بزاڤا رزگاریخوازیا گەلێ کوردستانێ دەمێ سەد سالایە دەست ب خەباتا نەتەوی و نشتیمانی کریە کریە ژبووری ئازادی و رزگاریێ ، دڤان سەد سالان دا زۆر ئەڤرازی و نشیڤی بڕینە ، تووشی کارەساتێن ھەرە مەزن بوویە مینا ئەنفال و کیمیا باران و قرکرنێ و تەعریب و ..... ھتد . چونکی وەلاتێن داگیرکەرێن کوردستانێ خودان کیانێن سەربەخۆ و ھێزا مادی بوون و دشیان بەرژەوەندێن خۆ دگەل بەرژەوەندێن وەلاتێن زل ھێز تێکەل بکەن ، لەوما گەلێ کورد وەکی پێتڤی پشتەڤانیا نیڤ دەولەتی نەبوو ، لێ سەرەرای ڤێ ھەمیێ مەشخەلێ بزاڤا رزگاریخوازیا کوردستانێ نەڤەریا و شۆرەش لدیف شۆرەشێ دەست پێ کر ھەر ل ژۆرەشێن شێخ مەحموودێ حەفید و بارزانێن ئێکێ و دووێ و ئیلۆن و گۆلان و سەرھەلدانێ ، ڤان شۆرەشا نەخاسمە شۆرەشا مەزنا ئیلۆنێ ب رێبەریا پارتی دیموکراتی کوردستان و بارزانی نەمر و شۆرەشێن ل دیفرا ھەستا نەتەوی و نشتیمانی ل کوردستانێ گەھاندە ئاستەکێ ھەری بلند و دەسکەفتێن مەزن ژی بدەستڤە ئینان . دڤان شۆرەشان دا ژپێخەمەت ئازادی و رزگاریێ و سەرخۆبوونێ ب سەدان ھزارا خەلکێ کوردستانێ ھاتنە شەھیدکرن و بوونە قوربانیێن سەرخۆبوونێ ، تاکۆ ل ئەنجامێ سەرھەلدانا پیرۆزا گەلێ کورد یا سالا ١٩٩١ سەرەرای دژایەیتا وەلاتێن ھەرێمی وەک (عیراق و تورکیا و سۆریا و ئیران ) لسالا ١٩٩٢ حکومەتا ھەرێما کوردستانێ ھاتە دامەزراندن و بوویە ئەمرولواقع و جیھانێ و وەلاتێن ھەرێمی وەکی وەلاتەکێ نیمچە سەربخۆ سەرەدەری دگەل کر و پشتی لناڤ چوونا رژێما بەعسا عیراقێ لسالا ٢٠٠٣ ئەڤ دەسھەلاتدارای کوردستانێ بوویە دەسھەلاتەکا یاسایی و دەستووری ل عیراقا فیدرال . پشتی حکومەتێن عیراقێ یێن پشتی ٢٠٠٣ ێ یێ بەرامبەر ھەرێما کوردستانێ ل یاسا و دەستووری لادای و ب چاڤەکێ دۆژمنکارانە سەرەدەری دگەل کری ، کورد نەچار بوون ل چارەسەریەکا دیتر بگەرێن ئەوژی سەرخۆبوونا کوردستانێ یە ب رەنگەکێ دیموکراتی و ئاشتیا نە ب رێکا راپرسیەکا جەماوەری دا ، ھەرچەندە راپرسی بۆ دیاکرنا ئاییندێ مللەتان مافەکێ رەوا و سرۆشتی یە ، لێ سەرەرای ڤێ چەندێ ھێشتا دەولەتێن دەور وبەرێن ھەرێما کوردستانێ دژی ڤێ راپرسێآ نە نەخاسمە عیراق و ئیران و تورکیا ژی ھەتا رادەیەکی . یا جھێ حیبەتیێ دناڤ ھەرێما کوردستانێ گرۆپەک بناڤێ دیموکراسیێ و