به‌غدا ژی پێدڤى ب نێچێرڤانه‌كێ عه‌رەبە
کارزان فەقێ
چما عه‌ره‌ب و خوه‌دانێن به‌غدایێ گه‌هشتنه وێ راستیێ كو ئه‌و سه‌ربۆر و پلانێننێچیرڤان بارزانی سه‌رۆكێ حكومه‌تا هه‌رێمێ ژ بۆ ئاڤه‌دانكرن و پێشڤه‌برنا هه‌رێما خوه بكارئیناى، هه‌مان رێك ژى ژبۆ به‌غدایێ و پارێزگه‌هێن ئیراقێ پێدڤینه، لێ كا ئه‌و كاریزما؟ ئه‌ڤه‌یه پرسا جه‌وهه‌رى. گه‌له‌ك جاران بۆچوونێن دۆست و دوژمنێن كوردان دبنه حیكایه‌تا په‌یجێن كوردى و ئه‌گه‌ر مرۆڤ ژ ئالیێ ده‌روونیڤه دروست نه‌بیت، باشتر ئه‌وه سه‌ره‌دانا كۆمێنتێن ژێر وان پۆستان نه‌كه‌ت، ب تایبه‌ت ژى پۆستێن سیاسى. دناڤبه‌را ده‌مێن درێژدا هنده‌ك جاران دبینین هه‌لوێسته‌كێ سه‌ركرده‌یه‌كێ عه‌ره‌ب یێ به‌غدا ل هه‌مبه‌رى كوردان بلند دهێته نرخاندن ئه‌و ژى ده‌ما د كه‌نالێن خوه‌یێن عه‌ره‌بیدا په‌سنا رۆل و كاریگه‌ریا حكومه‌تا هه‌رێما كوردستانێ دكه‌ن، ئه‌ڤ ره‌نگێن بۆچوونان د سوشیال میدیا كوردى ب ده‌نگێن نه‌ترس دهێنه‌باسكرن و هه‌ر زوو ب هزار كه‌س دبینن و بۆچوونێن خوه لسه‌ر دده‌ن، به‌روڤاژى ڤێ چه‌ندێ د په‌یجێن عه‌ره‌بی یێن ئیراقێ ب سیاسیێن خایین دهێنه تۆمه‌تباركرن.به‌ریا دوو سالان و ده‌ما سیاسیێن به‌غدا و هه‌ولێرێ رۆژ نه‌بوو دژى ئێك نه‌ئاخڤن، وى ده‌مى په‌رله‌مانتارێ شیعه (فائیق شێخ عه‌لى) د دیداره‌كا خوه دا د ئێك ژ كه‌نالێن ئاسمانى گه‌له‌ك په‌سنا سه‌رۆكێ هه‌رێمێ و سه‌رۆكێ حكومه‌تا هه‌رێمێ و هنده‌ك ژ سیاسیێن كورد كربوو،تشتێ بۆ من جهێ ل سه‌ر راوه‌ستیانێ بوو، ئه‌وه ده‌ما دبێژیت: (سیاسیه‌كێ عه‌ره‌ب ل به‌غدایێ نینه وه‌كو سه‌رۆكێ حكومه‌تا هه‌رێمێ باژارێ خوه ئاڤه‌دان كربیت و به‌ره‌ف پێشڤه بربیت).دناڤا ئالۆزترین و خرابترین ئاستێ په‌یوه‌ندیێن هه‌ردوو حكومه‌تێن به‌غدا و هه‌رێمێ تاكه په‌رله‌مانتارێ عه‌ره‌ب بوو وى ده‌مى ب وى ره‌نگى په‌سنا حكومه‌تا هه‌رێمێ بكه‌ت، ره‌نگه ئه‌ڤ گۆتن ژبۆ كه‌سه‌كى نه سیاسى ب ساناهى ده‌رباز ببیت، لێ ده‌ما سیاسیه‌ك ڤێ گۆتنێ بكه‌ت كو حكومه‌تا وى ب هه‌موو رێكان دوژمنداریا حكومه‌تا هه‌رێمێ دكه‌ت ژبۆى كو بشكێت و په‌شیمانى به‌غدایێ ببیت؛ یان ب ره‌نگه‌كى دى بێژین، ده‌ما سیاسیه‌كێ عه‌ره‌ب