۆشیان دەوێت، یان لایەنی كەم ڕقیان لێ نابێتەوە. هۆكارەكەیشی هەر ئەوەیە كە بە ئێستایشەوە بانگەشە بۆ یەكڕیزییی لایەنە كوردستانییەكان دەكات و، بڕوای وایە؛ بۆ ڕیفراندۆمیش دەبێ لایەنە كوردییەكان یەكڕیز و تەبا بن، نابێ ڕیفراندۆم ببێتە هۆی پەرتەوازەییی لایەنە كوردییەكان.
ڕەنگە زۆریەك لە سەركردە كوردستانییەكان بانگەشەی یەكڕیزیی و تەباییی بكەن، بەڵام لە كێڵگەی پڕاكتیكدا مەرج نییە هەردەم ئەم پرەنسیپەیان جێبەجێ كردبێت. وەلێ نێچیرڤان بارزانی هەردەم بە شێوەیەكی پڕاكتیكی كاری لەسەر ئەم مەبدەئە كردووە و، هەرگیزیش فاكتەری پەرتەوازەیی و ناكۆكیی سیاسی نەبووە و، بەردەوام ئاوی بە ئاگردا كردووە. بۆ ئەمەیش بە لایەوە ئاساییی بووە سازش بۆ لایەنەكانی تر بكات. هەر بۆیە ئێستایش نایەوێ؛ گشتپرسیی باشووری كوردستان ببێتە فاكتەری پەرتەوازەییی نێو ماڵی كوردی و، هەمووان هان دەدات؛ كار بۆ سەرخستنی پرۆسەی سەربەخۆییی باشووری كوردستان بكەن.
