سروشتێ ژیانی ل کوردستانێ جیاوازە ژ وەلاتێن ئەورۆپی، و چۆنا گەلەک کەسان ژ وەلاتێ مە بۆ وان وەلاتا ژی نەشیا ھندەک ساخلەتێن کۆژەک بگھۆڕیتن. ئێک ژ وانا زێدە ھەستیاری و بندەستیا کوردەکییە بۆ گۆتنکێت خەڵکێ، ھەتاکۆ ب وان گۆتنکا، ھەکەر چی خەلەت و نەپەیوەندار ژی بن، خەلک دلڤت و دھێت و دچت و دبت و دنڤت و دخۆت و دمرت و ...! ھەتا وی ئاستی لنک وی" عەزابا وان قەسا ش یا جەھنەمێ مەزنترە"!
لڤێرێ مرۆڤ وەسا نەھاتە پەروەدەکرن یێ ئازاد بیتن د ھزرکرن و کارێ خۆ دا، بەلکۆ یێ بوویە بەندێ قەسێت خەلکێ. بمخابنی ڤە لنک وی ئەو قەسە پیڤەرێن ژیانا وینە، نەک دیتن و فەلسەفە و بۆچۆنا وی بخۆ. ھزاران کارەساتێت جڤاکا مە بەرھەمێ وێ جۆرە ھزرکرنا شاش و خەلەتن. لدەمەکی مرۆڤ دڤیا وەکی چەوا ئەو ھزردکەتن و ب ڕاست دزانیتن بیت، چونکی کەس ھندی وی بخۆ ئاگەھداری ڕەوش و کاودانێت ژیانا خۆ و مالباتا خۆ نینە. بەلێ ئەڤرۆ کەس نەشێتن وەکی خۆ بژیت چونکی خەلک و قەسەلۆکێت وانا بۆ ڤی مرۆڤی گرنگن ھەتاکۆ ھەکەر ھیچ ڕامانەک نەبت یان ژی کارتێکرنێ ژی ل وی نەکەن. و ئەڤە کارەساتەک مەزنە و وەلاتێن پێشکەفتی ئەڤ قۆناغە تاڕادەک مەزن یا بڕی و ھاڤێتی. بەلێ ئەم چ جاران پێش و سەرناکەڤین ھندی ئەم خۆدانێ ڤێ ھزرکرنێ و بندەستێ گۆتنکێت خەلکێ بین. پێدڤیە ئەم خۆ بگھۆڕین.
تاکێ کوردی د ھەر تشتەکی یێ لبن گڤاشتنا وان گۆتنکا، لدەمەکی د کاودانەکێ وەک رفراندۆما کوردستانێ ئەو دشێتن بخۆ باشتر ژ ھەر کەسەکی بزانیتن خێر و مفایا وی یا د سەرکەفتنا وێ دا و بەلگە ژی ھەمی ئەو تاوانن یێن ھندە سالە خەلکێ دیتین. بلا وەکی گەلەک رەفتارێت خەلەتێت پێشتر عەقل و ھزرکرنا وان بخۆ ڕێڤەبەرێ کارێ وان بیتن نەک گۆتنکا کەسەکی. *بسپۆرێ زانستێن پێداگۆگی و پەروەردەیی/فاکۆلتییا پەروەردە/ زانینگەھا زاخۆ