دناڤا نه‌ئارامترین ده‌ڤه‌رێن ئیراقێدا پێچه‌وانه‌ى حكومه‌ت و خه‌لكێ خوه دئاخڤیت و پەسنا سه‌رۆكێ حكومه‌تا هه‌رێمێ بکەت، بێگومان ئه‌ڤ هه‌لوێست ئه‌گه‌رێن خوه هه‌نه و پێدڤى راوه‌ستیانه‌كێ یه. باشه، ئه‌گه‌ر هوون ل سه‌ر ڤێ هه‌لوێستێ نه راوه‌ستن، دژى من ژى نه‌بن كو ئه‌ز ل سه‌ر راوه‌ستم، ده‌مێ به‌راوردیه‌كێ دناڤبه‌را ئیراقه‌كا ته‌مه‌ن 96 سالى دگه‌ل هه‌رێمه‌كا 26 سالى دكه‌ین، دێ گه‌له‌ك راستیێن پشت گۆتنا وى كابراى بۆ مه ئاشكه‌را بن، ژ هه‌موویان گرنگتر ئه‌وه كو سالانه به‌غدا ب نه‌ئارامترین پایته‌ختێ جیهانێ دهێته دانان، دگه‌ل دا هه‌ولێر هه‌ڤركیێ ژ بۆ پایته‌ختێ گه‌شتیاریێ وه‌لاتێن ئه‌ره‌بى دكه‌ت، ئه‌ڤێ ژى ژبیربكه‌ن ره‌نگه من زێده‌رۆیى كربیت، لێ كابرایێ په‌رله‌منتار یێ دبینیت ب هزاران گه‌شتیارێن عه‌ره‌بێن ناڤه‌راست و باشورێ ئیراقێ ژبۆ بۆراندنا ده‌مێن خوه‌ش دهێنه هه‌رێمێ و ل جهێن گوازاریێن كوردستانێ به‌ریكێن خوه ڤالا دكه‌ن، د هه‌مان ده‌م دا ل ئیراقا وى ئێك رۆژ بێ په‌قین و شه‌ڤ بێى كوشتن ده‌رباز نابیت، كابرایێ په‌رله‌مانتار خۆش خۆش دهێته هه‌رێمێ و دزانیت سه‌رۆكێ حكومه‌تا هه‌رێمێ چ جۆره ئاڤادانكرنه‌ك ل پارێزگه‌هێن خوه كرینه، باشتر ژى دزانیت ئه‌و پاره‌یێ كو هه‌رێم پێ دهێته ب رێڤه‌برن ل هه‌مبه‌ر بۆدجه‌یا ئیراقێ مێش و گامێشن. ڤێ جارێ نه بتنێ ئه‌و په‌رله‌مانتار به‌لكو جیهان هه‌موودزانن حكومه‌تا ئیراقێدناڤ وه‌لاتێن گه‌نده‌ل و داتایێن سه‌یر و سه‌مه‌ر ل پێشییا هه‌موو جیهانێ دهێت، دوورنابینم ریفراندۆم سه‌ربكه‌ڤیت و جوودابوونا كوردستانێ ببیته كردار، گه‌له‌ك ژ سیاسیێن عه‌ره‌ب یێن ئیراقێ ل گه‌ل مه جوودابوونا خوه ژ وێ ئیراقێ رابگه‌هینن و ب ئێكجارى بهێنه هه‌رێمێ بژین، ئه‌ڤه نه‌گۆتنه‌كا سه‌یره و دیرۆكا ئیراقێ دا گه‌له‌ك جاران چێبوویه، گه‌له‌ك ژ سیاسیێن نها یێن ئیراقێ سالێن به‌رى 2003 ژبلى هه‌ولێرا پایته‌خت چ په‌ناگه‌هێن ئارام ژ بۆ پاراستنا خوه و خێزانا خوه شك نه‌برینه و ده‌مه‌كێ درێژێ ل كوردستانێ ژیاینه، لێ سه‌یر ئه‌وه؛ ئه‌و په‌سن و رێگرتن ژ حكومه‌تا هه‌رێمێ كو ژ نه‌یارێن خوه هایژێ دبین، هێش مه دناڤخوه‌دا ل وى ئاستى نه‌دیتیه.
