دەست نیشانکرنا ڕۆژا٢٥/٩/٢٠١٧ ژبۆ برێڤەچونا پروسەیەکا گەلەک مەزن وگرنگ وچارەنڤێس ساز پێنگاڤەکا مەزن وێرەکانە بوو, ژبۆ دەست نیشانکرنا چارەنڤیسێ ھەر تاکەکێ ڤی جڤاکی یێن دچوارچوڤێ ھەرێما کوردستانێدا دژین ب ھەمی ئاین ونەتەوێن وێڤە ودگەل دەڤەرێن ڤەقەتیایی ژکوردستانێ, بریارا ریفراندومێ ئێکە ژ گرنگترین بریارێن ھێز ولایەنێن سیاسی ل ھەرێما کوردستانێ دەرکرین,داکو گەلێ کورد ژی بگەھیتە مافێن خۆەیێن ڕەوا, ئەو مافێن کو دھێنە ستاندن نەک دھێنە دان.
گەلێ کوردستانی جودا ژھەمی گەلێن دیتر, دڤێت دڤی دەمیدا برێکێن دیموکراتی وئاشتیانە مافێن خۆە ب دەست بینیت کو ئەڤە چەندین سەدەیە لێ ھاتینە ئاسێ کرن وخوارن وھەر جارەکا وان داخوازا مافێن خۆە کربیت, ب رەنگەکی ژ رەنگان ھاتینە تەپەسەرکرن, وھاتینە کوژتن وکیمیاباران وئەنفال بۆ ھاتینە راکرن وگوندێن وان ھاتینە خرابکرن و وێرانکرن, ئاخا وان ھاتیە داگیرکرن, وبەردەوام وەکو مرۆڤێن بەند وکویلە وپلە دوو وسێ سەرەدەری دگەل ھاتیە کرن ونەھێلاینە ب مافێن خۆەیێن ڕەوا شاد ببن, نوکە دەلیڤە ھاتیە رەخساندن وھێز ولایەنێن سیاسی ئەو بریارا گرنگ دایە, بەلێ موخابن دوبارە دبینین دەنگێ نەرازیبونێ سەرھەلدایە ودبێژن, نوکە دەمێ ریفراندومێ نینە و شەرێ داعش ب دووماھی نەھاتیە,بەلێ یا مە دئێشینیت خەلکەک دناڤ کوردستانێدا یێن بوینە دار ودەستێ دۆژمن ونەیاران وپڕۆپاکندێن خراب دژی ڤێ پروسێ بەلاڤ دکەن.
ئەم ژی دپڕسین, ئایا گەلو کەنگی دەمێ وێ یە کو گەلێ کوردستانی وەکو ھەمی گەلێن دیێن جیھانێ ب مافێن خۆە شاد ببیت وببیتە خودان قەوارەکێ سەربەخۆ ودەولەتەکا کوردستانی بناڤێ کوردستان ھەبیت؟.
یا خویایە ل ڤێ جیھانێ ب تنێ گەلەکێ مەزن وخودان ئەرد و زمانێ تایبەتێ بخۆەڤە,کو زێدەتر ژ٣٠ملیون کەسان، ھەتا نوکە ب مافێن خۆە شاد نەبوی و نەگەھشتیە مافێ خۆە وب درێژایا دیروکێ مافێن وان ژێ ھاتینە ستاندن بتنێ گەلێ کوردستانیە.
ریفراندوم مافەکێ سروشتیێ رەوایێ گەلەکیە کو دناف وولاتەکیدا دژین ھەمی مافێن وان لێ ھاتینە خوارن و وی گەلی دڤێت ب رێکا ریفراندومێ وب رەنگەکێ دیموکراسی داخوازا مافێن خۆە بکەت, لەورا دبێژین, ژ بلی ھەڤولاتیێن ڤی وولاتی چ ھێز ولایەنێن دیتریێن بیانی ماف نینە بریارا باش وخراب, کرن ونەکرن یان دەمێ گونجایە یان نە, ل سەر ریفراندەمێ بدەت.
بتنێ کوردستانی دشێن بریارا خۆە یا چارەنوساز بدەن, نوکە کوردستانی ب ھەمی ئاین ونەتەوەێن خۆەڤە دھەرێما کوردستانێدا دژین ومافێ وانە بۆ ھەر کارەکێ گرنگ وچارەنوساز ریفراندەمێ بکەن وبێی دوودلی بەشداریێ تێدا بکەن وبزاڤا سەرخستنا وێ بدەن, ونەھێلن دۆژمن ونەیار ھەفسویێن مە زاخا خەلکێ کوردستانێ بینە خوار ب بھانەێن جورا وجور وبەربەستان بۆ دروست بکەن, داکو خەلک بەشداریێ دئەڤێ پرسێدا نەکەت, بەشداریا کارا یا ھەر تاکەکێ ڤی جڤاکی دێ بیتە ستریەک دچاڤێن دۆژمن ونەیارو وان ھەفسویێن بەربەستان دروست دکەن, سەرکەفتنا پڕوسیسا ریفراندومێ سەرکەفتنا ئیرادە و خواستەکا ھەمی گەلێ کوردستانیە داکو بگەھنە ھیڤی وئومێد و خەونێن خۆە وبۆ گەھشتن بۆ ئەڤان ھیڤیان ب سەدان ھزاران کەسێن قارەمان گیانێ خۆە کریە قوربان و شەھید ھاتینە دان ودەھان جاران گوند ومال ھاتینە سوتن وخرابکرن و تالان کرن وکیمیا لێ ھاتیە رەشاندن وئەنفال لێ ھاتیە راکرن, لەوما بەشداریا خەلک وجەماوەریی ب رەنگەکێ کارا وسەر ئێخستنا پروسیسا ریفراندومێ بەرسڤەکا پیلایی وبھێزە بۆ وان کەسێن ھەتا نوکە ژنافبرنا کوردستانێ دخیالا واندا ھاتیە چەسپاندن وبزاڤێ دکەن ژبۆ دووبارە داگیرکرنا کوردستانێ, سەرخستنا پرۆسیسا ریفراندومێ سەرکەفتن ل سەر ھێزێن شەرخواز وتاریاتیێ, سەرکەفتنە ل سەر ھێزا زولم وزوریێ, سەرکەفتنا پرۆسیسا ریفراندومێ رێزگرتنە ل خوینا شەھیدێن کوردستانێ, رێزگرتنە ل خەبات وقوربانیدانا سەدان سالا یا باب وباپیرێن مە, بەرسڤدانە بۆ وان کەسێن دڤێن کوردستانێ وەکو متایەکی بێ بھا بفرۆشن, لەوما ئەم باوەرین ب تینەکا بھێز وگەرم وگورەکا بھێز بدلەکێ پیلایی یێ پری پەیڤا کوردستان خەلکێ مە دێ بەرەڤ سندوقێن دەنگدانێ چیت و دەنگێ خۆ ب پەیڤا(بەلێ) دێ دەت, ئەو پەیڤا سەدان سالە دۆژمن شەری دگەل دکەت ودقورکا ھەڤولاتیێ کوردستانیدا خەندقاندی,ل وێ رۆژێ دێ ئەو پەیڤ ب دەنگ وگازیەکا بلند بێژیت "بەلێ, بەلێ بۆ سەرخوبونا کوردستانێ".