ئازادیا بیر و بۆچوونا درۆشمێ نەخێر بۆ راپرسیێ لنھو بلند دکەن و کار بۆ سەرنەکەفتنا پرۆسا راپرسیا سەرخۆبوونا ھەرێما کوردستانێ دکەن . دڤێرەدا دبێژینە ڤی گرۆپێ دژی بەرژەوەند و ھیڤیێن مللەتێ کورد ، چما ھۆن ڤی درۆشمی بلند دکەن و دەنگێن خۆ دئێخنە پال دژبەرێن کوردستانێ و وان وەلاتێن ب درێژاھیا سەد سالا ھەمی رێک و شێواز بکار ئینای بۆ ژناڤ چوونا گەلێ کورد ، ئەگەر ھوون بەشەک نەبن ل پیلان و ئەجندایێن وان . دڤێرەدا دیار دبیت رێڤەبەر و سەرپەرشتێن ھەوا دژبەریا راپرسیا سەرخۆبوونا کوردستانێ ل شووینا حکومەتا عیراقێ و داگیرکەرێن کوردستانێ بۆ بەرژەوەندێن ماددی و سیاسی ڤێ دژبەریا راپرسیێ دکەن و خەلکەکێ نەفام و ھەلگرێن تۆڤێ دووبەرەکیێ ل کوردستانێ سەردابرنە و وەسا تێگەھاندی نە کو راپرسیا سەرخۆبوونا کوردستانێ ریکلامەکا سیاسی و کەسۆکی یە و تنێ بۆ بەرژەوەندا پارتی دیموکراتی کوردستان و سەرۆک بارزانی ھژمار دکەن . ژبیرا خەلکی دبەن کۆ ئەڤرۆ باشترین دەلیڤەیە بۆ سەرخۆبوونا کوردستانێ , چونکی دەولەتا عیراقێ د لاوازترین ئاست دایە ژلایێ سیاسی و ئابووری و لەشکری و ناکۆکیێن ناڤخۆیی . بەرامبەر وێ چەندێ ھەرێما کوردستانێ د موگوترین ئاست دایە ژلایێ سیاسی و ئابووری و لەشکری ، ھەرچەندە ژلایێ ئابووری دقەریرانەکێ دایە لێ ئەگەرێ ڤێ قەیرانێ دەولەتا عیراقێ نە سەرخۆبوونا کوردستانێ . ب سەرخۆبوونا کوردستانێ نە تنێ قەیرانا دارایی زۆترین دەم دێ چارە بیت لێ کوردستان دێ بیتە ئێک ل وەلاتێن ھەرە پێشکەفتی د ھەموو لایەکی ڤە و ڤاکتەرێ ڤەژاندنا ئابووریێ جیھانێ . بەرۆڤاژی سەرنەکەفتنا راپرسیێ دۆزا سیاسی یا کوردستانێ دێ بۆ خلا (٠) سفر زڤریت و ژلایێ ئیداری و ئابووری ژی کوردستانێ دێ کەڤیتەڤە بن رەحمەتا داگیرکارا و بۆ ھەتا ھەتا جیھان و نڤشێن داھاتی یێن کوردستانێ دێ کەنە خالەکا ڕەش ب ناڤچاڤێن خەلکێ کوردستانێ ژبەر لدەست دانا ڤێ دەلیڤێ و دبیت سەد سالێن دی ئەڤ دەلیڤە ھەلنەکەڤیتەڤە . لەما پێتڤی یە خەلکێ کوردستانێ بەرژەوەندێن حزبا و کەسانێن دخزمەتا داگیرکەران لابدەن وبۆ بەرژەوەندێن گشتی یێن نشتیمانی ب کەرنەڤال و ب دەنگێن بەلێ بەشداری راپرسیێ بکەن ، داکو ھیڤی و ئارمانجا قوربانی و خەباتکارێن کوردستانێ ب ھەدەر نەچیت و دەولەتا کوردستانێ لدایک ببیت .