کۆمەڵی ئیسلامی دەڵێ: جولەکە مافی فەلەستینیەکانیان زەوت کردووە و فەلەستینیەکانیش لە پێناو سەندنەوەی ئەو مافە و گەیشتن بە دەوڵەتی خۆیان هەزاران شەهیدیان داوە، عەرەبیش مافی کوردیان زەوت کردووە و لەو پێناوەشدا دەیان هەزار شەهیدمان داوە و کۆمەڵ دەڵێ: زەمینەی گشتپرسی و راگەیاندنی سەربەخۆیی لەبار نییە، ئەوە لە کاتێکدایە کورد ئەنفال کراوە و فەلەستینیەکان ئەنفال نەکراون، کورد کیمیایی لێ دراوە و فەلەستینیەکان کیمیاییان لێ نەدراوە.
دەوەرە ئەو کەرەی لە قوڕەی دەربێنە! فەلەستینیەکان سەدەیەکی تریش دژی ئیسرائیل بجەنگن نە (١٨٢٠٠٠) کەسیان لێ دەکوژرێ و نە کیمیاییان لێ دەدرێ و نە لە عەشیرتێکدا (٨٠٠٠) نێرەوەزیان لێ زیندە بەچاڵ دەکرێ، کەچی ئەو کۆمەڵە ئیسلامیە و ئەمیرە خۆش خەونەکەیان ژانی ئایدۆلۆژی گرتوونی و داوای دەوڵەتی فەلەستینی دەکەن، بەری نەتەوەییان فڕی داوە و چاوەڕوانیش ناکرێ بۆ تەنیا جارێکیش بە هەڵوێستی کوردایەتی دووگیان ببن و ئەوەتا دەڵێن: زەمینەی گشتپرسی لەبار نییە و کاتی دەوڵەتی کوردستان نەهاتووە.