هەمیشە وا باوە سیاسیی سەركەوتوو كەسێكی ناڕاستگۆیە، ئەو كەسەیە خاوەنی سیاسەتێكی ڕوون نییە. ڕاستە ئەم جۆرە سیاسەتكردنە لە دونیادا هەیە و لای بەشێك لە سیاسییەكانی كوردیش باوە و سیاسەتێكی درۆزنانە پێڕەو دەكەن، دووفاقی و ناڕاشكاویی بە هەڵوێستی سیاسییانەوە دیارە، بە ڕادەیەك خەریكە هەموو هاووڵاتیانی كوردستان هەست بەم ناڕاستگۆیییە دەكەن. وەلێ‌ خۆشبەختانە هێشتا هەندێ‌ سەركردە هەن لە سیاسەتكردندا ڕاستگۆن و باكیان بەوە نییە ئەنجامی ئەو ڕاستگۆیییە چی دەبێت، گرنگ ئەوەی دەیكەن و بڕوایان پێیەتی شاراوە نییە. لەوانە سیاسەتەكانی سەرۆكی هەرێمی كوردستان، كە هەر هەنگاوێك بنێ‌ ڕاشكاوانە و ڕاستگۆیانە دەینێت و باكیشی بە كەس نییە، چونكە ئەوەی دەیكات بۆ بەرژەوەندیی باڵای نیشتمان و داهاتووی كوردستانە. بڕوانن، بۆ پرسێكی گرنگی وەك سەربەخۆیی، بەشێكی سیاسییەكانی كورد چەند دووفاقانە و نابوێرانە مامەڵە دەكەن، كەچی سەرۆكی هەرێم ڕاشكاوانە دەڵێ‌ "كوردستان بەرەو سەربەخۆیی دەبەین و باجەكەیشی هەرچییەك بێ‌ دەیدەین."
بەشێكی زۆری سیاسییەكانی كوردستان وا تێگەیشتوون؛ كڕۆكی سیاسەتكردن درۆكردنە. سیاسیی باش لە دیدی ئەواندا تواناكانیەتی بۆ ناڕاستگۆیی، بۆ زوو وەرگەڕان، بۆ یاریكردن بە چارەنووسی گەل. هەر بۆیە هەموو دۆڕان و شكستێكی وڵات لای ئەوان ئاسایییە و هەمیشە بیانوویەكیان بۆ دۆڕاندنەكانیان هەیە. بەڵام ئاخۆ بە سیاسەتی ناڕاستگۆیی دەكرێ‌ وڵات بونیاد بنرێت، ئابوری گەشەی پێ‌ بدرێت؟ بەو جۆرە سیاسەتكردنە بانەڕۆژێكی پرشنگدار چاوەڕوانی نەوەكانی داهاتوو دەكات؟ نەخێر ئەو جۆرە سیاسەتكردنە وڵات بەرەو هەڵدێر و داهاتوویەكی نادیار دەبات.
بڵاوكردنەوەی ئەوەی كە سیاسەت بریتییە لە درۆكردن، جگە لەوەی بۆ چاندنی وەهمێكە لە بیری هاووڵاتیاندا كە ڕەوایەتییان پێ‌ ببەخشن بۆ هەر جۆرە كردارێك، هیچی دی نییە. هەندێ‌ لە سیاسییەكانی كورد دەیانەوێ‌ تاكی كورد بەوە گۆش بكەن كە درۆكردنەكانیان پایەیەكی بەهێزی سیاسەتە، لە كاتێكدا ناڕاستگۆییی ئەوان وێڕای ئەوەی وڵات لە هەموو ڕوویەكەوە دوا دەخات، متمانە لە نێو چینەكانی كۆمەڵگەیشدا ناهێڵێت. متمانە لە نێوان سیاسییەكان و خەڵكدا كاڵ دەكاتەوە. وێنەیەكی نەگریسانەی سیاسەت پێشان دەدات. ئەی ئەوە نییە زۆرینەی خەڵكی ئەم وڵاتە بە كایەیەكی گڵاو لە سیاسەت تێگەیشتوون.
ڕاستگۆییی سیاسی یەك ئاڕاستەی دیاریكراو بەرەو ئامانج دەگرێتە بەر، لە پێناو بونیادنانی وڵاتێكی بەهێز و دەستەبەركردنی سوودی هاونیشتمانیان، نەك سوودی تایبەتی، بەم پێیە دەبینین سیاسیی ڕاستگۆ بە ڕاستگۆییەكەی دەتوانێ‌ ئابورییەكی گەشەسەندوو، كۆمەڵگەیەكی یەكگرتوو، وڵاتێكی بەرزتر، دونیایەكی جوانتر بۆ هاووڵاتیان دروست بكات.