ریفراندۆمێ ژ به‌رژه‌وه‌ندێن به‌رته‌نگ ده‌ربێخن
كاوه ئالیخان
ریفراندۆم پرسه‌كه ب هه‌ر تاكه‌كێ كورد ڤه گرێدایه بۆ وێ یه‌كێ پاشه‌رۆژا خوه و داهاتێ خوه دیاربكه‌ت، ئه‌وژى كو ل رۆژا بیست و پێنجی ئیلۆنا ئه‌ڤ ساله هه‌موو تاكه‌كێ كورد به‌ره‌ڤ سندوقێن ده‌نگدانێ بچن و ب به‌لێ ده‌نگێ خوه بده‌ن، ل ڤێره گه‌له‌ك وێ پسیارێ دكه‌ن و بێژن بۆ كێ ده‌نگی بده‌ن، پێدڤییه هه‌ر تاكێ كورد یێ شاره‌زا بیت و نه‌بیته ئامراز د ده‌ستێ هند هێزێن ل دژى خواستێن گه‌لێ كورد كاردكه‌ن، چونكه بریاره‌كه ب من و ته و هه‌وه‌ڤه گرێدایه نه چ حزب و ئالیه‌كی یه.
ئه‌گه‌ر ته‌ماشه‌ى گوتارا نێچیرڤان بارزان سه‌رۆكێ حكومه‌تا هه‌رێما كوردستانێ ژى بهێت كرن یا د چلینیا محه‌مه‌د عه‌زیز دا هاتییه خواندن، دوپاتكر كو سه‌رخستنا پرۆسه‌یا ریفراندۆمێ سه‌ركه‌فتنا هه‌موو ئالیانه، واته سه‌ركه‌فتن نه یا پارتى دیموكراتى كوردستانه به‌لكو سه‌ركه‌فتنا ته‌ڤ حزب و هێز و خه‌لكێ كوردستانێ ب ئۆل و نه‌ته‌وه‌یێن خوه‌ڤه‌یه.
هنده‌ك هێزێن سیاسی یێن كوردستانێ ژى پرسا ریفراندۆمێ ب هند پرسێن دی یێن گرێدایى به‌رژه‌وه‌ندیێن وان یێن سیاسی ڤه گرێدایه، واته به‌رژه‌وه‌ندێن خوه ب به‌رژه‌وه‌ندێن نه‌ته‌وه‌یێ یێن گه‌لێ كورد ڤه گرێداینه، ب دیتنا من ئاستێ تێگه‌هشتنا خه‌لكی ژى گه‌هشتییه وى ئاستى كو ئێدی هزر ل مافێن خوه بكه‌ت دوور ژ هزرێن به‌رته‌نگ، چونكه خه‌ونا هه‌ر تاكه‌كێ كورد ئه‌و بوویه سه‌ربخوه بژیت و سه‌رۆك و ئالا و ده‌وله‌تا خوه هه‌بیت كو ب درێژییا دیرۆكێ شوره‌ش بۆ ده‌ستڤئینانا وان كرینه.
راسته ده‌ستێن ده‌ره‌كی و نه‌حه‌ز ناخوازن ریفراندۆم بهێت كرن، هه‌ر جارێ ژى ب به‌هانه‌یه‌كێ تشته‌كی دئینته پێش بۆ وێ یه‌كێ دوبه‌ره‌كیێ دناڤبه‌را هێزێن كوردی دا دروست بكه‌ت، وه‌سا بده‌ت دیاركرن كو ریفراندۆم بۆ حزبه‌كێ یه دهێت كرن، ل ڤێره دڤێت ئه‌م د هشیار بین چونكه ده‌نگدانا ته بۆ ریفراندۆمێ بۆ چ حزبا نینه، به‌لكێ تو دێ پاشه‌رۆژا خوه و دوورخستن ژ ده‌ستێ تیرۆرێ و پێشخستنا ئابۆر و پیشه‌سازییا وه‌لاتى پێ دیاركه‌ى.
ل داویێ دبێژم پێدڤییه هه‌موو تاكێ كورد بۆ وێ پرسێ كار بكه‌ت، ئێكگرتنه‌كێ دروست بكه‌ن و ب دروستى دوژمن و نه‌حه‌زێن ملله‌تێ كورد بهێن نیاسین، ل وى ده‌مى خه‌ونا هه‌موو كورده‌كی یا كو نها پترییا هێزێن كوردى كار بۆ دكه‌ن ب ده‌ستڤه هێت، ئه‌و ژى ب پشكدارییا هه‌ر تاكه‌كێ كورد د ریفراندۆما بیست و پێنجی ئیلۆنا ئه‌ڤ ساله و ده‌نگی ب به‌لێ بده‌ت.
