نێزیکی (٤٠)ساڵانە گۆتنەکا محەمەدێ ئەمین (س) د گۆھێن من دا دزرنگن:" خوەلی و ئاخێ بناڤچاڤێن مەتحۆکا دا بکن". ڕاستی نەک تنێ فەرموودە، بەلکۆ یاسایەکا ژیانێ یە. دیارە ئەڤ ڕەفتارە ئێکە ژ ساخلەتێن کرێت و وێرانکەرێن تاکی و جڤاکی. زیانێن ھەر مالبات و ئەندامێن وێ ژ ھەبوونا وێ لنک ئەندام یان چەند ژ وان د ئاشکرانە، و نەخاسمە دەمێ ڕەوشا مالەکێ ژ لایەنێ ئابووری و جڤاکی نەیا جێگیر بیتن و شەپلین و ئاریشەیێن مەزن تێدا ھەبیتن، ھند گڤاشتنێ لسەر وێ خێزانێ دروست دکەتن و دبیتە ئەگەرێ تێکچۆنا پەیوەندییا دناڤبەرا وان و نەخاسمە یا ژن و زەلامی، و بارگرانیەکا ئابووری لسەر وان دروست دبیت. مەتحۆکییا ژنێ یان زەلامی پشکەکە ژ نەئاسایبوونا بارێ دەروونیێ وان، و پێدڤیە ئەو بۆ بەرداومیدان ب پەیوەندی و ژیانا خۆ و ژبەرئێکنەچۆنا وێ لگۆرەی پێدڤی کێم بکەن یان نەھێلن، نەخاسمە ئەگەر ئەو د ئاستەکێ لاوازێ ئابووری و خرابا جڤاکی بن. بۆ وێ ڕەفتارێ فەرە ئەو کەس بۆ خۆ و بدەستێن خۆ سنووران دەینن، ھەتا نەبیە درەنگی.
ئەڤ ڕەفتارە چ لسەر ئاستێ تاکی و کەسی و چ ژی جڤاکی و مەزنتر و سیاسی ھەمان ئەو زیانێن ھەین. ئەڤرۆکە کەرنەڤال و شەھیانا بڕێڤەچۆنا ریفراندۆما سەربخۆییا کوردستانێ یا ھەی، لێ ھندەک کەس ب ئەگەرێن نەبەرکەفتی یێن مەتحۆکیێ دکەن و ھندە دێ سەرا وێ مەتحۆکیێ بۆ وەلات و نەتەوە و لایەنێن دیتر مالا خۆ خراب کەن. ئەو ژ مەتحۆکییا گەلەک کەس و لایەنێن بەری خۆ پێڤە نەچۆینە. مخابن بۆ مەتحۆکا !
*بسپۆرێ زانستێن پێداگۆگی و پەروەردەیی/فاکۆلتییا پەروەردە/ زانینگەھا زاخۆ