پرسا ھەرا گرنگ یا نھا ل ھەرێما کوردستانێ و ئیراقێ و دەڤەرێ گۆتووبێژ ل سەر دھێتە کرن، رێفراندۆما سەرخوەبوونا کوردستانێ یە، کو پترییا ئالیێن سیاسی ب پشتبەستن و رژدییا پارتی دیمۆکراتی کوردستان، دوپاتیێ ل کرنا وێ پرۆسەیا گرێدایی گەلێ کوردستانێ دکەن.
ھەرچەند پترییا ئالیێن ئیراقی ژی نە دگەل کرنا رێفراندۆمێ نە دڤی دەمی دا، ھندەک ژی ب ئاشکرایی دژاتییا خوە لسەر وێ پرسا دیموکراتی یا گرێدایی گەلەکی کو ب درێژاییا دیرۆکێ ستەم ل سەر دەستێ حکومەتێن ئێک ل دووڤ ئێک یێن ئیراقێ دیتیە، ئەڤرۆ ژی ھەمان سیستەما دژاتیکرنا گەلێ کوردستانێ پەیرەو دکەن، لێ ئێکرێزی و ھەڤگرتنا ئالیێن کوردستانی و ئێکدەنگییا وان ل سەر وێ پرسێ بۆ سەرخوەبوونێ کو خەونا ھەر تاکەکێ کوردستانێ بوویە، خەونێن نەحەزان پاشڤە ببەن و دوپاتیێ ل وێ یەکێ بکەن کو پاشڤەزڤرین ژ وێ پرۆسەیا گرێدایی چارەنڤیسێ گەلێ کوردستانێ نەبیت.
ب رژدییا پارتی و ب ئێکدەنگییا ئالیێن سیاسی یێن کوردستانێ ئەڤرۆ دەست ب قۆناغێن دەستپێکرنا وێ پرۆسەیێ ھاتینە کرن، ئەوژی شاندا جڤاتا بلندا رێفراندۆمێ بۆ بەغدایێ و کرنا ژمارەیەکا کۆمبوونا دگەل ھێز و ئالیێن سیاسی یێن ئیراقی، کو ب گۆتنا شاندا ناڤھاتی گاڤێن باش ھاتینە ھاڤێتن، پشتی کو ھەموو ئەو بنپێکاریێن حکومەتێن ئیراقێ ل دژی ھەرێما کوردستانێ بەرچاڤی ئالیێن بەغدایێ کرین، کو بەغدا ئینکارا وان پێنپێکاریێن دەستووری نەکر.
ھندەک ژ ئالیێن سیاسی یێن ھەرێما کوردستانێ بخوەژی ئەڤ پرسا نەتەوەیی ب پرسەکا حزبی و کەساتی ناڤکریە، لێ گەر وان ڤێت خوە ژ وی ئابلۆقەیێ بەرتەنگ دەربێخن، پێنگاڤان بۆ ئێکرێزیێ ل سەر ڤێ پرسا نەتەوەیی بھاڤێژن و نەبنە ئامرازێن دەستێن دەرەکی و ژ بەرژەوەندیێن بەرتەنگ دەربکەڤن، تاکو ئەو پرسا ھەردەم خەونا ھەر تاکەکێ کورد ب دەستڤە دھێت، پشکداری وێ پرۆسەیێ ببن و بەرژەوەندیێن خوەیێن بداننە ئالیەکی و ھزر د بەرژەوەندیێن نشتیمانی دا بکەن.
نھا ژی راستە پارتی رۆلێ ھەرە گرنگ د پرۆسا رێفراندۆمێ و ب دەستڤەئینانا سەرخوەبوونێ دبینیت، کو ب گۆتنا بەرێز نێچیرڤان بارزانی جێگرێ سەرۆکێ پارتی دیمۆکراتی کوردستان، پارتی رۆلێ پێشەنگ د پرۆسەیا سەرخوەبوون و سەروەرییا نەتەوەییا گەلێ کوردستانێ دا دگێریت، واتە ئەڤ پرسە نەپرسەکا حزبی و کەسوکی یە، بەلکو دانپێدانە کو پارتی دگەل ھێز و ئالیێن سیاسیێن کوردستانێ رۆلێ ھەرە سەرەکی گێرایە، ئەڤەژی ڤەدگەریت بۆ وێ دیرۆکا پری خەبات و قۆربانی یا ژپێخەمەت ب دەستڤەئینانا مافێن رەوا یێن گەلێ کوردستانێ ژ ئاخ و ئالا و دەولەتبوونێ داین.
ھەر د ڤێ مژارێ دا پارتی د سالرۆژا دامەزراندنا خوە دا تەکەزی ل سەر پشکدارییا ھەرە ب ھێزا ئەندام و ئالیگرێن خوە بۆ رێفراندۆمێ کرییە، کو ب گۆتنا جێگرێ سەرۆکێ پارتی ژی، پشکدارییا وان دڤێ پرۆسەیێ دا، بەلگەیێ دلسوزیا وانە بۆ رێبازا پیرۆزا پارتی و بارزانی، ئەڤ ئاخفتنا نێچیرڤان بارزانی بخوە ژی بەلگەیە کو سەرکرداتییا پارتی دێ ل سەر ب دەستڤەئینانا ئارمانجێن ھەڤپشکێن گەلێ کوردستانێ ب ھەموو پێکھاتەیێن وێڤە یێن گرێدای پێکڤەژیان و خوەشکرنا ژیانا خەلکێ کوردستانێ بەردەوام بیت.