نفشێ نھو یێ کوردستانێ زۆر جاران ل گازندە و نفرینا ل سەرکردە و دەسھەلاتێن کوردی یێن بەرێ دکەن ژبەر دوو بەرەکی و خیانەتێ و چوونە ناڤ بەرەیێن دژی بەرژەوەندێن و بدەستڤەئینانا ماف و ئارمانجێن نەتەوی و نشتیمانی ھەر لسەر دەمێ میرگەھێن کوردی و ھەتا سەرھەلدانا پیرۆزا گەلێ کورد ل سالا ١٩٩١ ێ ، ژبەرکۆ زۆر جاران ، کۆر دژی بابی یان برا دژی برای ، فلان سەرۆک عەشیرەت دژی فلان عەشیرەتێ ، فلان سەرکردە دژی فلان سەرکردەی ، فلان حزب دژی فلان حزبێ راوەستایە و ب پشتەڤانیا دوژمنان بووینە ئەگەرێن لناڤ چوون و پێشڤەچوونا دەسھەلاتا کوردی و دۆزا سیاسی یا کوردی چەندین سالا پاش ئێخستیە ، ئەگەر وێ چەندێ بۆ لاوازیا ئاستێ رەوشەنبیری و ھەستا نەتەوی و نشتیمانی یا خەلکی بزڤرینین ، ئەرێ خێرە ئەڤرۆ ل سەردەمێ تەکنەلۆژیایێ و رەوشەنبیریا خەلکی و بلند بوونا ئاستێ رەوشەنبیری و ھەبوونا چەندین گەنال و سازیێن راگەھاندنێ . د ناڤ ھەرێما کوردستانێ پشتی سەرۆک بارزانی ب پشتەڤانیا جەماوەر و زۆر پارتیێن کوردستانی بریارا ئەنجامدانا راپرسیا سەرخۆبوونا کوردستانێ دای ، سەرەرای دەسھەلاتا نیمچە سەربخوو و ھەبوونا پشتەڤانیا زۆر وەلاتا و پارچەبوونا عیراقێ ژلایێ پراکتیکی و سەرکەفتنێن بێ وێنە یێن پێشمەرگەھێن کوردستانی بسەر مەزنترین رێکخستنا تیرۆرستیا جیھانی و دامەزراندنا بنەمایێن دەولەتبوونێ ژلایێ سیاسی و ئابووری و جوگرافی . ھندەک ئالیێن سیاسی و کەسایەتی و سازیێن راگەھاندنێ ھەول ددەن وان ھەلەیێن دیرۆکی دووبارە بکەنەڤە و دۆزا سیاسی یا کوردی بۆ قۆناغێن کەڤن بزڤرینن . دڤێرەدا دیار دبیت ئەڤ ڕکەبەری و دووبەرەکیە دناڤ سەرکردێن کوردستانی دا نە ژ ئەنجامێ لاوازیا ئاستێ رەوشەنبیری و نەتەوی و نشتیمانی بوویە . بەلکی پلانێن دارشتی یێن دوژمن و داگیرکەرا بووینە و ھندەک لایەن و کەسایەتی ل کوردستانێ لسەر ڤی بنەمایە پەروەردە بوونە و د بەرھەڤن بەرژەوەندێن گشتی بکەنە قوربانی بەرچەوەندێن خۆ یێن تایبەت و پیلان و ئەجندایێن دۆژمنا بجە بئینن . ئەگەر نە چما دناڤ ھەرێمەکا ئازاد دا سەرمایەدارەکێ وەکی ( شاسوار عبد الواحد) کو خودانێ چەندین سازیێن راگەھاندنێ یە و مفادارترین کەسێ کوردستانێ ل ئەزموونا دەسھەلاتداریا کوردستانی لڤێ ھەرێمێ ، ب کەمپینێن نەخێر بۆ راپرسیا سەرخۆبوونا لنھو رادبیت ، ئەگەر ب پیلانێن دۆژمنا نەبیت سەرخۆبوونا کوردستانێ دێ چ زیانێ گەھینتە وی ...! . ھەروەسا ھندەک ئالیێن سیاسی ژی دیسان ھەول ددەن وان ھەلەیان دووبارە بکەن و بەھانەیان بۆ پرسا راپرسی و سەرخۆبوونا کوردستانێ دئینن و ژبیرا خۆ و خەلکی دبەن کۆ گەلێ کورد سەرێ سەد سالایە خەبات کریە و قوربانی بۆ سەرخۆبوونێ داینە . ئەگەر دووینێ ب گۆدەتایەکا نافخۆیی یان چوونا لایەنەکی بۆ ناڤ بەرەیێ دۆژمنی شۆرەش و بزاڤا کوردی لاواز ببیت یان ژناڤ چۆ بیت و دەسھەلاتا داگیرەکا بۆ سەر کوردستانێ زڤری بیت ، ئەڤرۆ رەوشا کوردستانێ و دەڤەرێ دقوناغەکا زۆر جودا دایە و مەحالە پیلان و کەمپینێن وان بشێن لسەر ئیرادا گەلێ کوردستانێ زاڵ ببن ژبەرکۆ ھەرێما کوردستانێ ب سیاسەتا سەرکەرفتیانە و پارێزەرا بەرژەوەندێن کوردستانێ و خەلکێ وێ یا سەرۆک بارزانی و سەرکردایەتیا کوردستانێ شیایە ئاستەنگان لھەمبەر پرسا سەرخۆبوونا کوردستانێ راکەن و بنەمایێن دەولەتبوونا کوردستانێ ب پۆلایینی مۆکۆم بکەن و لسەر ئاستێ جیھانی ژی پەیوەندی گەھاندینە وی ئاستێ ھەردەمێ کورد سەرخۆبوونێ رابگەھینن د ئامادەنە دان پێدانێ پێ کەن . چونکی دامەزراندنا دەولەتەکا کوردستانی لڤی دەمی و لڤێ دەڤەرێ فاکتەرێ ئێمناھیا دەڤەرا رۆژھەلاتا ناڤینە و کو ئالۆزیێن وێ جیھان پێڤە حیبەتی کریە . لەوما دبێژینە وان کەس و لایەنێن بۆ بەرژەوەندێن خۆ دژی راپرسیێ رادوەستن یا ئەوێن ھێشتا بریارا داویێ لسەر نەدای ، راپرسی و سەرخۆبوون بریارا تەڤایا خەلکێ وەلات پارێز و نشتیمان پەروەرێ کوردستانێ و پێشمەرگەە و مالباتێن شەھیدایە ، وە بڤێت یان نەڤێت ئەڤ بریارە دێ بجە ھێت و ئەو سەردەم بووری یە بۆ پاراستنا بەرژەوەندێن دۆژمن و داگیرکەرا کورد دژی کوردا بھێتە بکارئینان ، ژبلی کوردێن جاش و خۆ فرۆشێن وەک وە نەبن .