مللەتێ کورد ب درێژاییا دیروکا خویا زێرین هەمی هەوڵێن خو خستینە کار ژبو شادبوونا مافێن خو یێن بنەرەتی کو سەرخوەبوون ئێکە ژوان مافێن سروشتی یێن مللەتێ مە،هەر ژبو وێ ئارمانجێ مللەتێ مە گەلە قوربانی داینە و زولم و ستەم لێ هاتینەکرن ژلایێ حکومەتێن عێراقێ وە،ل نهادا دەلیڤەکا زێرین بو مللەتێ مە هاتیە پێش کو بریارێ لسەر چارەنفیسێ خوە بدەن،واتە مللەتێ مە بریاردایە کو بیست و پێنجی ئەیلولێ چارەنفیسێ خو ئێکلابکەن کو لگەل عێراقەکا فاشل و گەندەل جودابنەفە یان بمێنەوە،لەوما رێفراندوما کوردستانێ کو بریارە ل بیست و پێنجی ئەیلولێ بهێتە ئەنجامدان بریارەکا دیروکی و دەلیڤەکا نێشتیمانی ییە...
هەژی گوتنێ یە پروسا رێفراندۆما سەرخوەبونا کوردستانێ بویە پرسەکا گەرم و گور ل تەواویا جیهانێ ب گشتی و نافخویا کوردستانێ ب تایبەتی،لێ ئەوا بویە جهێ حیبەتێ ئەڤەیە کو گەلەك سازیێن راگەهاندنێ بەحسی پاشخستنا رێفراندومێ دکەن،ئانکو پروپاگندا دکەن کو رێفراندوم ل دەمێ خودا ناهێتە ئەنجامدان،هەروەسا هەوالێن وەسا بلاڤ دکەن کو تەمەنێ کومارا کوردستانێ دێ یا کورت بیت ،چونکی کومەلگەها نیفدەولەتی لگەڵ رێفراندوما سەرخوەبونا کوردستانێ دا نینە،داخازا پاشخستنا رێفراندومێ ل جەنابێ بارزانی کرییە،لێ جەنابێ بارزانی ژ پێخەمەت شادبونا مللەتی خو ب مافێ خو یێ سروشتی داخازا هەمی ولاتێن جیهانێ ب گشتی و ئەمریکا ب تایبەتی ژ بو پاشخستنا رێفراندومێ رەتکرییە و یێ رژدە لسەر هندێ کو رێفراندوم ل دەمێ خو یێ دیارکری دا بهێتە ئەنجامدان.
ئەلبەتە کەس نەشێت رێگریێ ل هەمبەر مافێ سروشتیێ مللەتێ کورد بکەت،چونکە چەوا هەمی گەلێن جیهانی ئەو ماف هەیە دەولەتێن خو هەبن،ئەوا مللەتێ کوردیش هەمان ماف هەیە کو دەولەتەکا تایبەت بخو هەبێت،هەر ژبەرهندێ مللەتێ مە ئەو ماف هەیە بریارێ لسەر چارەنڤیسێ خو بدەت،لەوما رێفراندۆم پرسەکا نیشتیمانی و نەتەوەیێ یە،مللەتێ مە بریاردایە چارەنفیسێ خو دیار بکەت، لەورا ئەو پرۆپاگندێن دهێنەکرن لسەر پاشخستنا رێفراندومێ چ راستی بو نینە،باشترین بەلگەش بو وێ راستیێ پەیوەندیا تەلەفونی یە دنافبەرا وەزیرێ دەرفەیێ ئەمریکا ریکس تیلەرسون و جەنابێ بارزانیدا،کو ل وێ پەیوەندییا تەلەفونیدا وەزیرێ دەرفەیێ ئەمریکا داخازا پاشخستنا رێفراندومێ ل جەنابێ بارزانی کربوو،لێ جەنابێ بارزانی ئەو داخازا ئەمریکا کو زلهێزترین ولاتێ جیهانێ یە ژبو پاشخستنا رێفراندۆما سەرخوەبونا کوردستانێ رەتکر و کو رێفراندوم بهێتە پاشخستن بێ هێچ گرەنتیەکا نێفدەولەتی،هەروەسا جەنابێ بارزانی ل چاڤپێکەفتنەکا رۆژنامەوانیدا دگەل رۆژناما عوکاز یا سعودیدا داکوکی لسەر ئەنجامدانا پرۆسا رێفراندۆما سەرخوەبونا باشورێ کوردستانێ کریە،هەژی گوتنێ یە جەنابێ بارزانی ئەو راستیەش ئاشکرا کریە کو ئەم ل دوور پاشخستنا رێفراندومێ لگەل ئەمریکا رازی نەبووینە،هەروەسا جەنابێ بارزانی ل کومبونا دگەل ماموستایێن زانینگەهێن کوردستانێ دا تیشك خستبووە سەر پرۆسا رێفراندومێ کو ب هێچ رەنگەکێ رێفراندۆم ناهێتە پاشخستن دێ ل دەمێ دیارکریێ خودا دهێتە ئەنجامدان،جەنابێ بارزانی ل نویترین هەلویستی خودا لسەر پاشخستنا رێفراندومێ ل کونفرانسەکێ دا دگەل قوتابیان و لاوان وئافرەتێن کوردستانێ دا تێشك خستەر سەر پرۆسا رێفراندۆمێ و راگەهاند ب هێچ رەنگەکی ئامادەنینە ل ژێر هێچ گفاشتن و بهانەیەکێ دا رێفراندۆم بهێتە پاشخستن،لەورا ل وان هەمی هەلویستێن جەنابێ بارزانیدا بو مە دیار دبیت کو ب چ رەنگی پاشخستنا رێفراندۆمێ ل بەرنامێ جەنابێ بارزانیدا نینە...
هەژی ئاماژە پێدانێ یە پروسا رێفراندۆما سەرخوەبونا کوردستانێ بویە پرسەکا حەتمی ب هێچ رەنگەکی ناهێتە پاشخستن،ب رامانەکا دی مللەتێ کورد ئامادەنینە وێ دەلیڤەیا زێرین و دیروکی ل دەستخوە بدەن،لەورا مللەتێ مە بریارا خودایە کو بیست و پێنجی ئەیلولێ رێفراندۆم بهێتە ئەنجامدان و ب دلەکێ کوردپەروەرانە و ب هەستەکێ نیشتیمانپەروەرانە بچنە سەر سندوقێن دەنگدانێ ب بەلێ بەرسڤا هەمی وان پرۆپاگندا بدەن ئەوێن دبێژێن رێفراندۆم بو سەرخوەبونا کوردستانێ نیە بو چەواشەکاریێ یە،یان رێفراندوم لدەمێ خودا ناهێتە ئەنجامدان..