ئەوەی دوو رۆژە لە سلێمانی پەکەکە و کلکەکانی و هەندێ لایەنی تری کوردستانی خۆیان پێوە سەرقاڵ کردووە و ناویان ناوە کۆنگرەی نەتەوەیی، لە راستیدا سووکایەتی کردنە بە یەکێتی نەتەوەیی، چونکە بوونی پەکەکە لە کۆنگرەیەکدا کە باس لە یەکێتی نەتەوەیی و ئامانجە نەتەوەییەکان بکات، وەک ئەوە وایە ئەبوجەهل لە کەعبەدا پێشنوێژی بۆ موسڵمانان بکات، ئەوەش جگە لە سووکایەتی کردن بە یەکێتی نەتەوەیی هیچ مانا و لێکدانەوەیەکی تر هەڵناگرێ, ئاخر حزبێکی وەک پەکەکە بە بینینی ئاڵای کوردستان قەڵس دەبێ، بڕوای بە سەربەخۆیی کوردستان نییە و بە ئاشکرا دەوڵەت رەت دەکاتەوە و دژیشی دەوەستـێ، ئەی بوونی کۆنگرەی نەتەوەیی ئەگەر بۆ سەربەخۆیی و دەوڵەت نەبێ، بۆچییە و گرنگی لە کوێ دایە؟
پەکەکە لە هەر بەشێکی کوردستان کلکێکی درووست کردووە و دژ بە حزبەکانی تری ئەو بەشەی کوردستان رایدەوەشێنی، لە باکوور هیچ حزبێکی کوردستانی قبوڵ ناکات، لە رۆژهەڵات بنکەکانی لەگەڵ سوپای پاسداران تێکەڵ کردوون و رێگریش لە چالاکی سیاسی و سەربازی حزبە کوردیەکانی ئەو بەشەی کوردستان دەکات، لە رۆژئاوا لەگەڵ سوپای ئەسەد هاوپەیمانە و بنکە و بارەگای حزبە کوردیەکان دادەخا و ئەندامانیان زیندانی دەکات، لە باشوور دژی گشتپرسییە و دەوڵەت بە ئێکسپایەر ناودەبات، لەگەڵ حەشدی شەعبیش هاوئامانجە و هیلالی شیعی بۆ ئێران درووست دەکات، تەنها رژێمی تورک بە دوژمن دەزانێ و لە تورکیا بڕوای بە خەباتی چەکداری هەیە، لەگەڵ رژێمەکانی ئێران و عێرق و سوریاش هاوپەیمانە و دژ بە خەباتی سیاسی و سەربازی کوردانی ئەو سێ بەشەی کوردستانیش دەوەستێتەوە، جا بەو هەموو تایبەتمەدیانەی پەکەکە دەپرسم: ئایا بوونی پەکەکە و کلکەکانی لە کۆنگرەی نەتەوەییدا سووکایەتی کردن نییە بە یەکێتی نەتەوەیی و ئامانجە نەتەوەییەکان؟