بەرۆڤاژی ھزر و تێگەھشتنا شاش لنک ھندەک کەسان ژ بابەتێ دالغێ و بێمفایی و پوویچبوونا وێ، زانایێن دەروونناس گرنگی و پویتەک مەزن پێددەن و ب ئێک ژ مەزنترین بناسێن سەرکەفتن و پێشکەفتنا مرۆڤاتیێ و شارستانیەتا وی دزانن.
ئەو داھینان و سەرکەفتن و پێشکەفتن ب کەشتیەکێ ژ بۆشاھییا ئەسمانی و مرۆڤێن ئالی و سەربانێ ھەیڤێ نەھاتیە. ھەروەسا ژ بنێ ئەردی و کەھنی و سەرێ چیا ژی نەھاتیە خوارێ.
ھەمی بەرھەمێ دالغەیێن وان مرۆڤا و زانا و فەیلەسۆفایە، یێن دلێ وان بۆ مرۆڤا دقۆتا و ب وانڤە دما و بۆ وان دسۆت. ئەوێن کێماسیێن خەلکێ ئەو ئێشاندین و پالداین دا ب و د دالغەی دا ل کۆنجەکێ و ڕێکەکێ بگەڕھن و مرادا دلێ وان کەسا حاسل بکەن و بارێ وان یێ دەروونی سڤکتر بکەن.
دالغە پشکەکە ژ پرۆسێسا مێنتالی (عەقلی) یا ھزرکرنێ. ب دالغا، گەلەک جاران ئەو ڕێک یێن لبەر مرۆڤی بسانەھی لێھاتین و ڤەبین، ئەوێن وەکی دی مرۆڤی چ جاران ھزرا وان نەدکر و باوەر نەدکر دێ بسەر وان ھلبیتن و بەلکۆ نەدوێرا ھزرێ تێدا بکەتن.
لێ وێ مەرجەکێ ھەی. ئەو چیە؟ پێدڤیە دالغە لسەر بنەمایێ لۆژیکی و زانستی و کەتوار، و پشتی ھەلسەنگاندنەکا ھویر و بابەتیانە و ھەمەلایەنە ژ وی بابەتی ڕووی بدەتن، و دویر بیتن ژ کەرب و کینە و حەسویدی و بەخیلی و نەڤیان و دڵڕەشی و زکڕەشی و ڕۆتین( عەدەت) و دووڕوویی، و تێکلیەک بت ژ جوانترین و پیرۆزترین بھایێ، مرۆڤی و ڕەوشتی و نەتەوەیی و نیشتمانی و ژێیاتی و دادپەروەری و یەکسانی و ئازادیخازی و ھەستابەرپرسیاریێ بەرامبەر خۆ و دەوروبەر و ژینگەھا فیزیکی و مرۆڤی و جڤاکی.
ھەمی ئەو ساخلەتە ھەژینە و یێن د وێ ریفراندۆما مە کوردستانیان بڕیار و سۆز لسەر و بۆ دای، یێ ھەی، و بلا دالغەیەک پاقژ و ب بەرھەم ژی بۆ وێ بیتن، ما دێ چ دنیا خراب بیتن؟!
*بسپۆرێ زانستێن پێداگۆگی و پەروەردەیی/فاکۆلتییا پەروەردە/ زانینگەھا زاخۆ