ژانەسەرێن ئاسایی، و گەلەک جاران ژی یێن گرانترێن وەکی میگرەن، ژی ب ھندەک تەکتیکێن بسانەھی و پراکتیکی چارەسەردبن. دبیتن سپێدەھییەکێ ئێک ژ خەو ڕابیتن و سەرێ وی گەلەک دئێشیتن. ب ئەزموون ئەو ژانەسەر ھەتا شەڤێ و بەلکۆ ژی ھەتا دوو ڕۆژان ژی بەردەوام بیتن. بەلێ پا وێ ڕۆژێ کەسەک و دۆستەک نێزیک و سەبرین وەک مێھڤان بسەر وی دا بێت و پێکڤە ھند بمیننە ب ئاخفتن و سۆحبەتێ ڤە و مژویل ببن، ھێدی خۆە ژبیربکەن. پشتی چەندەکێ وی مێھڤانی تەلەفۆنەک فەر بۆ بێت و ب شۆلەکی بچیتن.
خۆدانێ سەرئێشانێ ژی ل مال بمینت، و پشتی بێھنەکێ ھزرکرنێ شونیکا بیرا وی بێتن:" وەی ! پانێ سپێدی سەرێ من ژانەکا بێقام ھەبی و ئەز ژبەر نەدحەوام. باشە چەوا نۆکە سەرێ من نائێشت؟"
د زانستێ دەروونناسییا نوی دا، ئەڤە ئێکە ژ ڕێکێن بسانەھی و بێ مەزاختنێن نەھێلانا ژانەسەرێن مرۆڤی، و ناڤێ دبێتن تشتەکێ وەکی " تەرکیزکرنێ" بیتن.
ل قۆناغا ئەڤرۆ یا کوردستانێ دا، ھندەک کەس و لایەن، ب ھێجەتن و خوە تووشی ژانەسەرێ کری و بڤێ ژانەسەرێ ھندە دێ زیانەک مەزن لڤی وەلاتی دەن. لدەمەکی ئەو دشێن ب " تەرکیزکرنێ" لسەر ریفراندۆمێ خوە ژ ڤێ ژانەسەرا دەستنەخوەش خلاس بکەن، و ڕێکێ ل وان زیانا بگرن، ئەوێن دبیتن ل داھاتووی ل ھەر تاکەکێ ڤێ کوردستانێ بکەڤت، ھەکەر بێت و لسەر وێ چەندێ بەردەوام بن. ئەو ل جھێ " تەکەزێ" لسەر تشتێ خراب و لایەنێن نەباش و ئەوا ئەو وەسا دبینن، ھزرا خوە بدنە سەر تشتێ گەلەک بمفا یێ کۆ پشتی وێ ریفراندۆمێ دێ ھێتن و بۆ ھەمی کوردستانیانە. ئەڤە ڕێکا " تەرکیزا" سەر خالێن باشە بۆ چارەسەریەکا وان ژانێن بێ بھا و ھێجەتکی.
*بسپۆرێ زانستێن پێداگۆگی و پەروەردەیی/فاکۆلتییا پەروەردە/ زانینگەھا زاخۆ