ئێک ژگرنگترین گیروگرفتێن ئەڤرۆ جڤاکێ مە توش دبیتی ئەڤەیە خەلکێ ئومێدەکا زۆر یا ب سیاسەتێ ھەیی ول سەرەرایی ھەبوونا گەلەک گیروگرفت وئەو کارێن دھێنە پێش, بەلێ سیاسەتمەدارێن مە پێکڤە درویننە خوار داکو ب دان وستاندنان وڤەکولینێ وان کێشان چارەسەر بکەن, بەلێ چونکە تێگەھشتنەکا زانستی و رامیاری وبابەتیانە بۆ واتایا پەیڤان ودەستەواژە ورستان نینە, پڕانیا جاران ناگەھننە دەرئەنجامێن دیاریکری وباش ودھەمان دەمدا ئەو پەیڤ ڕۆژانە دڕۆژنامە و دەزگەھێن راگەھاندنێ وسایتێن ئەلکترونیدا مە گوە لێ دبیت وب بەرچاڤێن مە دکەڤن یان ژی دخوینین یان ژی ئەو پەیڤ ژلایێ مە بخۆڤە دھێنە بکارئینان وەکو پەیڤێن (دەولەت, حکومەت, سیاسەت, دەستھەلات, ریفراندوم, پارت دیتر), بەلێ ژبەر کو مە زانیاری وزانستەکێ تەڤاڤ ل سەر پەیڤ ورامانا وان نینە داکو بشێن سود ومفایی ژێ ببینین وھەر پەیڤەکێ دجھێ وێ یێ راستەقینەدا بکاربینین, وئەڤە دبیتە ئەگەرێ ھندێ کو بەردەوام ھەمان پەیڤان دژی ئێک ودوو بکاربینین و ھەر ئێک ژمە خۆ دکەتە خودانێ وێ پەیڤ و دەستەواژێ, و ئەم وەسان ھزر دکەین ھەرچیێ ژمە بەری یێ دیتر ئەو پەیڤ ورستە بکارئیناند ئەو خودانێ وێ پەیڤێ یە, نەخێر ئەڤە وەسان نینە بتنێ دبێژنە ڤێ شەرێ پەیڤان و نە زێدەتر.
ئەم دبینین ل ھەر جھو قونچالک وکەنارەکێ ڤێ جیھانێ وب درێژایی و فرەھەیا گویا زەمین, پرانیا وان خەلکێ ل سەر دژین بوینە خودان دەولەت وحکومەتێن تایبەت بخۆە ونەتەوا خۆە ڤە, وبرێکا حکومەت ودەولەتا خۆە یا سەربخو ب رەنگەکی ژ رەنگان کارێن خۆە رادەپەرینن و پاراستینە و وولاتێن دیێن جیھانێ ل دویڤ یاسایێن نیف دەولەتی سەرەدەریێ دگەل دکەن , تەنھا ئەم گەلێ کورد د ڤێ جیھانێدا بێ بار ودبێ دەولەتەکا سەربەخوینە وبێ دەولەت دژین و ئەو وولاتێن ئەم دگەل دژین ل دویڤ پێدڤیاتیا خۆە و حەز وڤینا خۆە سەرەدەریێ دگەل مە و چارەنڤێسێ مە دکەن, ھەتا چارەنڤێسێ مە ژی دیاری دکەن مە ئەنفال وکیمیاباران و شەھید دکەن، وھەر دەما کاودان ودەلیڤێن گونجایی بۆ مە ھاتنە پێش ژبۆ دامەزراندنا وولاتەکێ سەربەخۆ دێ بینین دناڤ مە بخۆە دا ھندەک پارت ولایەن و ب ناڤ رەوشەنبیر وقەلەم ب دەست دێ بنە دارودەست و ئامیرێن دۆژمنان ودۆژمن سیاسەتا خۆە ب وان پەیرەو دکەن وئاستەنگ و بەربەستان دورست دکەن ژبۆ ژبەربرنا وان دەرفەتێن ھاتینە پێش بۆ دامەزراندنا قەوارەکێ کوردستانی, ھەر وەکی دبینین ودخوینین ھەبونا دەولەتێ گەلەک ژ ژیانا ڕۆژانەیا ھاولاتیان فەرترە, چونکە نەبونا دەولەتێ رەنگڤەدانا خۆ ل سەر ھەمی لایەنێن ژیانێ دکەت وبەرف پاش دبەت نەک بەرف پێش, بەلێ ب ھەبونا وولاتەکێ سەربەخۆ دبیتە ھوکارێ سەرکەفتنێ دکاروبار ودابین کرنا خوشگوزەرانیێ وئارامی وتەناھیێ ل دویڤ یاسایێن نیڤ دەولەتی ومافێن مرۆڤی سەرەدەری دێ ھێتە کرن, ول وی دەمی ھەر تاکەکێ وی وولاتی دێ مافێ وەرگرتنا ناسناما کەسیێا نەتەوەیی ھەبیت ودیسان ھەر زارۆکەکێ ژدایک ببیت دێ مافێن وی دپاراستی بن وھەر وەسان وی مافێ خواندنا ب زمانێ زکماکیێ خۆە ھەیە ودیسان وەرگرتنا پاسپورتێ ...تاد, ھەیە.
