ھەردەمێ بەحس ژ میلیشیاتێن حەشدا شەعبی دئێتە کرن , چەند پرسیارەک دئێنەکرن وەکی حەشد شەعبی چیە؟ و چاوا پەیدا بون ؟ و چ کردارەک کریە پشتی دروستبوی ؟ و پێکولا چ دکەن ؟ و فەرە حکومەتا ھەرێما کوردستانێ چ بکەت بو نەھێلانا ھەرمەترسیەکێ ل پاشەروژێ دا ؟
(١)
حەشدا شەعبی ئەو ھێزا چەکداری - مەزەھەبی - حیزبی و میلیشیاتی یە کو ل حوزیرانا سالا ٢٠١٤ دروست بوی ب فەتوایەکا (جیھادا کیفائی ) یا مەرجعێ بلندێ شیعا (عەلی سیستانی ) . پشتی ڤێ فەتوایێ ھەر ئالیەکێ سیاسی بریاردا کو باسکێ سەربازی دابمەزرینیت کو مەزنترین مەترسینە ل سەر پاشەروژا عیراقێ . ئەڤ میلیشیاتە پتر ژ (٦٧)گروپێن جودا جودا نە و ل عیراقی و ئیرانی و ئەفغانی و لوبنانی و بەحرێنی پێکدئێت ب زمانەکێ دی پێکھاتەکە ل شیعێن جیھانێ بو پاراستنا جھێن پیروزێن شیعا ل نەجەف و کەربەلا و پاراستنا حوکمێ شیعی ئەوێ پشتی ٢٠٠٣ ل عیراقێ تاک ئالی جێگیر بوی . ھژمارا وان پتر ژ (١٠٠)ھزار چەکدارانە .
پشتی زێدەبونا نفوزێ وان ھەمی ئالیێن شیعی ب پشتەڤانیا ئیرانێ ب سەروکاتیا مالکی و ل گەل سوننەیێن شیعا و ئەکرادێن مالکی یاسایەک ل پەرلەمانی دەرکەفت بو ب یاسایی کرنا ھێزێن حەشدا شەعبی . و ب ھەمی شێوازەکێ ھاریکاریا ڤان ھێزا ھاتە کرن وەکی سەروکێ حکومەتا ھەرێما کوردستانێ نێچیرڤان بارزانی ل مەراسیمێن سالیادا جینوسایدا شنگالێ راگەھاندنێ (ل دەستورێ عیراقێ بەحس ژ مافێن پێشمەرگەی کریە وەک پشکەک ژ سیستەکێ بەرەڤانیێ یێ عیراقی , بەلێ عیراق بەرھەڤ نەبو ھاریکاریا پێشمەرگەی بکەت . ل بەرامبەر دا ب ھەمی شیان ھاریکاریا حەشدا شەعبی ھاتنە کرن لدەمەکێ دا کو مە رێز بو قوربانی دانا وان ھەیە . بەلێ عیراقێ نەڤێت ھاریکاریا کوردستانێ بکەت ) لێرەدا باشتر نیەتا تائیفی و دژاتیا ھەرێما کوردستانێ ژ ئالیێ بەغدا ڤە بو مە دیار دبیت . وەک سەروک وەزیران راگەھاندی ل دەستوری بەحس ژ پێشمەرگەی ھاتیە کرن ب یاسایا پەرلەمانی بەحس ژ حەشدا شەعبی ھاتیە کرن , روون و ئاشکرایە کو دەستور بلندترە ل یاسایێ ژی. ھەروەسا سەروکێ ھەرێما کوردستانێ بو روژناما حیات لەندەنی راگەھاند بو کو ( بھیچ ئاوایەکێ رێکێ ب ھاتنا حەشدا شەعبی نادەن بێتە ناڤ ئاخا کوردستانێ )
(٢)
دامەزراندنا حەشدا شەعبی کارڤەدان بو تایبەت وی دەمی کو تیرورستێن داعش ب توندترین شێواز ھێرشی شیعا کری و ھەم مەزھەب و ھەم دەسەلاتا شیعی کەفتە مەترسیێ دا ژ بەر ڤێ چەندێ شیعان چەک ھەلگرت . و زور جارا بونە ئەگەرێ بن پێکرنێن یاسای و مروڤی و سیاسی و بەردەوام گرتێن ڤیدیویی بلاڤ دکەن کو خرابترین شێواز سەرەدەریێ ل گەل سوننەیان دکەن . ھەروەکی قیس الخزعلی ئەمیندارێ گشتی یێ (عێائب اھل الحق ) گوتی ( ئەم تولا حسێن کورێ عەلی - ر - دێ ل خەلکێ موسل کەینەڤە !!!) ب راستی شەراکەت ناھێتەڤە مەیدانا سیاسی دا ل وەلاتەکێ دا پێکولا تولا بەری ١٤٠٠سالا بێتەکرن . کردارێن حەشدا شەعبی ل ڤان سالێن چوی بوینە سەرئێشە بو رێکخراوێن مافێ مروڤی و حکومەتا عیراقێ و دەولەتێن سوننی تایبەت تورکیا و سعودیێ و ھەروەسا سونێن عیراقێ ژی بوینە قوربانیی ڤان دەست رێژیا و بەردەوام گەفا ل کوردستانێ ژی دکەن .
