پشتى شكه‌ستنا رژێما ژناڤچووى، كوردان ب مه‌ره‌ما ئاڤاكرنا ئیراقه‌كا فه‌درال و هه‌ڤپشكى سه‌ره‌دانا به‌غدایێ كر و جاردن ده‌ستوره‌كێ نوو نڤیسى، كو هه‌ر ل دیباجه‌یا وى ده‌ستورى هاتییه (پێگیریكرن ب ڤى ده‌ستورێ دێ ئێكگرتنا ئیراقێ ب ئازادی و گه‌ل و خاك و سه‌روه‌ریا وێڤه پارێزیت) لێ هه‌ر د وێ ده‌ستورێ دا د ماده‌یا 140 دا هاتییه: (ئاسایى كرن، ئامار، ل كه‌ركووكێ ب راپرسینێ ب دووماهێك دهێت، و ده‌ڤه‌رێن دى ئه‌وێن هه‌ڤركى ل سه‌ر هه‌ى، ئه‌و ژى مه‌ره‌ما دیاركرنا بریارا وه‌لاتیێن وان) كو بجهـ ئینانا ڤێ مادێ هه‌ر ژ خالا دووێ ماده‌یا 140 هاتییه دانان كو نابیت ژ به‌روارێ 31 كانوونا ئێكێ یا سالا 2007 ببۆریت، ئاشكه‌رایه كو حكومه‌تا ئیراقێ و ده‌سته‌لاتدارێن وێ چ جارا حه‌ز ژ كوردێن ئاكنجیێن ده‌ڤه‌رێن ماده‌یا 140 نه‌كریه هندى ئه‌و ژ په‌ترۆل و داهاتێ وان ده‌ڤه‌ران حه‌ز دكه‌ن، له‌ورا ژبلى كو ژئالیێ دیرۆكیڤه ده‌ڤه‌رێن كوردستانینه و كورد لێ دژین، 7 سال ب سه‌ر به‌روارێ ب جهـ ئینانا ماده‌یا ناڤهاتى ده‌ربازبوون و حكومه‌تا ئیراقێ هندى هزر د فرۆتنا په‌ترۆلێ وێ دكر هند هزر ل وێ برگه‌یا ده‌ستورى نه‌كر، برینا بودجه‌یا هه‌رێمێ ژى هه‌موو ئاریشه مه‌زنتر كرن و حكومه‌تا هه‌رێمێ نه‌چار كر بریارێ ل سه‌ر سه‌ربه‌خۆبوونا ئابورێ هه‌رێمێ ب به‌رهه‌مێن وان ده‌ڤه‌ران ژى بده‌ت، كو ئیدى كوردستان خوه‌دى ئابوره‌كێ سه‌ربه‌خوه‌یه و حكومه‌تا هه‌رێمێ دێ ب ئه‌ركێ فرۆتنا په‌ترۆلێ خوه رابیت و داهاتێ خه‌لكێ هه‌رێمێ دابین كه‌ت، كو رۆلێ نێچیرڤان بارزانى سه‌رۆكێ حكومه‌تێ دڤى بیاڤى دهاته‌دیتن، بارزانیێ سه‌رۆك وه‌زیر و جڤاتا وه‌زاره‌تێ خواندنه‌كا باش بۆ هندێ كربوون ئه‌گه‌ر ژێده‌رێ ئابووریێ كوردستانێ ل ده‌ستێ به‌غدا بیت، ئیدى هه‌رده‌م ئه‌و كارتا فشارێ یه و دكارن هه‌ر مه‌ره‌مه‌كا سیاسى دژى كوردان بكاربینن، دوور ژى نینه بۆدجه و نانێ ژیانێ فه‌رمانبه‌رێ كوردستانێ بۆ لڤاندنا جاده‌ى و چێكرنا ده‌نگێ نه‌رازى بكاربینن، له‌ورا پێنگاڤا گرنگ یا سه‌ربه‌خۆبوونا كوردستانێ و جوودان ژ ئیراقێ، ژ وى ده‌مێ ده‌ستپێدكه‌ت كو نێچیرڤان بارزانى سه‌ربه‌خۆبوونا ئاۆرییا هه‌رێمێ راگه‌هاندى و په‌یوه‌ندی و رێكه‌فتنێن ئابورى دگه‌ل توركیا ئیمزاكرى، ب ڤان رێكه‌فتنان نه‌ب تنێ به‌غدا ژ ئێك پارچه‌ییا ئیراقێ بێهیڤی كرن، به‌لكو چه‌ندین ده‌نگێن نه‌رازى ل به‌غدایێ بلندبوو، ده‌سته‌لاتدارێن به‌غدایێ گه‌هشتنه وێ راستیێ كو ئیدى ئه‌و ره‌فتارێن دگه‌ل هه‌رێما كوردستانێ د ئاستێ نێڤ ده‌وله‌تى و رێكه‌فتنێن ئابوورى و فرۆتنا په‌ترۆلێ دهیته‌كرن؛ د ئاستێ هه‌رێمه‌كى مه‌زنترن و هه‌ر وه‌كو دگه‌ل وه‌لاته‌كێ سه‌ربه‌خۆیه. سه‌ره‌راى سكالایێن به‌غدایێ ل ئه‌مریكا ل دژى فرۆتنا په‌ترۆلا هه‌رێمێ، لێ حكومه‌تا هه‌رێمێ ته‌سلیمى وان گڤاشتنان نه‌بوو و دگه‌ل رێكه‌فتنا دگه‌ل توركیا، بۆ به‌رپرسێن توركیا دیار كرن كو رێكه‌فتن و جیرانه‌تى دگه‌ل كوردستانه‌كا هه‌موو ئالى و پێكهاته تێدا ده‌سته‌لاتدار و خوه‌دى سنووره‌كێ ئارام باشتره ژ ئیراقه‌كا تژى شه‌ر و ئالۆزى و شیعه تێدا ده‌سته‌لاتدار، هه‌ڤده‌م كو هیچ بریاره‌كا وێ ل به‌غدایێ نینن و پێدڤیه هه‌رده‌م ل به‌ندا گلۆپا كه‌سكا ته‌هرانێ بیت. بارزانیێ سه‌رۆك وه‌زیر، ئه‌وێ ئه‌ڤ باوه‌رییه ژ بۆ توركیا و حكومه‌تا وى و ئاكپارتى چێكرى، وه‌كو كاریزما دناڤا وان سه‌ره‌دان و رێكه‌فتنا دهێته دیتن، چونكى توركیا و ئاكپارتیێ ده‌سته‌لاتدار هیچ ده‌مه‌كى دۆستێ كوردان نه‌بوویه و ل 10 سالێن به‌رى نها ژى ب لێدوانێن سه‌رۆكێ وێ پارتێ دژى كوردستانێ و گه‌فا هێرشكرنا سه‌ر كه‌ركووكێ ئه‌ڤ دوژمنداریا خوه نه‌ڤه‌شارتبوو، ئیدى ئه‌وێ ڤى رۆلى دبینت دگه‌ل دوژمنداریا به‌غدا و ته‌هرانێ، بكاریت دلێ ئه‌نقه‌رێ ژبۆ رێكه‌فتنێ دگه‌ل هه‌ولێرێ بۆ خوه رازیكه‌ت، دبێژنێ كاریزما، چونكى ده‌رگه‌هێ په‌یوه‌ندیا هه‌رێما كوردستانێ ب ئه‌وروپا و جیهانێ ئیدى ب ته‌نێ توركیایه و ژ به‌غدایێ و ته‌هرانێ پلانا دژاتیكرنا هه‌ولێرێ دهێته دانان
کارزان فەقێ
