پشتی ئەنجامدانا راپرسیا سەرخوەبوونا هەرێما کوردستانێ بوویە بریار، د نهادا بابەتێ گەرمێ جادەییا کوردی بوویە بەحسا ڤێ پروسەیێ و وەلاتی دناڤبەرا دوبەرەیان دا هاتینە پارڤەکرن، هەنە دگەل دانە و هەنە دژاتییا وێ دکەن. هەردەم چاڤێ ملەتێ کورد یێکو ب درێژاهیا مێژوویێ ژ لایێ گەلەک وەلاتان ڤە هاتیە داگیرکرن و پارچە پارچەکرن، و ل سەر دەستێن حکومەتێن ئێک ل دیڤ ئێکێن ئیراقی ژی کوشتن و دەردەسەری و ئەنفال و تالانکرن و دەربەدەری دیتین چاڤێ وان ل دەولەتا کوردی بوویە کو هەمی دەما بتنێ خەونەک بوو لی د نهادا ئەو خەونە یا بەرەڤ راستییێ د چیت، باشە بو دژاتییا وێ بکەین؟
ئیراق پشتی ژ ناڤچوونا رژێما بەعس ل سالا ٢٠٠٣ و ژ ئەگەرا ڤالاهیا سیاسی و دەرکەفتنا کەرب و کینا تایفی ل وی وەلاتی هێدی هێدی ئیراق، بەرەڤ پارچەپارچەبوونێ چوو، کورد ژی وەک بەشەک ژ ئیراقێ و نەتەوەیەکێ گرنگ ب درێژیا وان سالان هەولێن ئێکگترنا ئیراقێ دان ، لێ هەردەمێ حکومەت هاتبا پێک ئینان هەمی هەول ژ بۆ کێمکرنا مافێن کوردان دهاتنە دان، ب هەمی رەنگان دژاتییا بجهئینانا مادەیێ ١٤٠ دهاتە کرن، دیسان ب چ رەنگان د دەمێ پەسەندکرنا بودجەیێ ئیراقێ دا پشکا درست یا هەرێمێ ژ بودجەی نەدهاتە رەوانەکرن، پشتی هاتنا تیرورستێن داعشێ ژی ب ئێکجاری پشکە بودجەیا هەرێما کوردستانێ ژ لایێ بەغدا ڤە هاتە برین. ب هاریکارییا هەڤپەیمانا نێڤدەولەتی ژی هەر زوو ئەفسانەیا داعشێ ل سەر دەستێ هێزێن پیشمەرگەی هاتە شکاندن، و پێشمەرگە بۆ ناڤەکێ دیار ل ناڤا جیهانێ، ئەڤەژی بو ئەگەرەک کو ب دەهان سەرۆک و سەرکردە و بەرپرسێن وەلاتێن زلهێزێن جیهانێ سەرەدانا هەرێمێ بکەن و ل چەندین وەلاتان ژی وەک سەرۆکێ وەلاتەکی پێشوازی ل سەرۆکێ هەرێما کوردستانێ دهاتە کرن، د نهادا هەرێما کوردستانێ بوویە بەشەک ژ چارەکرنا کیشەیێن رۆژهەلاتا ناڤەراست و گرنگیا خوە بۆ وەلاتێن جیهانێ هەیە، ئەڤە هەمی بووینە ئەگەرەک بو هندێ کو نها باشترین دەمە هەرێما کوردستانێ راپرسیا سەرخوەبوونا هەرێمێ بکەت، پێدڤیە هەمی تەخ و چینێن جڤاکی و هەمی لایەنێن سیاسی ژی کار بو سەرخستنا ڤێ پروسەیێ بکەن و خەونا چەندین سالان بجهبینین و بەرەڤ سەرخوەبوونێ بچین، چارەنڤیسێ مە دێ چ بیت ئەگەر ئەڤ پرۆسەیە سەرنەگرت و مە پشتەڤانی لێ نەکر؟ دگەل وێ ئیراقی بمینین یا موچە و بودجەیێ وەلاتیان د نەخوشترین کاودان دا برین؟ دگەل وێ ئیراقێ بمینین یا تا نها دانپیدانێ ب کوردان نەکەت وەک نەتەوەیەکی گرنگ د ئیراقی دا؟ یان ئەو ئیراقا هزارەهان کەس و کارێن مە ب ئەنفال و کیمیا باران کوشتین و تانها ژی چارەنڤیسێ هزارەهان کەسان نەدیارە؟ خێرا مە دگەل وان د کیرێ دایە؟ دەم ژ هەمی لایەکی ڤە یێ گونجایە و دنهادا درستبوونا دەولەتەکا کوردی د نەخشەیێ رۆژهەلاتا ناڤەراست دا دێ ئارامیێ ل دەڤەرێ پەیدا کەت.
یا گرنگ دڤێت لایەنێن سیاسی ب زیترین دەم کێشەیێن ناڤخوە یێن هەرێمێ چارەبکەن و کار بو سەرخستنا ڤێ پروسەیێ بکەین، ئەڤ دەلیڤەیا نها ژ دەست ملەتێ کورد نەچیت، سازیێن راگەهاندنێ ژی ب هەمی رەنگان بشێن خزمەتا ڤێ پروسەیێ بکەن بو بجهئینان خەونا ملەتێ کورد و دەولەتا کوردی ببیتە راستی.