راسته‌ ریفراندۆم بۆ هه‌موو پارتییه‌كا كوردستانێ كو هه‌ست و ڤیانه‌كا نه‌ته‌وه‌یى لده‌ف هه‌بیت پرۆسه‌یه‌كا دیرۆكى و گرێدایى ب پاشه‌رۆژا ملله‌تى یه‌، لێ دیسا ڤێت ژبیر نه‌كه‌ین كو دو به‌رسڤ د پرسیارا رۆژا ریفراندۆمێ دێ هه‌بن (به‌لێ و نه‌خێر) هه‌ر چه‌نده‌ ب باوه‌را من هه‌تا رێژه‌یه‌كا مه‌زن دێ به‌رسڤ ئه‌رێ بیت لێ دێ مه‌ به‌رسڤێن نه‌خێر ژى هه‌بن كو ڤێت هه‌ر نوكه‌ كار لسه‌ر رازیكرنا ڤان ده‌نگێن نه‌خێر بهێته‌كرن بۆ هندێ ئه‌و ژى ب به‌لێ به‌رسڤێ بده‌ن، لێ ئایا ب گۆتنا جڤینان و تۆمه‌تێن گران دێ شێین وان رازى بكه‌ین كو ده‌نگێ خۆ ب ئه‌رێ بده‌ن؟ هه‌لبه‌ت نه‌خێر چونكو دێ پتر ئالۆزى چێبن و ركمانى د ڤى بابه‌تى دا دێ په‌یدا بیت.

باشترین رێك بۆ رازیكرنا ڤان ده‌نگێن نه‌خێر، نێزیكبوونا پارتێن سیاسى یه‌ ب تایبه‌ت د پرسه‌كا گرنگ یا ب ڤى ره‌نگى و رێكا دى ژى ئینانا هه‌موو به‌لگه‌یێن دیرۆكى و هه‌نۆكى بۆ رازیكرنا وانه‌ یان ژى باردۆخێ نه‌خۆش یێ سێ سالێن بۆرى كو ب سه‌رێ هه‌رێمێ دا هاتى بۆ بهێته‌ رۆهنكرن كا ئه‌گه‌ر چ بووینه‌ و چ كاره‌ك بۆ چاره‌كرنا وێ هاتییه‌ كرن، لێ گۆتنا جڤینان و پالدانا تۆمه‌تێن گران بۆ ئێكدو دێ دو به‌ره‌یێن به‌لێ و نه‌خێر بۆ ریفراندۆمێ په‌یدا بن و ئێدى ركمانییا حزبى و جڤاكى ژى دێ روودده‌ت كو د به‌رژه‌وه‌ندییا كه‌سێ دا نینه‌.

ڤێت هه‌موو كه‌سه‌ك بۆ هه‌بوونا ده‌نگێن نه‌خێر بۆ ریفراندۆمێ یێ به‌رهه‌ڤ بیت و نابیت كه‌سایه‌تییا ئێكدو بشكێنین و هزر ل پشتى ریفراندۆمێ ژى بكه‌ین، چونكو هه‌موو كورده‌كێ دلسۆز سه‌ركه‌ڤتنا كوردان دڤێت لێ دیاره‌ به‌هانه‌یه‌ك به‌رده‌ست هه‌یه‌ كو ده‌نگێ نه‌خێر هه‌لدبژێریت له‌وا پێدڤییه‌ كار بۆ زڤراندنا باوه‌ریێ بهێته‌كرن، بۆ نموونه‌ بێژینێ كو ب هه‌بوونا ده‌وله‌تا كوردى دێ پتر شێین نافمالا كوردى رێكئێخین و ژلایێ ئابوورى و ئێمناهیڤه‌ پتر یێ پاراستى و ب هێز بین و دڤێت بۆ ره‌وشێن گران ژى به‌رهه‌ڤ بین چونكو سه‌ربه‌خۆیى جاران پێدڤى ب دانا قوربانیێ یه و ئه‌و هه‌موو شه‌هید و بریندار ژى هه‌ر بۆ سه‌ربه‌خۆیێ هاتینه‌دان.
ژلایێ خۆڤه‌ كاراكرنا په‌ڕله‌مانى ژى دێ پتر سه‌نگ و بهاى بۆ ریفراندۆمێ په‌یدا كه‌ت و و حزبێن نوكه‌ دودل بۆ ریفراندۆمێ ئێدى رازى ببن و پشتگیرییه‌كا ته‌مام بۆ بكه‌ن و دیسا دێ بیته‌ ئه‌گه‌رێ هندێ رێكخراو و وه‌لاتێن جیهانى پتر ئه‌نجامێن ریفراندۆمێ په‌سه‌ند بكه‌ن و رێزه‌كا مه‌زنتر ل بڕیارا گه‌لێ كورد بكه‌ن.