ل سەری مە بەحسێ واتایا پەیڤان و تێکھەلکرنا وان ژلایێ واتایڤە وبکارئینانا وان ژلایێ خەلکی ڤە, دبنە ئاستەنگ چونکە ژێک ناھێنە جوداکرن و خەلک وەسان ھزردکەت پەیڤا دەولەت (state ) وحکومەت (govenment ), ئێک پەیڤ و ئێک رامان ددەت وپڕانیا مە بێ جودایی بەرێخو ددەنە وان پەیڤان و وەسان ھزر دکەین دەولەت وحکومەت ئێک واتایا یا ھەی, بەلێ دراستێدا وەسان نینە, ئەم گەلێ کورد دھەرێما کوردستانێدا ژسالا١٩٩٢ وپشتی ھەلبژاردنێن پەرلەمانی وبوینە خودان حکومەتەکا تایبەت مە بخۆڤە وتا نوکە ئەڤێ حکومەتێ چەندین کابینێن پێکئیناندین, بەلێ دەرفەت نەھاتیە روخساندن ژبۆ دورستکرنا دەولەتەکا سەربەخۆ یا کوردستانی, واتە مە حکومەت ھەیە نەک دەولەت.
یا خویایە دەولەت ژچوار تشتان پێکدھێت (خەلک, سنور, حکومەت, حوکمرانی), و دیسان ژدەستھەلاتا جھبجھکار و یاسادانان ودادگەھان پێکدھێت, بەلێ حکومەت پێکدھێت ژ کومەکا خەلکێن دیارکری و ب رێکا پروسیسا ھەلبژاردنێ دناڤ کابینەکێدا دھێنە دەست نیشانکرن وھەلبژاردن ژبۆ برێڤەبرنا کاروبارێن خەلکی ل دویڤ یاسایێ دھێنە کرن, بەلێ ئەو نە دەولەتە, بەلکو ھەرێمە, ژبەر ھندێ نوکە دەمێ ھندێ یە ئەم کوردستانی بزاڤێن رژد بدەین ژبۆ دورستکرنا دەولەتەکا کوردستانی وفەرە ئەم ھەمی پێکڤە کار بکەین ژبۆ سەرخستن وبرێڤەبرنا پروسیسا ھەلبژاردن وریفراندومێ یا کو ل بەرە ل ھەرێما کوردستانێ بھێتە کرن, ودڤێت بێ ترس و دوو دلی بزاڤێن پێدڤی بدەین وڤێ دەرفەتێ ژدەست نەدەین وب ھەمی تەخ وچینانڤە بەشداریەکا کارا دڤێ پروسێدا بکەین وببینە پالپشت وھاندەرێن بریارێن سیاسی داکو ئەڤ پروسەیە ب رەنگەکێ رێک وپێک برێڤە بچیت وگەلێ کوردستانێ بریارا خۆە بدەت ژبۆ دورستکرنا دەولەتەکا کوردستانی, وداکو ئەم ژی بشێن دناڤ ئەڤی وولاتیدا بژین و ھەمی مافێن مە یێن ھەڤولاتیبونێ بدەستخوەڤە بینین ومافێن مە دپاراستی بن و ئالایێ کوردستانێ ل پێش چاڤێن دۆژمنێن مە دناڤ ئالایێن نەتەوێن ئیکگرتیدا بھێتە ھەلدان و ب ھەژیت.