ئێك ژ تایبه‌تمه‌ندى یێن حكومه‌تا هه‌رێما كوردستانێ كو خواست و كه‌لتورێ نه‌ته‌وه‌یا كورد ب پراكتیك ژ كه‌لتورێن وڵاتێن رۆژهه‌ڵاتا ناڤین ب گشتى جودا دكه‌ت ئه‌وه كو د خراپترین دۆخێ خوه یێ ژیانێدا هه‌مبێزا خوه ژ بۆ خه‌لكێن به‌له‌نگاز و سته‌م لێكرى ڤه‌دكه‌ت و هه‌رده‌م هانده‌رێ پێش ئێخستنێ و هه‌ستانا دووباره یا ژیانێ یه، ل سه‌رده‌مێ شێخ عه‌بدالسه‌لام بارزانى و شێخ ئه‌حمه‌دێ بارزانى و بارزانى یێ نه‌مر هه‌تا نها هه‌ر ل ڕزگار كرنا ئه‌رمه‌نیان ل ژێر گڤاشتن و كۆم كوژییا عوسمانیان و پشته‌ڤانیا نه‌ته‌وه‌یا جوى (ئیسرائیلى) مینا نه‌ته‌وه‌یه‌كا سته‌م لێ كرى، كوردان په‌یام گه‌هاندییه جیهانێ كو د ناخێ نه‌ته‌وه‌یا كورددا نه‌ته‌وه‌و بیروباوه‌رێن ئولى مرۆڤان ژ هه‌ڤدوو جودا ناكه‌ت به‌لكى بتنێ مرۆڤایه‌تییه رولێ خوه ل هه‌مبه‌ر جودا كرنا مرۆڤاندا دبینیت، هه‌تا نهاژى سه‌دان ئاواره‌یێن نه‌ته‌وه‌یا عه‌ره‌ب ل سه‌ر هنده‌ك سنورێن ولاتێن عه‌ره‌بى برسى و بێ خودان دنالینن لێ وڵاتێن عه‌ره‌بى نه‌شیاینه ب ئه‌ركێ خوه یێ مرۆڤى و نه‌ته‌وه‌یی ڕاببن و ئه‌وان ئاواران بحه‌وینن دده‌مه‌كێدا وڵاتێن عه‌ره‌بى خوه‌دى سه‌رمایه‌كێ مه‌زنن و بێ كو گڤاشتن ل سه‌ر ئابوورێ وان چێ ببن دكارن ب ئه‌ركێ خوه یێ مرۆڤى و نه‌ته‌وه‌یی ڕاببن، گه‌له‌ك ولاتێن عه‌ره‌بى كو ده‌هان ساڵن د سه‌ربخوه‌نه نه‌شیاینه مینا هه‌رێما كوردستانێ ببنه خوه‌دى فه‌رهه‌نگێ پێكڤه ژیانا نه‌ته‌و ئایین په‌رستان و رێزگرتن ل مافێن ژنێ بن، لێ هه‌رێما كوردستانێ به‌رۆڤاژى كه‌لتورێ وڵاتێن ده‌وروبه‌ر سه‌خمه‌راتى هه‌بوونا شه‌ڕه‌كێ خویناوى و بڕینا بۆدجێ هه‌رێما كوردستانێ و هه‌بوونا قه‌یرانه‌كا مه‌زن یا سیاسى و ئابوورى، ب ڕێژه‌یا ئێك ل سه‌ر سێیا نێشته‌جێبوو یێن خوه ئاواره حه‌واندن كو پڕانیا وان ئاواره‌یان عه‌ره‌ب بوون و ل سه‌رده‌مێ خوه‌ژى ب گشتى سته‌مه‌كا مه‌زن یا ل نه‌ته‌وه‌یا كورد كرى و دبیت پڕانیا وان ل سه‌رده‌مێ شوڕشێ چه‌كدار بن ل دژى نه‌ته‌وه‌یا كورد.
هه‌ر ل سه‌ر درێژه پێدان ل سه‌ر وى كه‌لتورێ مرۆڤ دوستیێ نێچیرڤان بارزانى دهه‌ر ده‌لیڤه‌یه‌كا بو دهێته ڕه‌خساندن ب كردار ته‌كه‌زێ ل سه‌ر فه‌رهه‌نگێ مرۆڤ دوستیێ دكه‌ت و مه‌زنترین رول د حه‌واندنا ئاواره‌یاندا هه‌بوو، هه‌روه‌سا مافێن ژنێ ژى مینا پشكه‌ك ژ خواست و بزاڤێن سه‌رۆكێ حكومه‌تێ ژ بۆ په‌ره‌پێدانا كه‌لتورێ مرۆڤ دوستیێ یه‌و هه‌رده‌م پشته‌ڤانییا ب هێزكرنا ده‌روون و كه‌سایه‌تییا ژنێ دكه‌ت دكه‌ت به‌رۆڤاژى كه‌لتوره‌كێ سه‌قه‌تێ رۆژهه‌لاتا ناڤین ب گشتى كو گرنگى ب شیانێن ژنێ ناهێنه دان ب تایبه‌ت ژ لایه‌نێ ئیدارى و سیاسى و ڕێڤه‌برنێدا، بێ گۆمان ئه‌ڤ چه‌نده‌ژى ژ لایێ وڵاتێن پێشكه‌فتى یێن جیهانێ جهێ پرسیاره‌كا ڕژد و ل سه‌ر ڕاوه‌ستیانێ یه. پێشوازییا نێچیرڤان بارزانى سه‌رۆكى حكومه‌تا هه‌رێما كوردستانێ ژ كچه‌كا پاكستانى كو بوێرى و شیانێن وێ فاكته‌رێن ڕێزگرتنا وێنه ژ لایێ هه‌رێما كوردستانێڤه، بێ گۆمان ئه‌ڤ سیاسه‌تا حكومه‌تا هه‌رێما كوردستانێ وێ چه‌ندێ دیار دكه‌ت كو ئه‌گه‌ر وڵاتێن جیهانێ ڕێزێ ل خواستێن گه‌لێ كورد بگرن و ده‌لیڤه چێ ببیت ل ژێر سته‌مێن وڵاتێن داگیركه‌ر ڕه‌ها ببن، ل ده‌ف نه‌ته‌وه‌یا كورد توخیب و دویرى بۆ رێزگرتن و پشته‌ڤانیا ژنێ و مافێن مرۆڤان كاریگه‌ریێ ناكه‌ن و دێ شێن شێوازه‌كێ سه‌رده‌میانه و جوانێ دیموكراسیه‌تێ و پێكڤه ژیانێ نیشا جیهانێ ده‌ن كو ئه‌ڤ چه‌نده ببیته بناغه‌و نمونه‌یه‌ك بۆ گوهارتنا هنده‌ك كه‌لتورێن سه‌قه‌تێن ولاتێن ده‌ڤه‌رێ ژى ب گشتى دپاشه‌رۆژێدا.
كامی كامل
