ڕۆژی ٧ی حوزەیرانـی ٢٠١٧، لە سەلاحەدین، نوێنەرە زۆربەی پارتە سیاسییەکان، لەگەڵ جەنابی مەسعود بارزانی سەرۆکی ھەرێمی کوردستان کۆبوونەوە، بە تێکڕای دەنگ، ٢٥ی ئەیلوولی ئەمساڵیان٢٠١٧، وەک ڕۆژی ئەنجامدانی ڕیفراندۆمی سەربەخۆیی لە ھەرێم و ناوچە کوردستانییەکانی دەرەوەی ئیدارەی ھەرێمی کوردستان دیاری کرد، دیاریکردنی ڕۆژێک بۆ ئەنجامدانی ڕیفراندۆم بۆ خەڵکی کوردستان، ڕۆژێکی مێژوویی و گرنگە، شانازییەکی گەورەشە بۆ ئەو لایەنانەی کە بەشداری کۆبوونەوەکە بوون. ڕیفراندۆم، دیموکراسیترین ھەنگاوە بۆ بەدەستھێنانی مافێک کە نزیکەی ١٠٠ ساڵە بە خەڵکی کوردستان ڕەوا نەبیندراوە، ھەنووکە بارودۆخێک بۆ خەڵکی کوردستان ھاتووەتە پێش، ھیچ شتێک لەوە جوانتر نییە ھاونیشتیمانیان خۆیان بڕیار لە چارەنووسی خۆیان بدەن، بە جۆرێک کە داھاتووێکی باشتر و دڵنیاتر بۆ خۆیان و نەوەکانیان دیاری بکەن، کەچی ھەست دەکرێت تاقمێک، لەژێر پەردەی جۆراوجۆردا، دەیانەوێت شکۆی پرسی سەربەخۆیی و دامەزراندنی دەوڵەتی کوردی بچووک بکەنەوە، بەڵام کۆدەنگی و ڕێکەوتنی زۆربەی ھێز و لایەنە سیاسییەکان لەسەر ڕیفراندۆم بەڵگەیەکی زیندووە کە جیاوازی بیروڕای سیاسی، ھەرگیز ناتوانێت پاشەکشێ بە بیری ئازادیخوازی و سەربەخۆیی ئەوانە بکات کە رابردوو، ئێستا، داھاتوویان بۆ ئەو ئامانجە مەزنە تەرخان کردووە، ھەروەھا سەلماندی کە ھیچ پاساوێک ناتوانێت ببێتە ڕێگر لەبەردەم ریفراندۆم و سەربەخۆیی کوردستان. مرۆڤ، پرۆسەیەکی کۆمەڵایەتی ئاڵۆزە، بەپێی جوایەزی کۆمەڵگەی مرۆیی و ئاستی پێشکەوتنی گۆڕانکاریی بەسەردا دێت، مرۆڤ لە ھەر شوێنێکدا، ڕەنگدانەوەی فەرھەنگ و دابونەریتی کۆمەڵگەیە، وەک ئەرکێکی نیشتمانی، وا پێویستە ھەموو ھەوڵ و تواناکان بۆ کۆکردنەوە دەنگی "بەڵێ" تەرخان بکرێن، لە کاتێکدا، ئەگەر ھەر حیزب و تاکێکی گۆرەپانی کوردستان دژی ئەو بڕیارە بێت کە پەیوەندی بە چارەنوسی خەڵکی کوردستانەوە ھەیە، ئیتر دەمامکەکەی دەکەوێت و ڕووی ڕاستەقینەی بۆ خەڵکی کوردستانیش دەردەکەوێت، بۆ گەیشتن بە ئاوات و خەونی لە مێژینەمان، پێویستە گشت ھێز و لایەنە کوردستانیەکان، درک بەو بەرپرسیاریەتیە مێژووییە بکەن، پشتگیری ھەمووان لە پڕۆژەی سەربەخۆیی کوردستان، دەبێتە ھۆی ئەوەی مێژووێکی پڕشنگدار بۆ خۆمان دروست بکەین. ڕیفراندۆم دەنگدانە بۆ چارەسەرکردنی کێشەیەک، کە ھێندەی تەمەنی عێراق کۆنە.
سەباح شێخانی