(٣)
پێکولا سەرەکی یا حەشدا شیعی پاراستنا دەسەلاتا شیعەگەراییە ل عیراقێ ب پشتەڤانیا رەھا یا ئیرانێ بو ھندێ ھەتا ھەتا ل بەغدا دا مەزھەبێ ویلایەتا فەقیە حوکمی بکەت . ھەروەسا کار ل سەر پروژێ (ھلال شیعی) دکەن بو گرێدانا ئیرانێ ب عیراقێ و سوریێ و لوبنانێ و دەریا سپی ڤە و ھەتا ھندەک ژ سەکردێن حەشدا شیعی داخازا (بدرا شیعی ) دکەن بو ژ خوە گرتنا یەمەن و بەحرێن ژی .ھەروەسا ئەڤ ھێزێن نەرێکخستی و چو عەقیدەکا سەربازی نە و ب باگراوەندێ تائیفی کار دکەن ھەردەم مەترسیا بکار ئینانا وان دئێتە کرن ژ ئالیێ وەلاتێن ئیقلیمی ڤە دژی ھەر ئارمانجەکا ھەی تایبەت کوردستانێ کو دنھا دا بەرەف ( ٢٥ ئەیلولێ ) دچیت روژا ئەنجامدانا ریفراندومێ . ھەروەسا حەشدا شەعبی بەردەوام ھەول ددەت کو ھێزێن خوە ب ھیجەتا ھەبونا مەترسیێ ل سەر کەرکوک و دەڤەرێن کوردستانی ھێزا خوە ل وان دەڤەرا زێدە دکەت ھەتا نھا چەندین لیوا بەرەف وان دەڤەرا ئینانە و دەڤەرەکا مەزن ژی ل کوردستانێ تایبەت ل باشورێ شنگالێ داگیرکریە. لێرە دا فەرە حکومەتا ھەرێما کوردستانێ ب ھەمی شیان خوە ژ پروژێ مەترسیدارێ حەشدێ ھشیار بکەت .
(٤)
گرنگە حکومەتا ھەرێما کوردستانێ ب پروژەکێ توکمە کار بکەت و باش ل نیەتا ڤان ھێزا تێبگەھیت .
• گرنگی دان ب زمانێ دیالوگێ ل دەڤەرێ دا و گەل ھەمی ھێزێن جورا و جور.
• زور گرنگە ھەمی حزبێن کوردستانی ل دەڤەرێن رەسەنێن کوردستانی ئێک دەنگ بن و نەھێلن ب ھیچ شێوازەکێ دەرز بکەڤنە ناڤ دا .
• فەرە حکومەتا ھەرێما کوردستانێ ب ھاریکاریا حکومەتێن خوجھی باشترین خزمەتگوزاریا بگەھینە وان دەڤەرا . و کاری بو گەنجێن وان دەڤەرا ببینن داکو بێکاریێ نەکەنە ھیجەت بو چونە ناڤ حەشدا شەعبی دا .
• زێدەکرنا ھێزێن پێشمەرگە و ئاسایشێ ل وان دەڤەرا بو ھندێ جورئەتا شەر فروشیێ ب کوردا ل دەف حەشدێ و چو ھێزەکێ پەیدا نەبیت .
• پێکول بێتە کرن ھێزێن نێڤ دەولەتی بێنە جێگیر کرن ل وان دەڤەرا .