لاوێن کوردستانێ ل چەند سالێن بۆری و دۆماھیکێ گڤاشتنەک مەزن لسەر ڕەوشا خۆ یا دەروونی ھەست پێدکەن. ئەو مافدارن. ئەو وەک تەخەک گرنگ د جڤاکێ دا، ژ لایەنێ دەروونناسیێ ڤە، د قۆناغەک ھەستیار دا دژین، و پێدڤیاتیێن وەکی دەرفەتا کاری و دامەزراندنێ و پێکئینانا ژیانا خێزانی و گەلەکێن دیتر کارتێکرنێ لسەر مۆرال و ناخ و دەروونێ وان و پرۆژەیێن وان د و بۆ ژیانێ دا دکەتن، لێ ژبەر ئەگەرێن کاودانێن خرابا ئابووری ل جیھانێ و نەخاسمە بازاڕێ پەترۆلێ و پاشی گڤاشتنێن حکومەتا ناڤند لسەر ئابوورییا ھەرێمێ و بڕینا مووچە و قویتێ کوردستانیان، ب سەدان ھزار گەنج و لاو د ڕەوشەکا خرابا ئابووری و دەروونی دا دژین، و بێ ھیڤیبوون و دلساریێ دەست و پێ ل وان گرێداینە، و خەونێن وان ھەڕماندین و ھەڕفاندینە.
بەلێ ئەو ڕیفراندۆما بۆ سەربخۆییا کوردستانێ بڕێڤەیە، دشێتن وەرچەرخان و گھۆڕینەک مەزن د ژیانا وان دا بینیتە گۆڕێ. ب سەرگرتنا وێ و بوونا وێ وەک دەولەتەک سەربخۆ، دێ چیتە د قۆناغەکێ دا کە سەرەدەرییا (UN) و وەلاتێن جیھانێ دگەل ئێتەگھۆڕین و ڕاستەوخۆ، نەک بڕێکا بەغدا و ھیچ کەس و لایەن و وەلاتەکی، ب دەھا جۆرێن ھاریکاریێن ماددی و جیاواز ھێنەپێشکشکرن، وەک چەوا بۆ یەونانێ ھاتەکرن و ئەو وەلات لسەر لێڤا ھەڕفتنێ بی. ئابوورییا کوردستانێ دێ گەشەیەکا بەرچاڤ بخۆڤە بینیتن و دەرفەتێ دامەزراندن و کاری ل کەرتێن میری و تایبەت و ڤەکرنا سەدان کارگەە و جھێن کاری، بیتە ئەگەر ئاستێ ژیارێ باشتر ببیتن، و لدویڤدا دەلیڤێ پێکئینانا ژیانا خێزانی و ھەڤژینیێ بۆ کچ و کۆڕان زێدەتر بیتن. ئەڤە و ھزاران جۆرێن دیتر دێ ژ دەستکەفتێن سەرکەفتنا ڤێ پرۆسێسێ و بدەولەتبوونا کوردستانێ بیتن.
ڤێجا بلا گەنج و لاوێن کوردستانێ ژ ھەمی ئۆل و ئایین و نەتەوان، ژ ھەمی کەسەکێ گەرم و ب گۆڕتر بن بۆ سەرئێخستنا وێ، چونکی ئەو دەولەت و ئاییندە بۆ وانە، و بێھنا وان یا فرە و قەھرەمانییا پێشمەرگەی و گیانفیدایی و خوینا وان ب ھەوانتە نەچۆیە، و کاریزمایا جەنابێ سەرۆک بارزانی بۆ قۆتانا ھەمی دەرگەھان د ڤێ چەندێ دا، ژ خۆ ڕا نەبوویە، و تنێ دمێنیتن ئەم پترتر خۆ ژ لایەنێ سایکۆلۆژیڤە ئامادە بکەین و ئەوێن نە د ڕێزێن مە دا بھێنە ناڤ ڕێزێ و ملا بدنە ئێک چونکی ئەو دەولەت نە بۆ بەرژەوەندییا کەسەکی بەلکۆ یا ھەمیانە و نەخاسمە یا کۆڕ و کچێن ھەوەیێن گەنج، کۆ ل ھیڤییا ژیانەکا بەختەوەر چرکەیان دھژمێرن.
*بسپۆرێ زانستێن پێداگۆگی و پەروەردەیی/فاکۆلتییا پەروەردە/ زانینگەھا زاخۆ