(مەسعوود بارزانی)، سەرۆکی هەرێمی کوردستان، لەوەڵامی چەند حزبێکی عێراقی پەیامێک بڵاودەکاتەوە و چەند خاڵێک دەخاتە بەرباس، بەتایبەت ئەوەی پەیوەندی بەحکومەتی عێراقەوە هەیە، لە خاڵێکیاندا ئاماژە بەوە دەکات، بەغدا سیاسەتی پەراوێز خستنی بەرانبەر بە کوردستان پەیرەو کردووە، بەتایبەت لە ئاستی دوورخستنەوەی کوردستان لە دامەزراوەئەمنییەکانی عێراق و سلکی دیپلۆماسی و بڕینی قوتی خەڵکی کوردستان و نەبوونی شەراکەتی هاوبەش و دامەزراندنی بیرۆکەی زۆرینەی سیاسی کە کوردستان و بارزانی رەتی دەکەنەوە، لەکۆتایی بەیاننامەکەدا (بارزانی)، جەخت لەوە دەکاتەوە (کوردستان لەگەڵ ئارامی و پێکەوە ژیانە، بەڵام زمانی هەڕەشە و ئینکاری لەکەس قبوڵ ناکەن)، دەپرسین قسەکانی بارزانی بەرانبەر بەبەغدا لەم کاتەدا بۆ؟ لە ڕاستیدا وەڵامی پشت بەیاننامەکە ئەوەیە کە نە جارێکی دیکە هەرێمی کوردستان لەگەڵ عێراق دەمێنێتەوە، نە کوردستانیش بەتەمایە لەسەر بابەتەکانی پێشوو لەگەڵ بەغدا گفتووگۆبکاتەوە، لەوەش دەچێت ئەم جارە (بارزانی) تۆپەکە بخاتە مەیدانی حکومەتی عێراق، ئەوەش دەخوێنرێتەوە کە سەرۆکی هەرێم دەیەوێت خەڵکی کوردستان لە سیاسەتی بەغدا هۆشیاربکاتەوە، بەغداش بخاتە بەردەم وەڵامی پرسیارێکەوە، کە ئەگەر پێکەوە ژیانتان دەوێت ئەی چۆن عێراقێکی دامەزراوەیی کە بەپێی دەستوور هەنگاو بنێت بە واژۆیەک بودجە و مووچەی خەڵکی کوردستان دەبڕێت؟ دواتر دەبێت بەغدا یان وەڵامی بارزانی بداتەوە، یا دەبێت ڕوونکردنەوە بە خەڵکی کوردستان بدەن کە بۆچی ئەو سیاسەتەیان بەرانبەر بە کوردستان بەکارهێنا؟.

لەوە دەچێت بەشێک لە پەیامەکە بۆئەوەبێت کە هێشتا بەغدا هەندێک کارت هەیە، لەدژی ڕیفراندۆم تاقی نەکردوەتەوە، بۆیە بارزانی پێشوەختە باس لە زمانی هەڕەشە لەلایەن بەغداوە دەکات، پرسیاری جددی ئەوەیە کە ئەگەر هاتوو، لەبەغداوە پەنابرایە بەر هەڕەشە بۆ راوەستانی ڕیفراندۆم؟، سەرکردایەتی سیاسی کوردستان ملکەچی ئەو هەڕەشانە دەبێت؟ بارزانی دەستپێشخەری کردووە لەجیاتی هەموو حزبەکانی کوردستان وەڵامی داونەتەوە، خۆ ئەگەر لەناوخۆی کوردستانیش هەڵوێستێکی پێچەوانەی ئەو هەڵوێستە هەبێت رەنگە دواجار بکەوێتە بەردەم ڕەخنەی خەڵکەوە، بۆیە بارزانی هەم بەغدا و هەم هەندێک حزبی کوردستانی خستووەتە هەڵوێستێکی قورسەوە، دواجار خەڵک دەبێتەدادوەر.
لەوە دەچێت ئەمە یەکەم بەیاننامەی دەستپێکی ڕێگای ڕیفراندۆم بێت، لەئەگەری هەر وەڵامدانەوەیەکی بەغدا دواجار باڵانسەکە گۆڕانکاری بەسەردادێت، چونکە پەیوەندی هەرێمی کوردستان و بەغدا بەهەستیارترین کاتدا تێدەپەرێت، بەغدا دەیەوێت بەهەمووشێوەیەک بەرەنگاری جیابوونەوەی کوردستان ببێتەوە، کوردستانیش لە لێواری بڕیاری یەکجارییە، لەهەمووی گرنگتر بەغدا ناتوانێت رێگری لە کوردستان بکات، بە گفتووگۆش کارلەکار ترازاوە، لەوە دەچێت بڕینی قوتی خەڵکی کوردستان لەلایەن بەغدا تەواو بێ متمانەی لەنێوان هەولێرو بەغدا دروست کردبێت، کاتێک بارزانی دەلێت لەچوارچێوەی دەوڵەتێکدا چۆن دەکرێت بەنیوە واژۆیەک قوتی خەڵکی کوردستان ببڕدرێت؟، پەیامەکە خەڵکی کوردستان رادەچەڵەکێنێت کە گەرەنتیان هەیە لەگەڵ بەغدا بژین و جارێکی دیکە ئەوەیان بەسەر نەیەتەوە؟.