لدیڤ ھەمی یاساو پرنسیپێن نیڤ دەولەتی و مرۆڤایەتی و ئایینی دیارکرنا مافێ چارەنڤیسێ مللەتان مافەکێ سرۆشتی و ئاسایی یە ، لێ ب درێژاھیا دیروکێ خەلکێ کوردستانێ ب کورد و نەتەوێن دیتر ڤە لڤی مافی ھاتینە بێ بەھرکرن ، لەما خەلکێ کوردستانێ ب رێژاھیا سەد سالایە خەبات ژ پێخەمەت بدەستڤەئینانا ڤی مافی کریە و قوربانیێن بێ وێنە ژی داینە . زەفتکرنا ڤی مافەی ل خەلکێ کوردستانێ ژبۆ شوفینی یەتا دەسھەلاتدارێن وەلاتێن داگیرکەرێن کوردستانێ دزڤریت و ھەتا نھو دەسھەلاتدارێن ڤان وەلاتان بەرامبەر مافێ رەوایێ خەلکێ کوردستانێ لسەر شوفینی یەتا خۆیە و نەگەھشتینە ئاستێ جڤاکێن دیموکراسی و رێزگرتن ل مافێن بەرامبەر . ھەرێما کوردستانێ عیراقێ کو بیست و پێن سالە خودان حکومەت و سازیێن خۆ برێڤەبرنێ و دەسھەلاتەکا نیمچە سەربخۆ بوویە . سەرەرای گۆرینا دەسھەلات و دەستوورێ عیراقێ ل سالا ٢٠٠٣ ل دکاتوریەتێ بۆ دیموکراسی و فیدرالیەتێ ، لێ حکومەتێن ڤی سەردەمەی ژی عیراقێ مینا دەسھەلاتێن بەرێ سەرەدەریەکا دوژمنانە دگەل خەلک و دەسھەلاتدارێن کوردستانێ کریە و ھەمی رێکێن پێکڤە ژیانا دگەل کوردان گرتن ، لەوما کورد نەچار بوون پەنایێ بۆ راپرسیا سەرخۆبوونا کوردستانێ ببەن . ھەرچەندە راپرسی بۆ دیارکرنا چارەنڤیسێ خۆ پرۆسەیەکا یاسایی و ئاسایی و دیموکراسی و ئاشتیانەیە بۆ تەڤایا خەلکێ کوردستانێ و خەلک دێ بریارێ لسەر دەت و بریارا خەلکی ژی د ئێک لاکرنا ھەمی پرسا سەرپشکە و پێتڤی یە ھەمی ئالیێن سیاسی بێ دوو دلی ملکەچی بریارا خەلکی ببن ، لێ مخابن ئەڤە ھەوا پرۆپاکندێن راپرسیا سەرخۆبوونا کوردستانێ دەست پێکر ھێشتا ھندەک حزب و ئالیێن سیاسی بریارا ئێکجاری لسەر پشکداریێ دڤێ پرۆسا نشتیمانی نەدایە . جھێ پسیارێ و حیبەتیێ یە ئەرێ ئەڤ حزب و لایەنە یێن کوردستانی و نشتیمانی نە ..؟ ئەگەر د کوردستانی و نشتیمانی بن چما دژی بەرژەوەندێن خەلکێ کوردستانێ رادوەستن ، یان ژی ژبەر بەرژەوەندێن خۆ دگەل دەولەتا عیراقێ جورئەتا بەژداریکرنێ دڤێ بریارا چارەنڤیسساز دا نیە ، ژبلی ڤێ چەندێ گرۆپێ نەخێر بۆ راپرسیێ د نھو دا سەرھەلدایە و بەھانەیێن بێ بنەمایە بۆ راپرسیێ دئینن و ھەول ددەن ڤێ پرۆسێ لپێش چاڤێن خەلکێ کوردستانێ و جیھانێ ڕەش بکەن و ڤێ پرسا نشتیمانی بۆ بەرژەوەندا کەسەکی و حزبەکێ ھژمار دکەن . دبێژینە وان حزب و لایەن و کەسایەتیێن دژبەرێن راپرسیا سەرخۆبوونا کوردستانێ ، ئەڤ پرۆسە پرۆسەیەکا نشتیمانی یا تەڤا خەلکێ کوردستانێ یە ب ھەمی زمان و ئۆل و مەزھەب ڤە بێ جوداھی . سەرخۆبوونا کوردستانێ ھیڤی و ئارمانجا تەڤایا خەلکێ کوردستانێ یە و بۆ بدەستڤەئینانا ڤی مافەی خەلکێ کوردستانێ خەبات کریە و قوربانی داینە و چەندین سالە ل دەرڤەتەکێ دگەرێت بۆ سەرخۆبوونێ و نھو دەرفەتەکا زێرین بۆ خەلکێ کوردستانێ ھاتیە پێش و ب ھیچ رەنگەکێ یێ بەرھەڤ نیە بۆ بەرژەوەندێن حزبی ڤێ دەرفەتێ لدەست بدەت و خوینا ھزارەھان شەھیدان ب ھەدەر بدەت و نفشێن داھاتی نەفرەتان لمە بکەن . راپرسی ژی ب ساناھیترین ئامرازە بۆ دیاکرنا مافێ چارەنڤیسێ خۆ و سەرخۆبوونا کوردستانێ و نە بو چ کەس و حزب و لایەنانە و بۆ بەرژەوەندا کورد و کوردستانیانە و خەلک گوە نادەتە وان بەھانەیێن بێ بنەما و بریارا راپرسیێ دایە و بریارا خەلکی ژی بەلێ بۆ سەرخۆبوونێ یە و دبێژینە حزب و لایەنێن بێ بریار و بێ ھەلویست بەرامبەر پرسا راپرسی و سەرخۆبوونێ مخابن لجھێ کارکرن لسەر دارشتنا پلان و بەرنامێن نشتیمانی و سیاسی و کارگێری بۆ دەولەتا داھاتی یا کوردستانی ، ئەڤە ھەولیستێ وەیە ..