گەلێ کورد و کوردستانیان ب درێژاھیا دیرۆکێ خەون ب سەرخۆبوونا کوردستانێ دیتی نە و قوربانیێن بێ وێنەژی ژ پێخەمەت داینە ، ئەگەر ئەو قوربایێن خەلکێ کوردستانێ ژبووی سەرخۆبوونێ دای بەھرا ، پێتڤی بوو بەری سەد سالا گەلێ کورد بڤی مافی شاد ببا . چونکی پرانیا دەولەتێن ئەڤ مافە بدەستڤەئینای ناگەھنە چاریکیا وان قوربایێن گەلێ کورد داین و زۆر وەلات ب راپرسیەکا ئاشتیانە ، یان خۆ نیشاندانەکێ ، یان سەرھەلدانەکا جەماوەری گەھشتینە سەرخۆبوونێ . لێ گەلێ کورد ل باشوورێ کوردستانێ لسەر دەستێ رژێمێن کەڤن و نووی ێن عیراقێ ب سەدان ھزار شەھید داینە و توشی ئەنفال و کیمیا باران و جینۆسایدێ و وێرانکرنێ و دەربدەریێ بوونە . لێ قەدەرا کوردا بوویە سەرخۆبوونا وان د بەرژەوەندێن وەلاتێن زل ھێز و ھەرێمی نەبوویە و وەکی پێتڤی کاودان د بەرجەستە نەبوونە . ڕەنکە فاکتەرێن نافخۆیی ژی ھندەک جاران ئەگەرێن لدەست دانا ڤی مافێ ڕەوای و سرۆشتی بن . لێ ئەڤرۆ پشتی دەسھەلاتا خۆ بخۆ یا ھەرێما کوردستانێ پشتی سەرھەلدانا پیرۆزا گەلێ کورد ل سالا ١٩٩١ و پاشان دامەزراندنا پەرلەمان و حکومەتا ھەرێما کوردستانێ و سەرۆکاتیا ھەرێمێ گەلێ کورد شیا روویێ گەشێ کوردستانێ ژلایێ شێوازێ کارگێری و پرنسیپێن دیموکراسیەتێ و مافێ مرۆڤ و ئێمناھیا دەڤەرێ نیشا جیھانێ بدەت ، ب تایبەت پشتی سەرکەفتنێن بێ وێنە یێن پێشمەرگەھێن کوردستانێ بسەر گرۆپێ تاریک پەرست و تیرۆرستێن جیھانیا داعش . لەما ئەڤرۆ ب سیاسەتا سەرکەفتی یا ھەرێما کوردستانێ ژلایێ دبلۆماسی و ئابووری ب بەرنامێ سەرۆک مەسعۆد بارزانی دەرفەتا سەرخۆبوونا کوردستانێ دابین بوویە و جیھان ژی دیدەڤانیێ لسەر ڤێ چەندێ ددەت ، چونکی دەولەت و حکومەتا عیراقێ یا پشتی سالا ٢٠٠٣ ێ ژی ھێشتا لسەر شۆفینیەتا خۆنە بەرامبەر گەلێ کورد و داکۆکیێ لسەر سەرەدەریا وەلاتیێن پلە دوو و ئەز باوەر ناکەم ل چ جار بھێـە گۆڕین ژی ب رێژەیەکا ھەری کێم نەبیت لسەر ئاستێ ئێک ل مەلیۆنا تەخا رەوشەنبیرێن عەرەب ، مەحالە سیاسیێن عەرەبێن عیراقێ بەرامبەر گەلێ کورد فاما دیمکراسیەتێ ژی بکەن . داخۆیانیێن (عەمار ئەلکەیم ) کو ب نزیکترین کەسایەتیێ ئایینی و سیاسیێ عەرەبێن شیعە دەل کوردا دھێتە ھژماردن ، ب راشکاوەنە ھەلویستێ خۆ دژی راپرسیا سەرخۆبوونا کوردستانێ دیار کر ، ئەگەر دۆستێن مە یێن عەرەب بڤی رەنگی بن ئەرێ یێن دیتر دێ چ ھەلویست ھەبیت ...!؟ . ئەڤ پشتەڤانیا نیڤ دەولەتی بۆ کوردستانێ و ھەلوەشیانا عیراقێ و زەنگینیا کوردستانێ لایێ سامانێن سرۆشتی و وزێ و رژدیا خەلکێ کوردستانێ ب ھەستەکا نشتیمانی لسەر ئەنجامدانا راپرسیا سەرخۆبوونا کوردستانێ دەلیڤەیەکا زێرینە بۆ خەلکێ کوردستانێ کۆ بمافێ سەرخۆبوونێ شاد ببیت . زۆر وەلاتێن جیھانێ ژی د وێ باوەریێ دانە دەولەتەکا کوردستانی فاکتەرێ ئارامی و تەناھی و دیموکراسی بوونا رۆژھەتا ناڤینە و ئەگەرێ ڤەراندنا ئابووری یە لسەر ئاستێ جیھانێ . لەوما پێتڤی یە ھەمی ئالیێن سیاسی یێن کوردستانێ پالپشت و ھاریکار بن بۆ سەرکەفتنا پرۆسا راپرسیێ ب دەنگێن بەلێ ، نەبنە ئەگەرێن لدەست دانا ڤێ دەلیڤێ بۆ بەرژەوەندێن خۆ یێن حزبی و کەسی و ھندەک وەلاتێن ھەرێمی وەک عیراق و ئیرانێ . ئەگەر نە ئەو ھێز و لایەنێن دژی راپرسیا سەرخۆبوونا کوردستانێ رادوەستن دێ کەڤنە بن نفرینێن خەلکێ کوردستانێ و دیرۆکێ و دلۆڤانی پێ ناھێتە برن و وەکی کورد و کوردستانی ناھێنە ھژماردن . راستە نھو ناکۆکیێن سیاسی دناڤبەرا ھندەک حزبێن کوردستانێ ھەیە لێ بەرژەوەندا گشتی یا نشتیمانی و سەرخۆبوونا کوردستانێ زۆر ل وان ناکۆکیان فەرتر و پێشترە .